Publicistja Nafie Selmani ka komentuar zërat e fundit për një distancim të Kryeministrit të Kosovës dhe njëkohësisht Kryetarit të Vetëvendosjes, Albin Kurti, nga koalicioni VLEN në Maqedoninë e Veriut. Ajo thekson se ky zhvillim është i pritshëm, duke u bazuar në logjikën e ngjarjeve dhe në profilin politik të Kurtit.

“Sikur kam thënë edhe më herët, karta e VLEN-it se Vetëvendosja është në VLEN tashmë është djegur përfundimisht”, deklaron Selmani.

Ajo rendit disa arsye pse Kurti mund të jetë duke u distancuar nga VLEN:

Inferioriteti i VLEN-it në Qeveri – “Kurti e ka parë se VLEN-i në ekzekutiv ka një pozicion tërësisht inferior e nënshtrues, gjë e cila bie ndesh me profilin e tij politik, i cili është ndërtuar mbi parimin e barazisë dhe dinjitetit kombëtar.”
Shkelja e të drejtave të shqiptarëve – “Ai është i informuar se shqiptarëve në Maqedoninë e Veriut po u hiqen e po u mohohen shumë të drejta, dhe kjo është në kundërshtim të hapur me gjithë luftën e kahmotshme të Kurtit në rrafshin kombëtar.”
Degjenerimi i projektit ‘NDRYSHIMI’ – “Fillimisht VLEN-i e paraqiti veten si një projekt për NDRYSHIM, por realiteti tregoi se ky ‘ndryshim’ rrëshqiti keq në një zëvendësim të së vjetrës me të njëjtën mendësi, të njëjtat praktika dhe me të njëjtët aktorë. Lufta kundër korrupsionit, nepotizmit dhe kapjes së shtetit u harrua.”
Hapja e dyerve për projektet serbe – “Kurti e di se projektet serbe me dy duar e këmbë po futen në Maqedoni, ndërsa VLEN-i jo vetëm që nuk po i kundërshton, por në mënyrë të heshtur po i pranon e madje në një mënyrë po i legjitimon.”
Në këtë kontekst, Selmani thekson se distancimi i Kurtit nga VLEN-i nuk është befasi:

“Distancimi i Albin Kurtit nga VLEN-i nuk është veprim i papritur, por reflektim dhe lëvizje e natyrshme politike dhe kombëtare. Ai nuk mund të rrezikojë reputacionin e tij, e aq më pak vizionin për çështjen kombëtare, duke u identifikuar me një strukturë që po shndërrohet në vegël të nënshtrimit.”

Ajo përfundon se, nëse ky trend vazhdon, “nuk është Albin Kurti ai që po largohet nga VLEN, por është vetë VLEN-i që po e largon veten nga shqiptarët dhe nga ideali i ndryshimit që e premtoi por nuk e realizoi. Këtë faturë ata do ta paguajnë në kutitë e votimit.”

Një strukturë financimi prej 400 milionë eurosh u formalizua për Palestinën gjatë një ceremonie nënshkrimi në New York të mërkurën, e mbajtur së bashku me Asamblenë e Përgjithshme të OKB-së.

Plani është pjesë e një strukture të përgjithshme prej 1.6 miliardë eurosh të BE-së gjatë periudhës 2025-2027.

Komisionerja Evropiane për Mesdheun Dubravka Suica dhe zëvendëspresidenti i BEI-së Ambroise Fayolle nënshkruan marrëveshjen, së bashku me ambasadorin palestinez në OKB Riyad Mansour.

Suica tha se BE dëshiron “ta bëjë ekonominë palestineze të gjallë” dhe të stimulojë sektorin privat, duke krijuar mundësi për të krijuar ndërmarrje të vogla dhe të mesme.

Ndryshe, BE-ja është ofruesi i parë i ndihmës për palestinezët, shkruan euronews.

Suica reagoi ndaj njohjes së fundit të Palestinës nga shumë vende, përfshirë Australinë, Kanadanë, Francën, Portugalinë dhe Mbretërinë e Bashkuar, duke thënë se kjo do të rriste presionin mbi të tjerët që ta ndjekin.

