Zv. kryeministri i Qeverisë së Maqedonisë së Veriut, Izet Mexhiti në fjalimin e tij gjatë 100 ditëshit të parë ka numëruar tre të arriturat më të mëdha të koalicionit VLEN si pjesë e qeverisë si Mbyllja e kazinove, investimi 35 milionë euro për kampusin e UNT-së dhe “one-stop shop” në kalimet kufitare në Bllacë, Qafë Thanë dhe Tabanoc.
“Tre projekte të rëndësishme gërshetimi i të cilave shtron rrugën për një Maqedoni të veriut më të mirë: heqja e kazinove krijon ambient të shëndetshëm dhe më të sigurtë; mundësite për arsim japin shanse për t’u formuar profesionalisht dhe për të konkurruar për vende pune; dhe “one -stop-shop” lehtëson ardhjen në shtëpi. Këto janë përcaktimet tona bazë”, ka deklaruar Mexhiti.
Postimi i plotë:
Në këto 100 ditë të para të qeverisjes sonë, kemi dëshmuar me vendime konkrete dhe veprime të guximshme, se përkushtimi ynë është për të përmirësuar jetën e secilit prej jush. Ashtu siç e kemi premtuar, çdo hap që kemi ndërmarrë është udhëhequr nga parimi i transparencës, drejtësisë dhe përkushtimit për zhvillim të fuqishëm. Koalicioni ynë ka sjellë një erë të re qeverisjeje dhe një qasje që vë qytetarin në qendër, duke bërë ndryshime të prekshme dhe të rëndësishme.
Le të ndalemi te disa nga arritjet më të mëdha që kanë ndikuar drejtpërdrejt në jetën e qytetarëve dhe të ardhmen e vendit tonë, në këto 100 ditë:
Rritja e pensioneve për pensionistët:
Rritja e pensioneve për pensionistët, një kategori që meriton respekt dhe përkujdesje të veçantë për të gjithë kontributin e tyre ndër vite. Nga 1 Shtatori, kemi nisur fazën e parë të rritjes së pensioneve me 2,500 denarë, duke bërë që pensionistët të ndjejnë lehtësim ekonomik dhe mbështetje të vërtetë nga kjo qeveri. Por ky është vetëm fillimi. Nga 1 Janari i vitit të ardhshëm, do të hyjë në fuqi faza e dytë, e cila do të sjellë një rritje shtesë prej 2,500 denarësh, duke e çuar totalin në 5,000 denarë.
Kjo rritje nuk është thjesht një shifër, por një akt nderimi për ata që kanë ndërtuar këtë vend me djersën dhe sakrificat e tyre. Pensionistët tanë meritojnë të jetojnë me dinjitet, dhe ne jemi të vendosur që ta bëjmë këtë realitet. Me këtë vendim, ne tregojmë se kujdesemi për ta, se nuk i harrojmë dhe se jemi gjithmonë në krahun e tyre, duke siguruar që pleqëria e tyre të jetë më e qetë dhe më e sigurt.
Mbyllja e 50% të kazinove në vend:
Një nga vendimet më të rëndësishme të këtyre 100 ditëve ka qenë mbyllja e rreth 50% të kazinove dhe kompanive të bixhozit në vend. Duke u bazuar në interpretimin autentik të ligjit për lojërat e fatit, kemi marrë hapa të qartë dhe të vendosur për të larguar këto aktivitete nga qytetet tona, nga familjet tona, nga fëmijët tanë. Kjo nismë nuk ndalet këtu. Angazhimi ynë është të vazhdojmë me përkushtim deri në eliminimin e plotë të këtyre aktiviteteve që shkatërrojnë jetën sociale dhe ekonomike të mijëra familjeve.
Investimi prej 34.5 milionë euro për kampusin e Universitetit “Nëna Terezë”:
Një arritje tjetër e madhe është vendimi për investimin historik prej 34.5 milionë euro për ndërtimin e kampusit të Universitetit “Nëna Terezë” në Shkup. Ky projekt nuk është thjesht një ndërtesë, por një investim në të ardhmen tonë, në dijen dhe zhvillimin e rinisë shqiptare. Edukimi është themeli i një shoqërie të zhvilluar dhe ky investim i madh tregon angazhimin tonë për ta forcuar arsimin si një prej shtyllave të së ardhmes. Universiteti do të jetë jo vetëm qendër akademike, por edhe burim i inovacionit dhe zhvillimit ekonomik.
