Bekim Berisha, përfaqësues i Aleancës Kombëtare për Integrim, ka mbajtur sot një konferencë për shtyp ku ka kritikuar ashpër Izet Mexhitin dhe trashëgiminë e tij politike në Komunën e Çairit, duke e cilësuar si “20 vite pushtet me 0 rezultate”. Berisha u bëri thirrje qytetarëve të Çairit që të mos bien pre e fushatës së Mexhitit. “Ai ka qenë në pushtet 20 vite: tre mandate kryetar komune dhe dy të tjera ushtar i tij më i besuar. Rrugët janë ende të shkatërruara, plehrat ende mbysin lagjet, parkingjet mungojnë, ndërsa planifikimi urban është në kaos. Sot ai vjen e flet për të ardhmen, por kjo është pasqyra e punës së tij deri dje”, tha Berisha.

Përfaqësuesi i AKI-së e akuzoi Mexhitin se po mashtron qytetarët me projekte për të cilat komuna nuk ka kompetencë. “Kemi parë Izet Mexhitin të premtojë ndërtimin e klinikave, xhamive dhe projekte që nuk janë nën juridiksionin e komunës. Kjo nuk është fushatë – kjo është mashtrim elektoral”,– deklaroi ai.

Sipas Berishës, Mexhiti është personi që ka caktuar drejtorët, administratorët dhe politikat që kanë çuar Çairin në gjendjen e sotme. “Ai ka qenë në pushtet më shumë se kushdo tjetër. Ka pasur mundësinë të ndryshojë gjërat, por nuk bëri asgjë për 20 vite. Sot thotë se duhet ndryshim – por nga kush kërkon ndryshim? Nga vetja e tij?”, pyeti ai. Berisha akuzoi Mexhitin se është distancuar nga problemet reale të komunës.

“Iku nga Çairi në Butel dhe nuk ka ardhur asnjëherë të flasë me qytetarët për çerdhet pa vende, për mbeturinat nëpër lagje, për mungesën e ndriçimit publik. Por tani, katër javë para zgjedhjeve, kujtohet për Çairin. Ky nuk është shërbim ndaj qytetarëve – kjo është fushatë për pushtet personal”, – tha ai.

Në fund, Berisha u bëri thirrje qytetarëve që më 19 tetor t’i thonë “mjaft” premtimeve boshe dhe të zgjedhin një udhëheqje që punon për ta. “Nëse doni të dini si qeveris Izet Mexhiti, shikoni Çairin e sotëm: rrugë të bllokuara, mungesë parqeve, mungesë parkingjesh dhe mungesë transparence. Më 19 tetor ta ndalojmë rrënimin e mëtejshëm të Çairit dhe ta kthejmë në një komunë ku planifikohet, investohet dhe punohet për qytetarin”, përfundoi Berisha.

Kandidati për kryetar komune të Tetovës, Bajram Rexhepi përmes një press konference para kompanisë Saubermacher ka akuauzar komunën se me dhënien në koncesion të NPK-së po zhvatin qytetarët dhe po dëmtojnë buxhetin e komunës, shkruan Top24

Sot jam përpara jush për të shpalosur një nga skandalet më të mëdha me paratë publike në Tetovë – kontratën 15-vjeçare me kompaninë private Saubermacher, të nënshkruar më 29 dhjetor 2022 nga kryetari aktual.

Kjo kontratë është përplot me dispozita të dëmshme për Tetovën dhe tetovarët:

Në kontratën e nënshkruar me Saubermacher, afati i marrëveshjes është vendosur për plot 15 vjet. Kjo do të thotë se qyteti mbetet peng i një operatori të vetëm, pa asnjë mundësi rivlerësimi apo korrigjimi të kushteve gjatë gjithë kësaj periudhe.

Për më tepër, pasuria publike e qytetit, 16 kamionë, 2 ekskavatorë dhe pajisje të tjera me vlerë mbi 590,000 € – iu dhanë kompanisë private me qira për vetëm 1,600 € në muaj. Një çmim qesharak krahasuar me vlerën reale të këtyre mjeteve.

Edhe më skandaloze është klauzola e koncesionit: komuna merr vetëm 1% të faturimit mujor. Në terma të thjeshtë, kjo do të thotë se nëse qytetarët e Tetovës paguajnë 1,000,000 euro fatura, vetëm 10,000 euro shkojnë në arkën e komunës, ndërsa 990,000 euro përfundojnë në xhepat e koncesionerit privat.

Dhe për ta përmbyllur, me vendim të menaxhmentit komunal, qytetarët sot paguajnë për mbeturinat në bazë të hapësirës të banesave dhe shtëpive, e jo sipas metodologjisë për kokë banori. Kjo ka bërë që shumë familje të ngarkohen me fatura 2 deri në 3 herë më të larta, pa marrë në këmbim shërbime më cilësore.

Si rezultat i kësaj kontrate sot mbi 10.000 familje tetovare janë në procedura përmbarimi. Çdo familje është ngarkuar mesatarisht me mbi 30 euro për shpenzime të avokatëve dhe noterëve, që do të thotë se mbi 300.000 euro po zhvaten nga buxheti i çdo familjeje.

Të dashur qytetarë,

Tetova nuk shitet e as blihet. Më 19 tetor i japim fund kësaj praktike të shfrytëzimit të qytetarëve dhe i japim fund çdo kontrate që dëmton interesin publik.

Kjo kontratë do të shfuqizohet. Gjithashtu do ta ndryshojmë metodologjinë e faturimit. Qytetarët nuk do të paguajnë më sipas sipërfaqes së banesave apo shtëpive të tyre, por për kokë banori në amvisëri, në mënyrë të drejtë dhe transparente.

Është e patolerueshme që paratë e taksapaguesve tetovarë të përfundojnë në xhepa privat. Koha e politikave të papërgjegjshme po merr fund.

Tetova dhe tetovarët do të paguajnë më pak, do të marrin shërbime më të mira, dhe paratë publike do të kthehen aty ku e kanë vendin, për Tetovën dhe për tetovarët.

Ju falemnderit!

Ambasadori i Shqipërisë në Maqedoninë e Veriut, Denion Meidani, ka pritur në një takim të veçantë prof. dr. Avzi Mustafën, një nga figurat më të shquara të arsimit shqiptar dhe mendimit pedagogjik në vend. Në takim ishte i pranishëm edhe Konsulli i Nderit i Shqipërisë, z. Imer Selmani.

“Pata kënaqësinë të pres në Ambasadë prof. dr. Avzi Mustafën, një figurë e shquar e arsimit shqiptar dhe mendimit pedagogjik në Maqedoninë e Veriut dhe një mik i rregullt i Ambasadës sonë,” tha ambasadori Meidani.

Gjatë bashkëbisedimit, prof. Mustafa ndau reflektime mbi zhvillimin e arsimit shqip, avancimin e përdorimit të gjuhës shqipe në jetën publike, si dhe përpjekjet historike për unifikimin e Abetares shqipe.

“Me një kontribut të jashtëzakonshëm në edukimin e brezave dhe në promovimin e trashëgimisë sonë gjuhësore, prof. Mustafa do të jetë një zë i çmuar në organizimin e aktiviteteve përkujtimore për Kongresin e Manastirit,” theksoi ambasadori Meidani.

Ky takim u vlerësua si një hap i rëndësishëm drejt forcimit të bashkëpunimit në fushën e arsimit dhe kulturës mes Shqipërisë dhe shqiptarëve në Maqedoninë e Veriut.