Arrestimi dhe dënimi me dy vite burg me kusht i një personi që valëviti flamurin e “Shqipërisë së Madhe” në ndeshjen Shkëndija–Qarabag ka hapur debat mbi standardet e drejtësisë. Pyetja që po shtrohet është: a do të veprojë shteti me të njëjtin ritëm edhe ndaj huliganëve maqedonas që brohoritën thirrje raciste dhe ksenofobe në Kumanovë, madje në praninë e kryeministrit Mickoski dhe disa ministrave?

Ersan PAJAZITI

Shkup, 8 gusht – Fakti që policia arrestoi dhe në mënyrë eksprese dënoi me dy vite burg me kusht një shqiptar të diasporës që valëviti flamurin e “Shqipërisë së Madhe” në ndeshjen Shkëndija-Qarabag ka ngritur shqetësime për atë nëse shteti ka qasjen e njëjtë ndaj rastit të thirrjeve raciste dhe ksenofobe në ndeshjen e basketbollit në Kumanovë, si dhe ndaj thirrjeve të tifozëve shqiptarë për “Shqipëri Etnike” gjatë ndeshjes së futbollit në Shkup. I pyetur për këtë, zëvendëskryeministri Izet Mexhiti tha se është i vetëdijshëm se nuk mund të barazohen të dyja rastet, por fajin për këtë qasje jo të njëjtë ia lë gjyqësorit.

“Sa e di, është ngritur aktpadi edhe ndaj rastit në Kumanovë. Edhe njëherë shfrytëzojë rastin ti bëjë thirrje, ti respektojmë vlerat e njëri-tjetrit, të ikim sa më larg thirrjeve raciste, ksenofobe. Por duhet ta kemi parasysh se gjyqësori nuk është në nivelin e duhur të detyrës. Shpesh-herë aty ku duhet të veprojë nuk vepron, aty ku s’duhet e tepron. Mirëpo, është me rëndësi që institucionet ishin të njëzërit, që pa marrë parasysh se nga kush vijnë thirrjet raciste, ksenofobe duhet të dënohen. Në këtë rast nuk mund të barazohen, sepse thirrjet në Kumanovë ishin plotësisht raciste dhe anti-shqiptare. Sido që të jetë, bëjmë apel që edhe gjyqësori të jetë në nivel të detyrës”, theksoi Mexhiti.

Një person me shtetësi gjermane – shqiptar nga diaspora është dënuar me dy vjet burg me kusht për veprën penale “nxitje të urrejtjes” gjatë ndeshjes ndërkombëtare të futbollit mes klubit nga Tetova “Shkëndija” dhe “Qarabag”. Këtë aktgjykim e ka shqiptuar Gjykata Themelore Penale Shkup 1, pas identifikimit të kryer dhe aktakuzës së ngritur me procedurë urgjente nga Prokuroria Themelore Publike. “Kundër tij është ngritur aktakuzë, sepse më 5 gusht, menjëherë para ndeshjes së futbollit ndërmjet FC ‘Shkëndija’ dhe FC ‘Qarabag’, me shpalosjen dhe valëvitjen e flamurit të ‘Shqipërisë së Madhe’ me mbishkrimin ‘Autokton’, ka nxitur ndjenja urrejtjeje, përçarjeje dhe intolerancë mbi baza etnike. Kjo është vërejtur nga zyrtarët policorë, të cilët e kanë privuar nga liria”, thuhet në njoftimin e Prokurorisë së Shkupit.

Në njoftim theksohet se mbi bazën e dëshmive të siguruara, Gjykata Themelore Penale Shkup ka shpallur të pandehurin fajtor dhe e ka dënuar me dënim me kusht prej dy vitesh, i cili nuk do të ekzekutohet nëse i dënuari nuk kryen vepër të re penale në pesë vitet e ardhshme. Në të njëjtën kohë, meqë bëhet fjalë për një shtetas të huaj, Gjykata ka marrë vendim ta dëbojë dhe t’i ndalojë hyrjen në shtet për pesë vitet e ardhshme.

