Shkruan Rami Mislimi

Pas 25 vitesh më është rikthyer kujtimi i Sarajit si një ndër qendrat më të bukura në Shkup.

Si nxënës i shkollës fillore nga Strimnica, udhëtoja çdo të dielë drejt Sarajit, për t’u freskuar, për të shijuar, për t’u larë dhe për të përjetuar një copëz Perëndimi mes shqiptarëve në liqenin “Treska” në Saraj.

Në atë kohë nuk e dija se çfarë shije kishte deti. Nuk dalloja dot pishinën nga liqeni. Por e dija se vetëm Saraji ekzistonte për të kaluar të dielat me u knaq, me u lajë dhe mos me e harruar as sot, pas 25 vitesh.

Sot, përveç kujtimeve, më është rikthyer edhe shpresa e madhe se Liqeni i Treskës mund të kthehet në një nga qendrat më të bukura të rajonit, dhe Saraji të bëhet një komunë urbane, turistike dhe e vizituar nga qytetarët e Maqedonisë, Kosovës, Shqipërisë dhe vendeve të tjera të rajonit e më gjerë.

Sot duke ecur pranë liqenit të Treskës dhe duke parë bukuritë e Sarajit, e kam thirr njeriun që shpresojë fuqishëm për një ndryshim të hovshëm të Sarajit, Blerand Ramadanin.

Blerandi, përveç ëndrrës, dëshirës dhe vizionit për ta kthyer Sarajin në një komunë të fuqishme dhe turistike, kishte me vete edhe një krah dokumentesh, gati për ditën e tij të parë si kryetar i Sarajit. Ai është i vendosur që Liqenin e Treskës ta nxjerrë nga pluhuri i harresës dhe ta vendosë mbi tryezën e partnerëve vendorë e ndërkombëtarë për investime, që kjo qendër të shndërrohet në një nga më të bukurat e Shkupit.

Te Blerandi pashë guxim të madh, vullnet të jashtëzakonshëm, dëshirë të pashtershme dhe një vizion të qartë, që Saraji të ndryshojë, dhe Liqeni i Treskës të jetë në duart e njerëzve të zotë që do ta ndërtojnë dhe do ta shndërrojnë në një vend ku shqiptarët do të mblidhen për t’u argëtuar, për të kaluar të dielat, për të shëtitur, për t’u relaksuar dhe për të parë bukuritë që Zoti ia ka falë vetëm Sarajit.

Blerandi nuk fliste për parti, nuk fliste për ndarje, nuk merrej me ideologji politike. Ai kishte vetëm një “siklet”, ta bëjë SARAJIN qendrën e të gjithë shqiptarëve, një vend ku të bashkohen si vëllezër të gjithë, pa dallim partie apo bindjeje politike.

Ai nuk njeh të majtë apo të djathtë, AKI apo VLEN, BDI – ASH, BESA e Alternativa apo edhe LD, për Blerandin kishte vetëm një emërues të përbashkët: Saraji i BASHKUAR.

Të gjithë së bashku, për një qëllim të përbashkët: Saraji të bëhet qendra më e bukur dhe më e madhe shqiptare në Maqedoni.

Së shpejti intervistë në TS:

“E ardhmja e Sarajit dhe shpresa për ndryshim me Blerand Ramadanin”

Kandidati aktual për kryetar të Çairit dhe ish-ministër i punëve të jashtme, Bujar Osmani, këtë mëngjes me një video-mesazh, qytetarëve të Republikës së Maqedonisë së Veriut ua uroi 8 Shtatorin, Ditën e Pavarësisë.

Në mesazhin e tij, Osmani kujtoi vizionin, guximin dhe këmbënguljen e gjeneratave që hapën rrugën drejt një shteti të pavarur dhe të lirë, duke theksuar se gjenerata e sotme ka detyrimin ta vazhdojë këtë betejë me vendosmëri edhe më të madhe.

“Shteti ynë ka kaluar shumë sprova, por gjithmonë kur e ardhmja dukej e pasigurt, qytetarët zgjodhën dinjitet, demokraci dhe të ardhme evropiane”, tha Osmani.

Ai theksoi se në këto momente historike, vendit i duhet më shumë se kurrë unitet, drejtim i qartë dhe vendosmëri politike.

“Kjo nuk është kohë për ndarje, kjo është kohë për bashkim dhe ndërtim urash. Rruga jonë është Evropa dhe ky është hapi i fundit që do të na garantojë një shtet të sigurt, të zhvilluar dhe prosperues”.

Osmani kujtoi se si diplomat dhe politikan ka qenë pjesë e proceseve kyçe të integrimit euroatlantik, por mbi të gjitha si njeri që beson në një të ardhme të përbashkët.

“Në këtë ditë të japim besë: nuk do të lejojmë askënd të na kthejë prapa. Do të ecim përpara, me krenari, me arsye dhe me vullnet, për një shtet më të mirë për gjithë qytetarët”, tha Osmani në mesazhin e tij.

