VLEN erdhi në pushtet me premtime të mëdha për shqiptarët, por realiteti është krejt i kundërt. Nga premtimet e tyre të shumta, realizimi është zero, ndërsa i vetmi “rezultat” është degradimi i pozitës së shqiptarëve në shtet.

Një nga premtimet madhore ishte decentralizimi. VLEN premtonte më shumë buxhet dhe më shumë fuqi vendimmarrëse për komunat, zhvillim dhe barazi për qytetarët, modele evropiane të decentralizimit si Gjermania dhe Belgjika, si dhe komuna si nivel kryesor shtetëror për investime, administratë, rend civil dhe shërbime publike.

Por, çfarë ndodhi në realitet?

Qeveria VMRO-VLEN është duke përgatitur projektligj për pushtetin lokal më centralizues se kurrë më parë, duke i marrë kompetencat komunave, sikurse vendimi arbitrar për uljen e numrit të këshilltarëve komunal, që prek drejtpërdrejtë përfaqësimin e shqiptarëve, sidomos të mërgatës.Ky vendim u anulua nga Gjykata Kushtetuese, por qeveria dhe shumica parlamentare vazhdojnë ta injorojnë vendimin dhe të mbajnë në fuqi një diskriminim flagrant ndaj shqiptarëve.

Kjo është prova më e qartë se VLEN nuk punon për interesat e shqiptarëve, por vetëm për interesa të ngushta pushteti dhe për llogari të VMRO-së.

Aleanca për Shqiptarët thekson se decentralizimi është shtyllë e Marrëveshjes së Ohrit dhe vlerë evropiane. Çdo tentim për centralizim të pushtetit është hap prapa, dëmton zhvillimin ekonomik dhe thellon pabarazinë mes rajoneve të privilegjuara dhe atyre me shumicë shqiptare.

Nisur nga ky realitet i hidhur, bëhet edhe më e qartë se vendimi i Aleancës për Shqiptarët për të braktisur këtë qeveri antishqiptare dhe koalicionin VLEN ka qenë i drejtë, i qëlluar dhe vizionar. Çdo ditë që kalon dëshmon se ky vendim ishte jo vetëm reagim politik, por edhe alarm i domosdoshëm kundër padrejtësive sistematike që po u bëhen shqiptarëve nga kjo shumicë parlamentare, e cila në vend të barazisë dhe zhvillimit, ka zgjedhur rrugën e centralizimit, diskriminimit dhe degradimit të pozitës së shqiptarëve në shtet.

Shqiptarët nuk meritojnë të mashtrohen me fjalë të bukura, ndërkohë që në realitet qeveria e VLEN-it punon për ta kufizuar fuqinë e komunave dhe për ta dobësuar zërin e shqiptarëve, thuhet në kumtesën e Aleancës për Shqiptarët.

Disa media në gjuhën maqedonase i kanë reaguar ashpër shkrimtarit dhe publicistit të njohur shqiptar, Kim Mehmeti, pas një deklarate të tij ku ai shprehet kritik ndaj strukturës etnike dhe politike të elitave në Maqedoninë e Veriut.

Në një analizë të publikuar së fundmi, Mehmeti shkruan se: “Elitat maqedonase kryesisht janë të përbëra nga bullgarë e shqiptarë ortodoksë të serbizuar”, deklaratë kjo që ka shkaktuar reagime të forta në disa qarqe mediatike dhe politike maqedonase.

Sipas mediave maqedonase, fjalët e Mehmetit përbëjnë një “fjalor urrejtjeje dhe nënçmimi” ndaj popullit maqedonas dhe cenojnë bashkëjetesën ndëretnike në vend. Disa prej tyre e kanë akuzuar shkrimtarin për shpërndarje të gjuhës së urrejtjes dhe përpjekje për të delegjitimuar identitetin kombëtar maqedonas. Dhe kjo ka nxitur një varg reagimesh ku kërkohet ndëshkimi i Mehmetit për këto deklarata të tij.