Ndërkohë edhe pse Mexhti tha se është i informuar se është ngritur aktpadi për thirrjet raciste që jehuan në Kumanovë nga tifozët maqedonas, asnjë informatë nuk jepet nëse janë dënuar në mënyrë eksprese huliganët maqedonas, të cilët brohorisnin në kor thirrje antishqiptare, madje në praninë e kryeministrit Hristijan Mickoski, ministrit të Policisë, Pançe Toshkovski dhe zëvendëskryeministrit Stoillkoviq. MPB tha de ka marrë në pyetje një të dyshuar, por pa treguar nëse është ngritur apo jo aktakuzë gjyqësore. Dhe, bëhet fjalë vetëm për një të ftuar në polici, dhe jo për tërë grupin që brohorisnin “Dhoma gazi për shqiptarët”, “Shqiptari i mirë është shqiptari i vdekur”.

Ndërkohë, Ministria e Brendshme dhe Prokuroria kanë njoftuar se vazhdojnë të ndërmarrin masa për zbulimin dhe identifikimin e autorëve të veprave penale përhapje të urrejtjes dhe intolerancës të lidhura me ndeshjet sportive. (koha.mk)

Në një kohë kur drejtësia duhet të jetë e barabartë për të gjithë qytetarët, heshtja e zëvendëskryeministrit Izet Mexhiti përballë dënimit të menjëhershëm të një të riu shqiptar që mbante një flamur me mbishkrimin “autoktonus” është e papranueshme dhe thellon ndarjet etnike në vend.

Deputeti i Aleancës për Shqiptarët, Halil Snopce, ka reaguar ashpër ndaj këtij rasti duke theksuar se Mexhiti, në vend që të mbrojnë qytetarët shqiptarë nga diskriminimi, po zgjedhin të heshtin përpara parullave raciste dhe gjyqësorit të njëanshëm – vetëm për të ruajtur karrigen në qeverinë e përbashkët me VMRO-në.

“Si zëvendëskryeministër, Mexhiti nuk mund të shmangë përgjegjësinë. Mosreagimi nuk është shenjë fuqie, por mungesë guximi dhe pushteti. Në politikë, pikërisht përgjegjësia është ajo që sjell ndryshimin”, shkruan deputeti Snopçe në reagimin e tij në rrjetet sociale.

Ai shton se ndëshkimi i shqiptarëve për shprehje identitare, ndërkohë që urrejtja dhe racizmi kundër tyre kalon pa asnjë reagim institucional, është një padrejtësi që nuk mund të fshihet me heshtje.

“Ne kërkojmë drejtësi dhe përgjegjësi për diskriminimin etnik që po legjitimohet me heshtjen e pushtetit,” përfundoi Snopçe.

Dy drejtorë shqiptarë të klinikave universitare në Shkup janë shkarkuar nga pozitat e tyre dhe janë zëvendësuar me drejtues maqedonas, informon PressOnline.al.

Fatmir Mexhiti është shkarkuar nga detyra e drejtorit të Klinikës Universitare të Neurologjisë. Në vend të tij është emëruar Igor Kuzmanovski, i cili ka lindur në vitin 1972 në Shkup, punon në këtë klinikë që nga viti 1996 dhe prej vitit 2016 mban titullin doktor shkencash. Ai gjithashtu është profesor në Fakultetin e Mjekësisë në Shkup. Mexhiti kishte marrë drejtimin e klinikës në korrik të vitit të kaluar.

Ndryshime ka pasur edhe në Klinikën Universitare të Kardiologjisë, ku është shkarkuar drejtori shqiptar Bekim Poçesta dhe në vend të tij është emëruar Danica Petkoska Spirova. Ajo është kardiologe subspecialiste në ekokardiografinë e avancuar dhe teknikën dupleks të arterieve karotide, me eksperiencë në procedurat diagnostikuese dhe terapeutike. Petkoska është pjesëmarrëse në studime ndërkombëtare dhe autore e shumë punimeve shkencore.

Këto lëvizje në krye të dy prej klinikave kryesore në vend kanë ngjallur reagime në opinion, duke u parë nga një pjesë e publikut si pjesë e një praktike për të zëvendësuar drejtuesit shqiptarë me maqedonas.