VLEN avancon fjalorin – Oponentët i quan medje të sëmura. Koalicioni VLEN reagoi ndaj kritikave të Bashkimit Demokratik për Integrim (BDI) ndaj ministrit të Shëndetësisë, dr. Azir Aliu, duke e quajtur reagimin e tyre “hipokrizi më e madhe” nga një parti që sipas VLEN, për mbi dy dekada ka shkatërruar sistemin shëndetësor, veçanërisht Spitalin e Tetovës.

“Nëse sot kemi nevojë për një Qendër Klinike moderne në Tetovë, kjo është pikërisht për shkak të neglizhencës dhe dështimit të BDI-së, e cila 20 vite ka marrë pushtetin me votat e qytetarëve dhe ka kthyer vetëm zhgënjim,” – thuhet në reagimin e koalicionit VLEN.

VLEN vlerësoi gjithashtu mandatet e Arben Taravarit si ministër të Shëndetësisë, duke theksuar se gjatë një viti nuk u realizua asnjë projekt madhor dhe mbetën vetëm skandale, përfshirë tenderët e dyshimtë dhe abuzimet me licencat për kanabisin mjekësor.

“Ndryshe nga ata, Qeveria ku bën pjesë VLEN ka marrë vendim historik: mbi 70 milionë euro do të investohen në ndërtimin e Qendrës Klinike më moderne në rajon, në Tetovë, një investim që do t’i shërbejë jo vetëm qytetarëve të Pollogut, por gjithë Maqedonisë së Veriut. Po ashtu, po modernizojmë pajisjet, po përmirësojmë kushtet dhe po hapim vende pune për profesionistët e mjekësisë,” – shtoi reagimi.

VLEN përfundon me mesazhin se qytetarët e dinë kush ka shkatërruar shëndetësinë dhe kush po punon për ta rikuperuar atë:

“Ne do ta kurojmë shëndetësinë, por asnjëherë mendjen e prishur të BDI-së dhe Taravarit.” /Flaka Media/

Përmes një postimi në Facebook, kryetari i BDI-së, Ali Ahmeti, ka kujtuar figurën e Arben Xhaferit në 13-vjetorin e vdekjes së tij informon Tetovasot.

“Edhe pse kanë kaluar 13 vjet nga ndarja e tij nga jeta, mungesa e Arbën Xhaferit ndjehet njësoj. Gjatë luftës së vitit 2001, kur kombi kishte nevojë për unitet, ai ishte aty për të bashkërenduar veprimet tona. As pas luftës, takimet dhe bashkëpunimi ynë nuk u ndalën,” shkroi Ahmeti.

Ai kujtoi se Xhaferi shpesh i thoshte: “Më konsidero si vëlla të madh”, duke e përshkruar atë si një mik të urtë, një mendje të kthjellët dhe një patriot që e donte kombin mbi gjithçka.

“I përjetshëm kujtimi për Arbën Xhaferin!”, përfundoi Ahmeti.

Sekretari organizativ i Aleancës për Shqiptarët, Gadaf Uzairi, ka reaguar ndaj deklaratave të ministrit të Shëndetësisë, Azir Aliu, dhe kryetarit të Komunës së Tetovës, Bilall Kasami, lidhur me premtimin për një investim prej 70 milionë eurosh në Spitalin e Tetovës.

Në një postim në rrjetet sociale, Uzairi i ka cilësuar këto zotime si “premtime boshe” të bërë për qëllime elektorale, duke kujtuar se pak javë më parë i njëjti ministër kishte dhënë një premtim tjetër që nuk u realizua.

Postimi i plotë i Uzairit:

“Perla e radhës nga “fabrika e premtimeve”
Azir Aliu dhe Bilall Kasami zbarkuan në Tetovë për të premtuar 70 milionë euro investim në Spitalin e Tetovës.

Të dashur qytetarë dhe ju heronjtë e Spitalit të Tetovës, mos harroni: vetëm pak javë më parë i njëjti ministër ju tha “do merrni vendim dhe pikë”. Pikën e morët… vendimin jo! Dhe këtë herë as nuk ju pa në sy, sepse e di që nuk mbajti fjalën.
Por ja ku kthehet tani jo me vendime, por me miliona… në letër.
E për ta bërë “filmin” më interesant, në skenë hyn edhe Bilall Kasami, që bën figurantin e premtimeve të rreme.
E dimë, është fushatë zgjedhore… por të paktën, kur të gënjeni, mos e bëni aq trashë sa të ofendoni inteligjencën e qytetarëve.
Sepse dinjiteti i mjekëve, infermierëve dhe gjithë stafit të Spitalit të Tetovës nuk blihet me premtime boshe”, ka përfunduar Uzairi.