Kandidati i AKI-së për Komunën e Tetovës, Bajram Rexhepi, ka zhvilluar sot një mëngjes pune me bartësin e listës, Asafin, dhe me kandidatët e listës së këshilltarëve të AKI-së për Tetovën informon Tetovasot.

Ai tha se puna e përbashkët dhe respekti i ndërsjellë janë themeli për ndërtimin e një ekipi të motivuar që punon vetëm për të mirën e qytetarëve. “Njerëzit dhe bashkëpunëtorët duhet gjithmonë të trajtohen me respekt dhe dinjitet,” theksoi Rexhepi.

Në të njëjtën kohë, kandidati i AKI-së u dërgoi një mesazh të qartë punonjësve të administratës komunale. “E di që sot jeni nën presion, shantazh dhe kërcënim të vazhdueshëm. Por koha e këtyre presioneve mbaron me 19 tetor. Nga 20 tetori, asnjë punonjës nuk do të trajtohet si mjet politik. Secili prej jush do të ketë dinjitetin dhe respektin që meriton. Administrata do të jetë e lirë, profesionale dhe në shërbim të qytetarëve, jo e partive,” deklaroi Rexhepi./Tetovasot/

Kandidati i Aleancës Kombëtare për Integrim për Komunën e Sarajit, Blerant Ramadani, ka përgëzuar suksesin e vogëlushit 8-vjeçar nga Bojana, Betim Hasani, i cili u shpall kampion në garat ndërkombëtare të matematikës të mbajtura në Zyrih.

“Ky talent i jashtëzakonshëm është dëshmi se Saraji ka yje që sfidojnë edhe kuadrot më të forta të Evropës. Në të ardhmen, si Komunë do të sigurojmë që çdo talent si Betimi të ketë mbështetjen dhe mundësitë për të garuar dhe shkëlqyer kudo në botë”, u shpreh Ramadani.

Ai shtoi se ky është shembull i forcës së Sarajit – djem e vajza që sjellin krenari për të gjithë.

Liridon Ramadani nga Aleanca për Shqiptarët reagoi ndaj vendosjes së flamujve serbë në Manastirin e Mateçit, duke theksuar se këtë vit situata nuk është e njëjtë si më parë.

“Është e vërtetë se edhe vite të tjera kanë ardhur grupe të caktuara në Mateç, dhe si shoqëri multietnike e multikulturore askush s’ka pas problem me këtë. Por ky vit është krejt ndryshe: sepse tash flamujt serb nuk vendosen më nga individë, por marrin peshë dhe legjitimitet përmes institucioneve të shtetit,” tha Ramadani.

Ai shtoi se përkrahja e këtij veprimi nga zëvendëskryeministri Ivan Stolkoviq e shndërron atë nga një ngjarje e thjeshtë kulturore apo fetare në “shfaqje nacionaliste të sponsorizuar nga vetë qeveria”.

“S’kemi më multikulturë e bashkëjetesë, por përulje të kujtesës sonë historike. Çdo flamur serb në Manastirin e Mateçit këtë vit është vulë e VLEN-it. Dhe ky është turpi i një qeverie që u thotë shqiptarëve ‘jemi të barabartë’, por në praktikë janë bërë mjet për të arsyetuar këtë qasje nacionaliste antishqiptare,” deklaroi Ramadani.