Ndarja e 1 miliard eurove për komunat shqiptare:
Në këto 100 ditë, qeveria ka marrë një tjetër vendim strategjik, atë të ndarjes së 1 miliard eurove për komunat shqiptare, si pjesë e procesit të decentralizimit. Këto fonde do të shërbejnë për zhvillimin e infrastrukturës, përmirësimin e shërbimeve publike dhe ngritjen e cilësisë së jetës për të gjithë qytetarët. Kemi siguruar që çdo investim të jetë i drejtpërdrejtë dhe me ndikim pozitiv në komunitetet lokale, duke i dhënë përparësi projekteve që ndihmojnë rritjen ekonomike dhe krijimin e vendeve të reja të punës.
Lehtësimi i kalimeve kufitare:
Një nga sfidat më të mëdha për ata që udhëtojnë drejt vendit tonë, ka qenë pritja e gjatë në pikat kufitare. Për të zgjidhur këtë problem, në këto 100 ditë kemi miratuar vendimin për krijimin e pikave kufitare “one-stop shop” në Bllacë, Qafë Thanë dhe Tabanoc. Me këtë nismë, qytetarët do të kenë mundësinë të kalojnë kufirin më shpejt dhe pa pritje të gjata, duke lehtësuar qarkullimin, veçanërisht gjatë sezonit të verës, kur bashkatdhetarët tanë vijnë për të vizituar familjet e tyre.
Këto janë vetëm disa nga arritjet kyçe të këtyre 100 ditëve të para. Përveç tyre, kemi ndërmarrë hapa konkretë për përmirësimin dhe mbrojtjen e mjedisit dhe promovimin e politikave të gjelbra për një zhvillim të qëndrueshëm, për përmirësimin dhe forcinin e shëndetësisë, forcimin e institucioneve arsimore, sigurisë në vend, e zhvillimit ekonomik. Çdo vendim është marrë duke mbajtur në mendje interesin tuaj dhe të ardhmen e brezave të ardhshëm.
Kjo qeveri është e vendosur të funksionojë me një qasje të hapur dhe të përgjegjshme ndaj çdo qytetari. Nuk kemi ardhur për të qeverisur nga larg, nga selia e partisë, por për të qenë pranë jush, për t’ju dëgjuar dhe për t’ju shërbyer. Çdo funksionar qeveritar duhet t’i përgjigjet qytetarëve, të jetë i hapur për çdo çështje dhe të mos e trajtojë pushtetin si të përjetshëm. Ne jemi këtu për të mbrojtur interesat tuaja dhe për të krijuar një vend më të mirë për të gjithë, jo për t’i bërë familjarët tanë milionerë.
Të dashur qytetarë, këto 100 ditë kanë qenë vetëm fillimi i një rrugëtimi më të gjatë dhe të suksesshëm. Ne jemi të përkushtuar të vazhdojmë me përkushtim maksimal për të ndërtuar një të ardhme më të mirë për ju dhe për vendin tonë. Me mbështetjen tuaj, ne do të vazhdojmë të ndërtojmë një shtet më të fortë, më të drejtë dhe më të zhvilluar.
Me respekt dhe mirënjohje për besimin që na keni dhënë, ne jemi këtu për ju – sot dhe për çdo ditë që vijon.
Punësimi i 155 punonjësve shëndetësorë në Spitalin Klinik të Tetovës do të bëhet pas zgjedhjeve lokale. Pas testimit të kandidatëve për punësim, të cilët aplikuan në konkursin e hapur nga ky spital, procedura e përzgjedhjes do të bëhet pas përfundimit të zgjedhjeve lokale në muajin tetor. Kështu, deklaroi Ministri i Shëndetësisë Azir Aliu, pas vizitës që i bëri Spitalit Klinik të Tetovës. Aliu nuk nguroi të akuzojë paraardhësit e tij në dikasterin e shëndetësisë të cilët sipas tij ishin lënë pa vendime pune.
“Zgjidhja ishte se nuk abuzuam me këto qytetarë dhe të punësuar, por që në ditën e parë, që në takimin e parë që e kam pasur në Tetovë, unë kam pasur takim, i kam informuar dhe i kam parë në sy që zgjidhje e tyre shumë shpejt do të jetë realitet i cili duhet të përfundon në zgjedhjet lokale, sepse ligji nuk na lejon që të bëjmë edhe hapin e fundit për mbylljen e këtij procesi. Unë kërkoj falje për familjarët e aplikantëve sepse abuzimet janë gjithandej në aspekt politik. Tentojnë që të abuzojnë me çdo proces që është i pastër dhe nuk është proces politik”, deklaroi Ministri i Shëndetësisë Azir Aliu.