Ndryshe, në analizën e tij, Mehmeti e përshkruan Maqedoninë e Veriut si një shtet të paqartësive dhe kontradiktave, ku sipas tij mungon një ndjenjë e vërtetë e bashkëjetesës dhe ku gënjeshtra është bërë pjesë e kulturës politike dhe shoqërore.

Ai shpreh kritika të forta edhe ndaj politikanëve shqiptarë në vend, të cilët i cilëson ose si “idiotë që nuk kuptojnë”, ose si “qyqarë që kanë frikë ta thonë të vërtetën”. Mehmeti thekson se shumë prej elitave politike maqedonase mohojnë origjinën e tyre etnike dhe përpiqen ta maskojnë këtë duke ushqyer urrejtje ndaj shqiptarëve dhe bullgarëve.

Reagimet ndaj shkrimit të Mehmetit kanë hapur sërish debatin për kufijtë e lirisë së shprehjes në një shoqëri multietnike si ajo e Maqedonisë së Veriut, ku tensionet ndëretnike ende nuk janë shuar plotësisht.

Kim Mehmeti, i njohur për stilin e tij kritik dhe për shkrimet që trajtojnë realitetin politik dhe shoqëror të shqiptarëve në Maqedoninë e Veriut, nuk ka reaguar ende publikisht ndaj akuzave të mediave maqedonase.

Të shtunën, në mënyrë të jashtëzakonshme, u caktua seancë e Kuvendit për ndryshimet në Kodin Zgjedhor, ndryshime për të cilat nevojitet parimi i votimit me Badinter. Deputetët e opozitës shqiptare nuk u konsultuan për asgjë, ndonëse kjo ka qenë gjithmonë praktikë e zakonshme kur bëhet fjalë për ligje që prekin Kodin Zgjedhor.

Opozita shqiptare, edhe pse e anashkaluar, tregoi gatishmëri për kompromis dhe ofroi mbështetje për ligjin, me kusht që qeveria të shfuqizojë vendimin për uljen e numrit të këshilltarëve komunalë – vendim që duhej të binte vetvetiu pas konstatimit nga Gjykata Kushtetuese se metodologjia e ndarjes së qytetarëve në rezidentë dhe jorezidentë është antikushtetuese.

Fatkeqësisht, nuk pati asnjë gatishmëri nga shumica parlamentare, por edhe, për çudi, nga VLEN-i për ta pranuar këtë kompromis. Për këtë arsye, opozita shqiptare nuk e përkrahu ndryshimin e ligjit.

Qeveria dhe shumica parlamentare nuk kanë asnjë argument për të akuzuar opozitën shqiptare. Maskat ranë. U bë e qartë se Mickoski dhe qeveria e tij kanë një agjendë të qartë diskriminuese ndaj qytetarëve me të drejtë vote.

Është paradoks i madh që mërgimtarët shqiptarë kanë të drejtë vote, por nuk kanë asnjë ndikim në përcaktimin e numrit të këshilltarëve. Një tjetër padrejtësi në një shtet ku pjesa shqiptare brenda qeverisë bën vetëm sehir.

Asnjë ministër shqiptar dhe asnjë deputet shqiptar nga pushteti nuk e hapi gojën për këtë çështje. Ky është, në fakt, paradoksi i VLEN-it.

Tentativa për ta ndryshuar Kodin Zgjedhor pa konsultim dhe pa transparencë dështoi. Dështoi sepse funksionoi parimi i shumicës së dyfishtë – Badinteri, që mbrojti barazinë politike dhe interesin e qytetarëve.

Aleanca për Shqiptarët rithekson se do të mbrojë gjithmonë interesin politik dhe të drejtën e barabartë të qytetarëve, përballë çdo tentative për përjashtim, manipulim dhe diskriminim.

Aleanca për Shqiptarët