Kryetari i PDE-së, Arjanit Hoxha, i cili nuk fitoi asgjë si pjesë e Frontit Europian, përmes një postimi ka ndarë llogon ere për të koalicionit për zgjedhjet lokale duke shënuar se 19 Tetori do të jetë dita kur shqiptarët flasin me një zë.

“19 Tetori do të jetë dita kur shqiptarët flasin me një zë.
Me Aleancën Kombëtare për Integrim (AKI) dhe PDE në kuadër të kësaj Besëlidhje, ne hyjmë të bashkuar për t’i dhënë fund një qeverie që nuk ka legjitimitet etnik.
Qeveria aktuale fokus të vetëm ka nënçmimin dhe përbuzjen ndaj shqiptarëve. Por sa më shumë ata përpiqen të na dobësojnë, aq më shumë ne bashkohemi.
Ne kemi një qëllim të qartë: të kthejmë dinjitetin e shqiptarëve, trajtimin si partnerë të barabartë në këtë shtet dhe ta çojmë vendin drejt Europës.
Asnjë qeveri nuk është më e fortë se uniteti ynë.
Na priftë e mbara!”

Në Ditën e Ushtrisë, 18 gusht, Kryeministri Hristijan Mickoski ka zgjedhur të publikojë një mesazh të fortë në rrjetet sociale, duke sfiduar hapur marrëdhëniet me Greqinë. Ai i referohet vendit vetëm si “Maqedoni”, duke injoruar emrin zyrtar “Maqedonia e Veriut” që buron nga Marrëveshja e Prespës duke provokuar kështu Athinën, shkruan PressOnline.al.

Në postimin e tij, Mickoski përkujton rëndësinë historike dhe simbolike të Ushtrisë si garant i sovranitetit dhe i pavarësisë së vendit: “Ushtria jonë sot qëndron krah për krah me aleatët në botë, por edhe fuqishëm mbi tokën tonë, çdo herë kur qytetarët janë në nevojë. Ajo është zemra e shtetit. Nëse kjo zemër rreh fuqishëm, edhe shteti është i fortë dhe i sigurt.”

Përdorimi i termit “Maqedoni” në këtë kontekst nuk është rastësi, por një provokim politik dhe diplomatik i qartë. Postimi i Mickoskit shndërrohet kështu në një deklaratë të fortë nacionaliste, që thekson krenarinë për Ushtrinë dhe simbolikën kombëtare, ndërsa sfidon marrëveshjet ndërkombëtare të vendit.

Ky hap mund të tensionojë edhe më tej marrëdhëniet me Greqinë, ndërsa brenda vendit shërben për të konsoliduar imazhin e kryeministrit si mbrojtës i sovranitetit dhe identitetit kombëtar. (PressOnline.al)

“Larg manipulimeve dhe lajmeve të rreme! Stadiumi po bëhet sipas dinamikës së parashikuar!” – kështu deklaroi kryetari i Tetovës, Bilall Kasami. Por realiteti në terren tregon të kundërtën: punimet në stadiumin e qytetit kanë ngecur prej kohësh informon Tetovasot.

Ky premtim i madh, i bërë disa herë nga Kasami, është shndërruar në temë të përsëritur të fushatave elektorale. Sa herë ka zgjedhje, stadiumi rikthehet si kartë politike, por përfundimi i tij ende mbetet i paarritur.

Stadiumi i Tetovës ka një rëndësi të veçantë, pasi aty pritet të luajë skuadra e Shkëndijës – klubi që bashkon gjithë shqiptarët dhe që ndeshjet ndërkombëtare është i detyruar t’i zhvillojë në kryeqytet. Për këtë arsye, projekti nuk është thjesht infrastrukturë sportive, por një simbol bashkimi dhe krenarie tetovare.

Megjithatë, Kasami, në vend që të marrë përgjegjësinë për ngecjet, shpeshherë i cilëson reagimet dhe kritikat si “manipulime”. Por qytetarët e Tetovës stadiumin nuk e shohin as në përdorim dhe as drejt përfundimit – për momentin ai ekziston vetëm në fjalët e kryetarit./TS/