Faza e fundit e punësimeve të reja në Spitalin Klinik të Tetovës do të jetë përzgjedhja që do të bëhet nga ana e drejtorit të spitalit.
“Ju e dini që konkurset hapen në bazë të ligjit dhe ne duhet që të respektojmë të gjitha indikatorët që neve ligji na obligon. Ju nuk mund të hapni sot, besoj askund në botë nuk ekziston ndonjë konkurs që mund të thoni do të hapi konkurs për dhjetë ose më shumë punësime me emër dhe mbiemër, pra atëherë nuk është konkurs por është emërim. Ne hapëm konkurs dhe qytetarët kanë të drejtë të konkurrojnë. Pra procedurat janë se kandidatët hyjnë në testim, merren pikët nga nota mesatare në shkollë të mesme ose në fakultet, varet është motër medicinale apo mjek, pastaj faza e fundit është se drejtori ka të drejtë ekskluzive të zgjedhë nga lista në bazë të prioriteteve që i ka në spital dhe shërbimeve që ofrohen. Pra, na lejoni të përfundojë dhe më pas do të bisedojmë se kush është pranuar dhe pse është pranuar”, deklaroi Ministri Aliu.
Ai është shprehur se ky proces nuk do të diskreditohet politikisht dhe se ata që e meritojnë të jenë të punësuar do të punësohen. Aliu tha se edhe krahas punësimeve të reja që pritet të bëhen pas zgjedhjeve, konform nevojave do të ketë edhe një konkurs tjetër për rreth 300 punësime të reja./Koha.mk/
Publicisti Kim Mehmeti, në emisionin “Këndi i Kim-it” në Tëvë1, ka komentuar thirrjet për dhunë dhe vrasje ndaj shqiptarëve në Maqedoni, duke vënë në dukje rolin e elitave politike dhe shoqërore në krijimin e këtij klimë tensioni.
“Shumica e maqedonëve, veçanërisht elitat, janë antishqiptare. Shumica kanë urrejtje ndaj shqiptarëve, dhe ata që kërkojnë vrasje të shqiptarëve shpesh vetëm e shprehin dëshirën e elitave politike dhe elitave të tjera,” tha Mehmeti.
Ai nënvizoi se këto mesazhe negative dhe thirrjet për dhunë nuk lindin rastësisht, por pasqyrojnë ndikimin e ideologjive dhe qëndrimeve të një pjese të shoqërisë dhe udhëheqësve të saj.
“Këta janë fëmijë që kërkojnë dhunë ndaj shqiptarëve, por në fakt vetëm pasqyrojnë urrejtjen dhe bindjet që u transmetohen nga elitat,” shtoi publicisti./Teve1
Tmerri që prej vitesh e jetojnë punonjësit e lavanderisë në Qendrën Klinike “Nënë Tereza” Shkup, të cilët kujdesen që të gjitha klinikat të kenë çarçafë të pastër për pacientët dhe që kirurgët të kenë rroba për operacionet – ka arritur kulminacion. Nga para dy ditëve ata janë hedhur në grevë të përgjithshme. Ata ende nuk kanë marrë paga sepse Qeveria nuk e ka zbatuar marrëveshjen për partneritet publik-privat për sterilizimin e instrumenteve në kuadër të së cilës bën pjesë edhe lavanderia, por ata nuk duan t’ia dinë më se kush është fajtor për situatën në të cilën ndodhen, shkruan Slloboden Peçat, transmeton Portalb.mk.
E përderisa ministri i shëndetësisë, kryeministri dhe e gjithë udhëheqësia e shtetit në prag të zgjedhjeve po inaugurojnë reparte spitalore të rinovuara, të gjitha këto reparte në Qendrën Klinike shërbehen me çarçafë nga 11 punonjës të lavanderisë së rrënuar dhe të turpshme të cilën e vizituam sot.
“Slloboden Peçat” e vizitoi lavanderinë dhe në të hasi në një vatër infeksioni, lavatriçe të vjetra, myk, instalime të pasigurta, ujë që rrjedh. Biseduam me pothuajse të gjithë punonjësit dhe ata njëzëri thanë se nuk do të punojnë pa pagesë dhe askush, siç thonë ata, nuk do të përfitojë dhe t’i manipulojë ata për shkak të mirësisë dhe keqardhjes që kanë ata për pacientët.
