Enti Shtetëror i Revizionit (ESHR) ka konstatuar një sërë parregullsish dhe dobësish në funksionimin e Qendrës Sportive “Boris Trajkovski” në Shkup për vitin 2023, të cilat kanë rezultuar në objekte jofunksionale, pajisje të amortizuara dhe humbje të mundësive për gjenerimin e të ardhurave shtesë. Revizioni ka dhënë mendim me rezervë për pasqyrat financiare dhe mendim të pafavorshëm për përputhshmërinë me ligjet.

Sipas raportit, Akva-parku, i cili është pjesë e kompleksit, është mbyllur në vitin 2024 dhe nuk sjell më të ardhura. Vendimi për mbylljen është marrë për shkak të joefikasitetit ekonomik dhe përfundimit të garancisë 10-vjeçare për pajisjet dhe instalimet. Në vitin 2023, Akva-parku kishte gjeneruar të ardhura prej 4.29 milionë denarësh, që është 41% më pak se sa ishte planifikuar.

Revizioni gjithashtu ngre shqetësime për sistemin solar për ngrohjen e pishinës, i cili nuk është funksional për shkak të defekteve teknike. Për këtë sistem, qendra ka paguar pothuajse 26 milionë denarë, ndërsa vlera e tij aktuale në librat financiarë është vetëm 2.85 milionë denarë.

Është konstatuar gjithashtu një mundësi e humbur për të ardhura nga menaxhimi i parkingut. Edhe pse qendra ka të drejtë ta përdorë atë, prej vitesh nuk ka arkëtuar asgjë nga parkimi.

Probleme janë identifikuar edhe në dhënien me qira të hapësirave afariste. Edhe pse qiratë caktohen përmes ankandeve publike elektronike, në 14 nga 24 kontrata aktive, çmimi i arritur ka qenë më i ulët se vlera fillestare e vlerësuar, me ulje që variojnë nga 6% deri në 50%. Këto kontrata janë lidhur për katër vjet dhe zgjaten me anekse nën të njëjtat kushte, pa u përditësuar çmimet sipas tregut aktual.

Revizioni ngre gjithashtu çështjen e adaptimit të objektit për nevojat e samitit të OSBE-së në vitin 2023, për të cilin Ministria e Punëve të Jashtme (MPJ) ka shpenzuar mbi 124 milionë denarë. Revizorët kanë konstatuar se MPJ nuk ka dorëzuar procesverbale për punimet dhe pajisjet e instaluara, të cilat ende nuk janë transferuar zyrtarisht në pronësi të qendrës sportive.

Në raport gjithashtu theksohet se borxhi prej mbi 260 milionë denarësh ndaj Qytetit të Shkupit për ndërtimin e sallës, i krijuar në vitin 2011, është shlyer vetëm gjatë periudhës 2019-2023. Meqë qendra ka funksionuar me humbje, të gjitha mjetet për shlyerje janë siguruar nga buxheti shtetëror.

Ka nisur grumbullimi i protestuesve në sheshet e Prishtinës. Qindra kanë ardhur me autobusë nga komunat e tjera. Protesta është paralajmëruar që të fillojë në orën 17:00.

Qytetarë të shumtë kanë filluar të mblidhen për protestën e organizuar nga veteranët për të kundërshtuar veprimet e Gjykatës Speciale. Protesta pritet të fillojë në orën 17:00, në sheshin “Skënderbeu” në Prishtinë.

Disa komuna kanë ofruar transport falas për qytetarët që dëshirojnë të marrin pjesë në protestë, ndërsa një pjesë e tyre tashmë kanë arritur në Prishtinë.

Protestuesit mbajnë në duar flamuj kombëtarë dhe pankarta të ndryshme në përkrahje të pjesëtarëve të UÇK-së.

Ndryshe, organizatat e dala nga lufta e Ushtrisë Çlirimtare të Kosovës në një konferencë të mbajtur të mërkurën u kanë bërë thirrje qytetarëve që të dalin masivisht në protestë, në mbrojtje të luftës çlirimtare.

Një ditë më parë, të gjitha partitë e opozitës ju kanë bërë thirrje qytetarëve të Kosovës për pjesëmarrje në këtë protestë.

Kryetari i PDK-së, Memli Krasniqi, ka thënë se kjo protestë është në mbrojtje të vlerave të UÇK-së.

“Nesër, më 7 gusht, në ora 17:00, mblidhemi të gjithë në sheshin “Skënderbeu” – në një protestë që nuk është thjesht reagim, por një akt ndërgjegjeje kombëtare. Le të jehojë zëri i secilit që nuk pranon që lufta për liri të njolloset, që historia jonë të rishkruhet padrejtësisht, e që drejtësia të kthehet në padrejtësi. Me çlirimtarët. Për drejtësi. Për Kosovën”, ka shkruar ai në profilin e tij në “Facebook”.

Edhe nënkryetari i LDK-së, Lutfi Hazri, ai ka thënë se proteste e 7 gushtit është thirrje për Republikën dhe mbrojtjen e vlerave të përbasketa.

“Një ushtri çlirimtare me një emblemë e me një qëllim, për një Republikë të lirë, të pavarur dhe të drejtë për të gjithë. Protesta e 7 gushtit është thirrja jonë për Republikën. Duhet të mbrohen vlerat dhe qëllimi i përbashkët. Në emër të atdheut, familjes e Zotit, dje, sot e nesër!”, ka shkrua ai në profilin e tij në “Facebook”.

Besëlidhja Aleanca Kombëtare për Integrim është në fazën përfundimtare të finalizimit të kandidatëve për zgjedhjet lokale në komunat me shumicë shqiptare në Maqedoninë e Veriut. Lajmin e ka bërë të ditur shefi i shtabit të BDI-së, Faton Ahmeti, përmes një statusi në rrjete sociale.

Sipas Ahemtit, kandidatët e konfirmuar deri tani janë:

Skender Rexhepi-Zejd – Qyteti i Shkupit

Arsim Dalipi – Strugë

Fatmir Dehari – Kërçovë

Ilirjan Fetahu – Dibër

Skender Isufi – Haraçinë

Suat Shaqiri – Çashkë

Ejup Abazi – Studeniçan

Erkan Arifi – Likovë

Bajram Rexhepi – Tetovë

Valbon Limani – Gostivar

Bujar Osmani – Çair

Nazim Taipi – Tearcë

Blerant Ramadani – Saraj

Emir Sulejmani – Zhelinë

Isen Shabani – Vrapçisht

Enver Pajaziti – Bërvenicë (i mbështetur nga Besëlidhja Aleanca Kombëtare për Integrim)

Ahmeti tha se në ditët në vijim do të plotësohen të gjitha kandidaturat, në funksion të realizimit të vizionit për përfaqësim të vërtetë politik të shqiptarëve në vend.

“Bashkë do të fitojmë! Bashkë do t’i themi stop të keqes! Bashkë për dinjitetin shqiptar!”, shkruan ai në fund të statusit së tij.