Kandidati për kryetar komune të Gostivarit, Valbon Limani i shoqëruar nga kandidati për bartës liste Valder Xhaderi dhe nga ish kryeministri Talat Xhaferi e deputeti Halil Snopçe qëndruan në fshatin Forinë në vendlindjen e Talat Xhaferit nga ku ndezën edhe flakadanët e fitores së madhe të 19 tetorit.

Kandidati për komunën e Sarajit, Blerant Ramadani, e ka cilësuar si “surprizë të bukur të parafushatës” pritjen që iu bë nga qindra të rinj në shtabin e AKI-së.

Në një postim, Ramadani u shpreh se kjo përkrahje nga të rinjtë është një motivim dhe një përgjegjësi e madhe.
“Zemra mal, përgjegjësia oqean! Për këtë rini, çdo fjalë do ta shndërrojmë në vepër. Amanet i gjeneratave”, shkroi Ramadani.

Kryetari i LSDM-së, Venko Filipçe, tha se nën udhëheqjen e qeverisë aktuale, po ndodh një debakël diplomatik i paparë.

“Izolim total diplomatik në takimin e OKB-së, presidentja takohet me diplomatin më të ulët nga Shtetet e Bashkuara. Diplomacia nuk ka përjetuar kurrë një debakël të tillë”, tha Filipçe.

Filipçe e përshkroi këtë si një konfirmim simbolik, por shumë serioz se ku ndodhet vendi sot në skenën ndërkombëtare.

Sipas tij, Maqedonia e Veriut, nga një vend që u njoh dhe u mbështet nga partnerët kryesorë strategjikë, sot është një vend që merr vëmendje vetëm në margjina, pa ndikim të vërtetë politik, pa diskutime serioze dhe pa respekt.

“Gjithçka varet nga bërja e selfieve me disa diplomatë në korridoret e institucioneve të mëdha botërore”, tha Filipçe.

Ai kujtoi se rruga drejt NATO-s dhe BE-së nuk ishte e lehtë dhe nuk ishte pa një çmim politik, por se rruga ishte e vlefshme dhe e saktë.