Ata na thanë se grevën e kishin filluar para zjarrit në Koçan, por kur ndodhi tragjedia, nga keqardhja dhe solidariteti e ndërprenë atë. Njëri prej tyre kishte thyer gishtin duke u munduar të riparonte një rrip të prishur në një lavatriçe që është prodhuar pas Luftës së Dytë Botërore. Një punonjës tjetër na tha se tre herë e kishte goditur korenti për shkak të instalimeve të pasigurta. Të gjithë na u ankuan se ishin të sëmurë, me sëmundje kronike, ndërsa përveç se nuk merrnin pagë, nuk kishin as sigurim shëndetësor, kështu që tani i paguajnë nga xhepi barnat e tyre për diabetin, tensionin e lartë të gjakut, astmën dhe të gjitha sëmundjet që i kanë fituar për shkak të punës në avull dhe lagështi.
Në bisedë me ekipin e “Slloboden Peçat” punonjësit thanë se nuk u intereson kush është fajtor që nuk i kanë marrë pagat që nga muaji shkurt, a është kompania që e menaxhon lavanderinë apo Shërbimet e Përbashkëta në Qendrën Klinike. Për ta nuk kjo ka rëndësi sepse në llogaritë e tyre nuk kanë para. Të 11 punonjësit nga dje janë në grevë të përgjithshme. Dhe kjo do të thotë që e gjithë Qendra Klinike “Nënë Tereza” së bashku me klinikat shoqëruese nuk do të marrin çarçafë të pastër për pacientët, as uniforma për kirurgët. Kështu, bomba e kurdisur e infeksioneve dhe baktereve është gati të shpërthejë, ashtu si edhe durimi i punonjësve.
Kur u futëm në lavanderi hasëm në grumbuj çarçafësh, por disa nga punonjësit na thanë se tashmë i kishin njoftuar klinikat se nuk do pranonin më rroba ose çarçafë, kështu që ata nuk ua sillnin më. Këtë mëngjes, në shenjë solidariteti, ata kanë dërguar një karrocë me çarçafë në klinikat kirurgjikale që të mund të kryhen ndërhyrjet. Por thanë se duke filluar nga nesër nuk do ta bëjnë më këtë.
“Lavatriçet nuk punojnë siç duhet. Punonjësit kanë filluar të lëndohen. Gjatë riparimit të njërës nga makinat një nga kolegët e theu gishtin. Kapaku i tharëses na godet në kokë, e ne nuk kemi sigurim shëndetësor. As pensional, as shëndetësor, as pagë. Pagën e fundit e kemi marrë në muajin janar. Do thuash, si durojmë?
Duruam sepse Skopster ka një projekt që duhet të fillojë të punojë me sterilizimin e instrumenteve. Dhe menduam se kur të ketë para nga ai projekt, atëherë do fillojnë të na i japin edhe pagat tona. Por meqenëse sterilizimi është i bllokuar, nuk ka as paga. Shërbimet e Përbashkëta herë na japin e herë nuk na japin, na harrojnë. Jemi të detyruar të veprojmë kështu.
Na u desh të hidhemi në grevë që ta zgjidhim këtë problem një herë e përgjithmonë dhe në plan afatgjatë. Kjo gjë nuk durohet. Le të na japin para, dhe ne do të punojmë, jemi punëtorë. Nëse kemi një kontratë që punojmë këtu, asgjë nuk na paguhet, as paga e as kontribute, ne në fakt po punojmë ilegalisht”, tha një nga punonjësit.
Lavanderia në Qendrën Klinike “Nënë Tereza” është në një gjendje të turpshme dhe të rrënuar. Ajo i shërben klinikat interne, klinikave kirurgjikale, sallat e operacioneve, pra të gjithë Qendrën Klinike.
“Një ditë, dy, ndoshta do të mund të kryejnë operacione pa ne. Por jo për shumë kohë. Ministri duhet ta zgjidhë këtë punë, Shërbimet e Përbashkëta duhet ta zgjidhin këtë punë. Ne këtu jemi si të harruar. Nuk jemi shumë, jemi 11 persona. Askush nuk kujdeset për ne. “Skopster”-i nuk mund të na japë paga sepse nuk ka nga ku të marrë para. Kemi shpenzime për detergjente, për rripa që i blejmë për një ose dy ditë dhe që kushtojnë 1.000 denarë. Kemi shpenzime për naftë për ta mbushur kamionetën për shpërndarjen e çarçafëve. I duam të gjitha pagat dhe të kemi sigurim shëndetësor, duam një zgjidhje të përhershme për ne”, tha një punonjëse tjetër.
