Kryetari i degës së Aleancës për Shqiptarët në Çair, Muhadin Brava, ka reaguar ndaj një deklarate të degës së BDI-së në Çair, e cila ka akuzuar drejtoreshën e Spitalit Gjinekologjik të Çairit, Pranvera Izairi, për gjoja kërcënime ndaj stafit për të marrë pjesë në një tubim të VLEN-it.

Në reagimin e tij, Brava i ka cilësuar këto akuza si të pabaza, duke i quajtur një përpjekje të dëshpëruar të BDI-së për të kamufluar largimet e shumta nga radhët e saj drejt VLEN-it. Ai theksoi se VLEN nuk ndjek metodat e presionit që, sipas tij, ishin praktikë e zakonshme e BDI-së në të kaluarën. “Dega e BDI-së në Çair është ngutur me një reagim shpifës dhe ofendues nga frika që po e ndjen në palcë. Ata po përpiqen të mjegullojnë realitetin me trillime të ulëta, ndërkohë që simpatizantët e tyre po largohen masivisht për t’iu bashkuar VLEN-it”, tha Brava.

Ai gjithashtu vlerësoi punën e Pranvera Izairit si drejtoreshë e Spitalit Gjinekologjik të Çairit, duke e cilësuar atë si një prej menaxhereve më të suksesshme në shëndetësi, veçanërisht në luftën kundër korrupsionit dhe mitëmarrjes. “Tashmë është e qartë për të gjithë se BDI nuk mund të pajtohet me suksesin e shqiptarëve që nuk janë pjesë e saj. Me Pranverën në krye të këtij spitali, vërtet ka ardhur një pranverë e re në menaxhimin e këtij institucioni”, shtoi ai.

Në fund, Brava theksoi se tubimet e VLEN-it janë aktivitete publike ku pjesëmarrja është e lirë dhe se përpjekjet e BDI-së për t’i paraqitur ndryshe janë të kota. “VLEN nuk ka ndërmend të heqë dorë nga shpalosja e arritjeve të saj dhe ekspozimi i dështimeve të pushtetit të mëparshëm”, përfundoi ai.

Anëtarët e Forumit Rinor të Aleancës për Shqiptarët, dega Gostivar, zhvilluan një takim me Ambasadorin e Republikës së Shqipërisë në Maqedoninë e Veriut, Denion Meidani.

Gjatë takimit, meAmbasadorin Meidani u diskutua mbi rolin e rinisë në zhvillimin e komunitetit si dhe mundësitë e bashkëpunimit për të forcuar angazhimin e të rinjve në proceset shoqërore dhe kulturore theksojnë nga FRASH-Gostivar.

Gjitashtu bashkëbiseduesit theksuan rëndësinë e krijimit të platformave të reja që do të mbështesin të rinjtë në nismat e tyre dhe do të forcojnë lidhjet ndërmjet të rinjve shqiptarë në rajon.

Shkruan: Arben Fetai, zv.kryeministër

Pehlivani nuk ka emër. Ai njihet vetëm në emër të pronarit. Nuk ka qëndrim të vetin, nuk ka vizion të vetin – thjesht zbaton urdhrat e atij që e komandon.

Pehlivani i Aliut, që gjithë ditën e ka gojën plot Evropë e Perëndim, mbrëmë foli hapur kundër kthimit të diasporës dhe vjelli mllefin e tij kundër atyre që kthehen për të kontribuar në vendlindje.

Natyrisht, kthimi i diasporës nuk është në përputhje me agjendën e shefit të tij, sepse Aliu e dëboi këtë popull, dhe tani që ne po kthehemi, është e rëndë për të dhe pehlivanat e tij ta pranojnë këtë realitet.

Pehlivani i Aliut po sheh ëndrra syçelë edhe në ambiente me ndriçim të fortë, si në studion e mbrëmshme. Sado që përpiqet të manovrojë si lider, nënvetëdija e tradhton, veprimtaria e përditshme e demaskon.

Ai e sheh partinë si pronë private dhe mjet pasurimi. Dhe si për ta konfirmuar këtë, mbrëmë pehlivani vajtoi edhe pozitën e kryetarit të Kuvendit në ASH. Kur ishte kryetar partie, dështoi; kur e bëmë kryetar Kuvendi, na tradhtoi. Tani ka gjetur ngushëllim në prehërin e Aliut që e bëri kryetar Kuvendi në hotel!

Aleanca për Shqiptarët ka pasur dhe do të ketë vetëm një qëllim: të mbrojë interesat e shqiptarëve. Të sigurojë që ata të kenë zë dhe të mos lihen pas dore. Këtë nuk mund ta arrinim pa rrëzuar diktaturën ahmetiane në Maqedoninë e Veriut.

Dhe këtë qëllim e arritëm! Madje, edhe më shumë se kaq: duke punuar për të larguar të keqen – BDI-në – demaskuam edhe “ushtarët” e Aliut, ata që hiqeshin si opozitarë, por që në fakt ishin vetëm pehlivanë.

Ne e zhveshëm BDI-në nga pushteti, dhe pehlivanët nga maska e opozitarizmit të rremë!
Maskat kanë rënë. Rruga përpara është më e qartë se kurrë!