“Mendoj se ka një presion të madh. Në një moment, hap pas hapi, të gjitha vendet do të jenë të vetëdijshme se e vetmja zgjidhje është një zgjidhje me dy shtete”, tha ajo.

Në Bregun Perëndimor dhe Jerusalemin Lindor, organizatat e financuara nga BE-ja që ofrojnë një gamë të gjerë mbështetjeje për palestinezët, kanë raportuar vazhdimisht se Izraeli, dhe veçanërisht kolonët izraelitë, pengojnë përdorimin dhe zbatimin efektiv të këtyre programeve të ndihmës së BE-së.

Komisionerja tha se është e rëndësishme që BE-ja të “angazhohet me autoritetet izraelite” dhe si palestinezët ashtu edhe izraelitët duhet të gjejnë gjuhë të përbashkët se si ta zgjidhin konfliktin.

Komuna e Butelit mund të bëhet komuna e dytë urbane në Shkup që do të drejtohet nga një kryetar shqiptar. Sipas të dhënave zyrtare nga Komisioni Shtetëror Zgjedhor, shqiptarët në Butel përbëjnë 50.32% të elektoratit, ndërsa 49.60% i takon komuniteteve të tjera, kryesisht maqedonas. Ky ekuilibër e bën çdo votë vendimtare, sidomos nëse dalja e shqiptarëve në zgjedhje do të jetë maksimale, shkruan gazeta KOHA. Në garën e 19 tetorit për kryetar të komunës, prof. Isamedin Azizi nga Aleanca Kombëtare për Integrim është i vetmi kandidat shqiptar. Ai do të përballet me kryetarin aktual të komunës, Darko Kostovski nga VMRO-DPMNE dhe me kandidaten e LSDM-së, Olivera Livriniq.
Ky konfigurim e bën garën më të thjeshtë për elektoratin shqiptar, pasi nuk ka fragmentim mes disa kandidatëve, siç ndodhte në të kaluarën.

Një element i rëndësishëm i këtyre zgjedhjeve është fakti që kandidatura e përfaqësuesit të VLEN-it, Behar Emini, u refuzua nga Komisioni Shtetëror i Zgjedhjeve për shkak të problemeve me adresën e banimit – Emini jeton në Çair, ndërsa kishte kandiduar për Butel. Megjithëse kjo situatë ka krijuar një rast unik me vetëm një kandidat shqiptar në garë, VLEN deri më tani nuk ka bërë thirrje publike për mbështetje të kandidatit të Isamedin Azizit si kandidat i vetëm shqiptar. Në Aleancën Kombëtare për Integrim shprehen optimistë se, nëse dalja e votuesve shqiptarë është e lartë, Buteli mund të ketë për herë të parë një kryetar shqiptar.

Thonë se sytë e gjithëve shqiptarëve janë të fokusuara edhe në Butel edhe në Çashkë. “Në Çashkë ju e dini se me regjistrimin e fundit të popullsisë, shqiptarët janë mbi 50 për qind, edhe në Butel jemi shumë afër për të marrë qeverisjen e pushtetit lokal, prandaj këto zgjedhje janë tejet të rëndësishme, janë një test i veçantë për të parë nëse shqiptarët – që të gjithë, edhe ata të VLEN-it, janë forcë progresive europiane, për të bërë dallimin, ndryshimin, që këtë vit Butelin ta qeveris një kandidat mbipartiak shqiptar që kujdeset për të gjithë qytetarët e lagjet njësojë”, thonë në AKI.

Ndryshe, në zgjedhjet e vitit 2021, në Butel kishte 33.140 qytetarë me të drejtë vote, megjithatë kishin votuar rreth 16.000. Në rrethin e dytë, Darko Kostovski i VMRO-së kishte fituar 9012 vota, ndërsa Velimir Smilevski i LSDM-së 6831 vota. Mbi 700 vota shqiptare kishin shkuar në konton e Kostovskit të VMRO-së. Tani që LSDM është dobësuar dukshëm, kandidati i AKI-së përveçse kalon në balotazh, gjasat për ta fituar Komunën në favor të tij nëse kemi një mobilizim të madh të votuesit shqiptarë./Koha.mk/