Gazetari Furkan Saliu ka kritikuar ashpër kryetarin e Tetovës, Bilall Kasamin, pasi ky i fundit heshti përballë deklaratave nacionaliste të kreut të VMRO-së, Hristijan Mickoski.

Sipas Saliut, Kasami në vend që të reagonte ndaj Mickoskit, i cili ofendoi Adnan Azizin, zgjodhi të justifikohej duke thënë se “BDI qëndron pas retorikës nacionaliste”.

“Prita që z. Kasami t’i përgjigjej Mickoskit për deklaratën e djeshme, por ai, në vend se të përgjigjej, në njëfarë mënyre i kërkoi falje duke u arsyetuar se BDI po e fut në retorikën nacionaliste. Jeni duke hyrë në grackën e Mickoskit për disa vota, ndërsa pasojat do të jenë afatgjata dhe të dhimbshme për kombin tonë”, ka shkruar Saliu.

Ai ia kujton Kasamit se:

Mickoski ka kërkuar shkarkimin e një drejtori shqiptar vetëm pse foli shqip;

Ka sulmuar ligjin për përdorimin e gjuhëve, bandenterin dhe balansuesin;

Ka zhvilluar fushatë antishqiptare në zgjedhje;

Ka bllokuar ndryshimet kushtetuese dhe ardhmërinë evropiane.

“Z. Kasami, duhet fillimisht t’ia bëni të qartë vetes se çfarë jeni dhe çfarë doni të arrini në politikë. Me këtë konfuzion, po dukeni vetëm si kryetar i degës së VMRO-së në Tetovë”, ka përfunduar Saliu.

Kandidati për kryetar të Çairit, Bujar Osmani, theksoi se vendi tashmë i ka marrë të gjitha garancitë e nevojshme nga BE-ja dhe se tani është koha për hapa vendimtarë përpara, e jo për lojëra politike.

“​Maqedonia e Veriut i mori garancitë në momentin kur e përcaktoi kornizën negociuese. Aty janë të rregulluara të gjitha çështjet. Tani nuk duhet të keqpërdoret tema e BE-së”, tha Osmani.

Ai vuri në dukje se perspektiva evropiane e vendit është ngushtë e lidhur me sfidat historike dhe presionet nga “bota serbe”, e cila edhe sot funksionon si sistem paralel që e saboton agjendën evropiane.

“Tani ka dy opsione: ose je me BE-në ose je me botën serbe, zonë gri nuk ka. Ato janë të ndërlidhura. Çdo hap drejt BE-së është largim nga bota serbe. Dhe, a e keni vërejtur? Çdo kush që bën hap drejt BE-së, bëhet cak i sulmeve”, deklaroi Osmani.

Ai kujtoi edhe ngjarjet historike që tregojnë sa thellë është e rrënjosur kjo dilemë.

“E dini kur ndodhi atentati ndaj Gligorovit? Një ditë pasi u kthye nga Beogradi dhe shpalli se do të largohemi nga Jugosllavia. E dini pse çdo përpjekje për marrëveshje me Bullgarinë e me Greqinë, ose për afrimin e vendit drejt BE-së, has në demonizim dhe propagandë? Sepse çdo hap drejt BE-së është hap largimi nga bota serbe. Çdo hap prapa është hap drejt botës serbe”, tha Osmani.

Në fund Osmani e dënoi ashpër politikën e qeverisë aktuale, duke e akuzuar për servilizëm dhe bllokadë të perspektivës evropiane.

“Kjo qeveri e ka bllokuar perspektivën evropiane, prandaj jemi shndërruar në foshnjë të botës serbo-ruse, e cila i ka kapur të gjitha instrumentet”, përfundoi ai.

OJQ “Më mirë për Tetovën” ka dalë me një reagim publik lidhur me partneritetin publiko-privat mes Komunës së Tetovës dhe kompanisë Saubermacher, duke e cilësuar atë si dëm për qytetarët dhe bizneset e Tetovës.

“💰 Kompania Saubermacher, nëpërmjet partneritetit publiko-privat që ia mundësoi udhëheqësia aktuale e Komunës i “reketon” qytetarët dhe bizneset e Tetovës.

📧 Prej dje kemi pranuar ankesa nga pronarë të bizneseve, të cilët kanë pranuar njoftim përmes emailit nga Saubermacher që kërkon nga ata të lidhin kontratë për shërbimet nga kjo ndërmarrje.

🆘 Bizneset, në rast se nuk e nënshkruajnë këtë kontratë në afat prej 5 ditëve, rrezikojnë të gjobiten me shuma marramendëse nga 9️⃣0️⃣0️⃣0️⃣ euro, deri në 9️⃣8️⃣0️⃣0️⃣0️⃣ euro.

🤝 Kërkojmë nga Komuna e Tetovës / Општина Тетово që ta publikojë marrëveshjen me kompaninë Saubermacher, në bazë të së cilës kjo e fundit merr lirinë që t’i trajtojë qytetarët dhe bizneset e Tetovës në këtë mënyrë”, përfundon reagimi i OJQ-së “Më mirë për Tetovën”.