Japonia numëron tashmë gati 100.000 qytetarë që kanë mbushur 100 vjeç apo më shumë, sipas të dhënave të publikuara nga qeveria japoneze.

Shifra, e cila shënon një rekord historik, reflekton qartë plakjen e popullsisë në vendin me ekonominë e katërt më të madhe në botë, në një kohë kur numri i banorëve po bie

Më konkretisht, deri më 1 shtator, në Japoni ishin regjistruar 99.763 qindvjeçarë, ose 4.644 më shumë krahasuar me vitin e kaluar. Prej tyre, 88% janë gra, sipas Ministrisë së Shëndetësisë të Japonisë.

Personi më i moshuar në arkipelag është Shigeko Kagawa, 114 vjeç, e cila jeton në prefekturën Nara, afër Kiotos. Ajo ka mbetur aktive edhe pas 80 viteve pune si gjinekologe, mami dhe mjeke e përgjithshme, sipas autoriteteve.

“Fakti që ecja shumë gjatë vizitave në shtëpitë e pacientëve më ka ndihmuar të kem këmbë të forta, ato janë burimi i energjisë sime sot”, deklaron Kagawa. Me shikimin ende të mirë, ajo kalon ditët duke parë televizor, lexuar gazetën dhe duke bërë kaligrafi.

Ndërkohë, personi më i moshuar në botë aktualisht është britanikja Ethel Caterham, e cila festoi 116-vjetorin në muajin gusht, pak muaj pas ndarjes nga jeta të Ina Canabarro Lucas nga Brazili, gjithashtu 116 vjeç

Pavarësisht jetëgjatësisë së lartë, Japonia po përballet me një krizë demografike gjithnjë e më të thellë. Rritja e numrit të të moshuarve po sjell një rritje të madhe të shpenzimeve shëndetësore dhe sociale, ndërkohë që fuqia punëtore po zvogëlohet, pasi lindshmëria mbetet e ulët.

Sipas të dhënave zyrtare të publikuara në gusht, popullsia japoneze u tkurr me mbi 900 mijë persona vetëm gjatë vitit 2024, një rekord negativ.

Kryeministri Shigeru Ishiba, i cili ndodhet aktualisht në proces dorëheqjeje, e kishte përshkruar situatën si një “murtajë e heshtur”, dhe kishte premtuar masa mbështetëse për familjet, përfshirë orare më fleksibël pune dhe shërbime falas për kujdesin ndaj fëmijëve, për të ndalur rënien e lindshmërisë.

Megjithatë, përpjekjet e deritanishme nuk kanë dhënë ende rezultate të prekshme.

Asambleja e Përgjithshme e Kombeve të Bashkuara miratoi sot një rezolutë historike që mbështet krijimin e një shteti të pavarur palestinez dhe zbatimin e zgjidhjes me dy shtete, duke përjashtuar Hamasin nga pjesëmarrja politike.

Rezoluta mori mbështetjen e 142 vendeve, me 10 vota kundër dhe 12 abstenime. Kundër ishin Izraeli, SHBA-ja, Tonga, Palau, Nauru, Papua Guinea e Re, Paraguai, Mikronezia, Hungaria dhe Argjentina.

Palestina e përshëndeti vendimin, duke e cilësuar atë si një arritje kyçe të Konferencës Ndërkombëtare të Nivelit të Lartë për Çështjen Palestineze, të bashkëkryesuar nga Arabia Saudite dhe Franca. Ministria e Jashtme Palestineze falenderoi këto vende për përpjekjet në shndërrimin e deklaratës në një plan konkret veprimi me objektiva politike, ekonomike dhe sigurie.

Palestina bëri thirrje për zbatim të plotë të konkluzioneve të konferencës, duke kërkuar presion mbi Izraelin për të ndaluar agresionin, përdorimin e urisë si armë, zhvendosjen me forcë dhe për lirimin e të burgosurve.

Sot, rreth tre të katërtat e 193 anëtarëve të OKB-së e njohin Palestinën si shtet të pavarur, ndërsa vendet e tjera, përfshirë Francën, pritet të njoftojnë njohjen e tyre gjatë Asamblesë së Përgjithshme më 22 shtator.

Niko Peleshi është zgjedhur kryetar i Kuvendit të Shqipërisë.

Peleshi ishte sugjerimi i Edi Ramës për të marrë këtë detyrë.

Propozimi u hodh në votim të fshehtë në seancën e sotme plenare, ku Peleshi mori 84 vota pro nga 87 deputetë që morën pjesë në votim.

Opozita që ishte kundër emrit të tij, bojkotoi votimin dhe në vend të fletës së votës, hodhi në kuti pankarta kundër qeverisë ‘Rama 4’.