Shoqata e Gazetarëve të Maqedonisë (SHGM) dhe Sindikata e Pavarur e Gazetarëve dhe Punonjësve të Medias (SPGPM) shprehin shqetësim serioz për shkak të sjelljes së pahijshme dhe joprofesionale ndaj gazetareve gjatë një ngjarjeje publike në Shkup, ku ishte i pranishëm ministri i Shëndetësisë, Azir Aliu, së bashku me personin përgjegjës për protokollin nga ministria.
Komunikimi i papërshtatshëm nga ana e punonjëses së ministrisë, e ngarkuar për protokollin, ka ndodhur pasi një grup gazetarësh e kanë lutur për deklarata, por nga ajo kanë marrë përgjigje se nuk mundet, ndërsa njërës nga gazetaret iu drejtua me fjalët: “Gazetare e paedukatë, arrogante dhe më e pacipë”.

Ne konsiderojmë se një sjellje e tillë është e papranueshme dhe e papërshtatshme dhe përbën një goditje serioze ndaj dinjitetit të gazetarëve, lirisë së shprehjes dhe të drejtës së publikut për t’u informuar. Mungesa e sanksioneve për incidente të tilla mund të krijojë rrezik për përsëritjen e sjelljeve të ngjashme nga ana e shërbyesve të tjerë publikë.

Njëkohësisht, e përshëndesim gjestin e solidaritetit të gazetarëve dhe punonjësve të tjerë të medias që kanë qenë të pranishëm aty dhe, të revoltuar nga sjellja e pahijshme, e kanë lënë ngjarjen në mënyrë kolegiale.

SHGM dhe SPGPM u bëjnë apel Ministrisë së Shëndetësisë që urgjentisht ta rishqyrtojë këtë rast dhe të sigurojë masa të duhura për sjellje profesionale të të gjithë shërbyesve publikë ndaj mediave. Kjo është me rëndësi thelbësore për mbrojtjen e të drejtës së gazetarëve për qasje në informata me interes publik dhe për ruajtjen e besimit në institucione.

Kandidati i Aleancës Kombëtare për Integrim për Komunën e Sarajit, Blerant Ramadani, ka zhvilluar takim me banorët e fshatit Gërçec, përcjell SmartNews

Ramadani theksoi rëndësinë e referendumit të 19 tetorit, duke e cilësuar si moment të shumëpritur nga banorët.

Postimi i plotë i Ramadanit:

“Në Gërçec, në vendlindjen e dëshmorit të kombit Halil Rekaliut, takuam qytetarët të cilët mezi e presin referendumin e 19 Tetorit!”, ka përfunduar Ramadani./SmartNews.mk/

Kandidati për kryetar të Komunës së Çairit dhe ish-ministri i Punëve të Jashtme, Bujar Osmani, sot është gjendur rastësisht në vendin e një aksidenti rrugor në Shkup, ku një motoçiklist ishte goditur nga një automjet.

Në një video të publikuar nga kalimtarë të rastit shihet se Osmani, bashkë me disa qytetarë të tjerë, i ka dhënë ndihmën e parë të aksidentuarit deri në mbërritjen e ekipit të Ndihmës së Shpejtë. Ai është përpjekur të ndihmojë në stabilizimin e gjendjes së tij derisa mjekët të merrnin situatën në dorë.

Incidenti ka ndodhur gjatë orëve të pasdites, në afërsi të një kryqëzimi të frekuentuar në kryeqytet. Ende nuk ka informata zyrtare për shkaqet e aksidentit dhe gjendjen shëndetësore të të lënduarit.

Gazetari Driton Zenku, duke komentuar ngjarjen, shkroi:

“Të jesh mjek do të thotë të jesh në detyrë 24 orë në ditë. Ka profesione që nuk njohin orar – si mjeku, polici, gazetari e të tjerë. Të gjitha profesionet kanë vlerë, por disa janë të shenjta. Sot këtë e dëshmoi edhe Bujar Osmani, i cili rastësisht duke kaluar në një nga rrugët e Shkupit, i dha ndihmën e parë një motoçiklisti të aksidentuar. Profesioni i vërtetë nuk hiqet as kur s’je në punë.”

Nga ekipi i Osmanit nuk është dhënë ndonjë reagim zyrtar. /Flaka/