Nga kompania “Skopster“ për “Slloboden Peçat “ thonë se lavanderia në kuadër të Qendrës Klinike “Nënë Tereza“ në Shkup në të ardhmen duhet të jetë në kuadër të partneritetit publik privat për menaxhim të integruar me zgjidhjet inovative për ndërhyrje kirurgjikale dhe mbrojtje shëndetësore nga infeksionet spitalore, gjegjësisht të rritet në një qendër të dytë për sterilizim. Ndërkohë, “Skopster” menaxhon me lavanderinë që nga muaji janar i vitit 2024 mbi bazë të një vendimi qeveritar, por ata nuk mund të fillojnë me rinovimin sepse as Qeveria dhe as Ministria e Shëndetësisë nuk po e fillojnë projektin e sterilizimit, edhe pse “Skopster” ka një projekt për rinovimin e lavanderisë. Përveç kësaj ata ankohen se Shërbimet e Përbashkëta nuk i paguajnë në kohë dhe u detyrohen 175 mijë euro për të cilat u janë dërguar faturat.
“Konkretisht, ne morëm përsipër ta menaxhojmë lavanderinë në gjendjen e saj aktuale, siç ka qenë për më shumë se 50 vjet (me pajisje të vjetruara) dhe me të gjithë punonjësit, për çka për funksionimin e rregullt Shërbimi për Punët e Përgjithshme dhe të Përbashkëta duhet të na paguajë kompensim – gjë që po bëhet me vonesë të madhe. Sa i përket problemit aktual me pagesën e pagave të prapambetura në lavanderinë në Qendrën Klinike “Nënë Tereza”, ju informojmë se jemi në komunikim të vazhdueshëm me Ministrinë e Shëndetësisë si shfrytëzues i këtij shërbimi. Dhe bashkërisht kërkojmë një zgjidhje – si ta parandalojmë ngecjen në punën e lavanderisë. Domethënë, si operatorë të lavanderisë, përveç pagave, ne kryejmë edhe një sërë aktivitetesh tekniko-operative (furnizim me lëndë të para, mirëmbajtje për funksionim dhe menaxhim të pandërprerë), të cilat janë gjithashtu një shpenzim i konsiderueshëm. Në këtë drejtim ne kërkojmë nga ShPPP që t’i përmbushë rregullisht dhe plotësisht detyrimet e tij ndaj nesh, në mënyrë që ne të mund t’i përmbushim detyrimet tona ndaj punonjësve dhe të gjithë furnizuesve, thanë nga “Skopster“.
Nga atje thonë se i kuptojnë plotësisht problemet financiare të ShPPP-së, por disiplina financiare në një shoqëri me ekonomi tregu duhet doemos të respektohet.
“Në të kundërtën ne si kompani private përballemi me sfidën që edhe më tej të duhet të kërkojmë fonde nga burime të tjera për financim, që do të thotë edhe shpenzime shtesë financiare. Deri më sot, ShPPP, bazuar në faturat e lëshuara, na detyrohet 10.802.752 denarë ose pak më shumë se 175.000 euro, konkretisht për fatura për shërbime të kryera plotësisht për 6 muaj: 12.2024; 01.2025; 02.2025; 03.2025; 06.2025 dhe 07.2025”, shtojnë nga “Skopster”.
Drejtori i Shërbimit të Punëve të Përgjithshme dhe të Përbashkëta Bashkim Bakiu dje tha se do të kërkonte nga Inspektorati i Punës të hyjë në lavanderi dhe për “Slloboden Peçat” tha se deri më tani kompanisë ”Skopster” i ka paguar para të mjaftueshme për të ndarë paga për dy vjet. Ai na dërgoi edhe një foto të kontratës që Shërbimet e Përbashkëta e kanë me “Skopster”-in sipas së cilës “pala tjetër është e detyruar të sigurojë realizimin e vazhdueshëm të shërbimeve edhe në kushte fatkeqësish natyrore, në kushte të jashtëzakonshme dhe në kushte greve të punonjësve të angazhuar prej saj”.
Punonjësit e lavanderisë që vizituam sot i dërguan një mesazh Ministrisë së Shëndetësisë dhe Qeverisë – që të gjejnë urgjentisht një zgjidhje që të drejtat e tyre si punonjës të mos keqpërdoren më. Ata thanë se nuk do ta ndërpresin grevën dhe nëse pushohen nga puna do të nxjerrin në dritë gjithçka që kanë duruar gjatë 20 viteve të fundit në të njëjtin vend pune ku janë ndryshuar shumë menaxherë , ndërsa të drejtat e tyre kanë mbetur në harresë.
Sport3 years ago
Lajme2 years ago
Lajme8 years ago
Gosip1 year ago
Gosip1 year ago
Teknologji1 year ago
Gosip2 years ago
Gosip2 years ago