Në fund, ai ua uroi festën gjithë qytetarëve me një mesazh të fuqishëm për unitet, shpresë dhe përkushtim ndaj së ardhmes evropiane.

Albanian Post ka arritur të sigurojë letrën që Meidani u pati dërguar delegatëve shqiptarë të Kosovës në Rambuje, me detajet tepër largpamëse për kohën.

Në ditët vendimtare të Konferencës së Rambujesë, ish-presidenti i Shqipërisë, Rexhep Meidani, u është drejtuar me një letër delegacionit shqiptar, ku i përgëzonte për kohezionin dhe profesionalizmin e treguar gjatë bisedimeve.

Ai theksonte në ato çaste të vështira se vendimmarrja e tyre kishte rritur më tej besimin e shqiptarëve, duke nënvizuar se shumica dërrmuese e popullit i mbështeste dhe i mirëkuptonte qëndrimet e tyre.

Meidani vinte në dukje dallimin mes një marrëveshjeje kalimtare dhe aspiratave të ligjshme të popullit të Kosovës, duke e quajtur ate moment “historik” për fatin e çështjes shqiptare.

Në të njëjtën kohë, presidenti shqiptar i atyre ditëve rikujtonte se prania e forcave të NATO-s në Kosovë mbetej themelore për garantimin e çdo zgjidhjeje të ardhshme, ndërsa referendumi i mëparshëm i popullit kosovar shihej në sytë e Meidanit si shprehja më e qartë e vullnetit të tij politik.

Albanian Post ka arritur të sigurojë letrën që Meidani u pati dërguar delegatëve shqiptarë të Kosovës në Rambuje, me detajet tepër largpamëse për kohën.

Letra e plotë:
Delegacionit shqiptar në Rambuje

Të dashur vëllezër,

Kam qenë pranë jush gjithë këto ditë. Kam ndjekur nga afër veprimtarinë tuaj shumë të përgjegjshme në Konferencën e Rambujesë. Mund t’ju them se, ashtu si gjithë shqiptarët, jam entuziazmuar me kohezionin dhe profesionalizmin që keni treguar për të arritur maksimumin e mundshëm për një zgjidhje, e cila vazhdimisht është projektuar si kalimtare dhe që ne nuk do të duhej ta sakrifikonim. Niveli i lartë dhe përgjegjshmëria juaj e ka rritur më tej besimin e shqiptarëve në vendimet që do të nënshkruani. Jam i bindur se shumica dërrmuese e shqiptarëve ju mbështesin dhe ju mirëkuptojnë për qëndrimet që po mbani dhe do të mbani.

E kuptojmë diferencën që ekziston midis prerogativave të një marrëveshjeje kalimtare dhe aspiratave të ligjshme të popullit të Kosovës, të cilin ju e përfaqësoni denjësisht në Rambuje. E kuptojmë barrën e madhe që keni marrë mbi supe; i kuptojmë të gjitha vështirësitë tuaja, por kemi besim të plotë se do t’ia dilni mbanë me mençuri dhe kthjelltësi.

Të gjithë së bashku kuptojmë gjithashtu rëndësinë e këtij momenti historik për çështjen e Kosovës dhe për çështjen shqiptare.

Për çështjen e Kosovës, po aq e rëndësishme sa qëndresa burrërore e shqiptarëve, është mbështetja ndërkombëtare dhe sigurimi i vazhdimësisë së kësaj mbështetjeje deri në zgjidhjen përfundimtare të saj. Prania e forcave të NATO-s në Kosovë ka qenë dhe mbetet elementi themelor i gjithë qëndrimeve tona. Kjo prani na siguron për ecurinë e mbarë të të gjitha opsioneve të mëtejshme për Kosovën, të cilat do të finalizohen, sipas deklaratës së Sekretares Amerikane të Shtetit, Madeleine Albright, me një mbledhje ndërkombëtare për Kosovën, baza e së cilës do të jetë vullneti i shprehur i popullit shqiptar, opinioni i autoriteteve me peshë, përpjekjet e çdo pale lidhur me implementimin e kësaj marrëveshjeje dhe Akti Final i Helsinkit.

Jam i bindur se një platformë e tillë e çon çështjen tonë drejt zgjidhjes që dëshirojmë dhe për të cilën janë bërë dhe po bëhen sakrifica të mëdha. Populli shqiptar i Kosovës e ka thënë qartë fjalën e vet në Referendumin e mëparshëm.

Mbështetja ndërkombëtare, e shoqëruar me kohezionin e faktorëve shqiptarë në Kosovë, janë elementët bazë për të ecur hap pas hapi drejt zgjidhjes që populli kosovar tashmë e ka artikuluar.

Shpresoj dhe besoj që të mos e humbasim këtë mbështetje të fuqishme ndërkombëtare.

Ju përshëndes përzemërsisht,

Juaji
Rexhep Meidani