Koalicioni AKI në Tetovë mbajti sot një konferencë për shtyp ku akuzoi kryetarin në ikje të Komunës së Tetovës, Bilall Kasami, për dështim në realizimin e premtimeve lidhur me ndërtimin e parkingjeve publike informon Tetovasot.

Në deklaratën e tyre, përfaqësuesit e AKI-së rikujtuan se Kasami ishte zotuar në vitin 2021 se do të ndërtonte shtatë parkingje me kate brenda gjashtë muajsh, por pas katër vitesh Tetova ende nuk ka asnjë parking të ri. Sipas tyre, jo vetëm që nuk janë ndërtuar hapësira të reja parkimi, por edhe vendet ekzistuese janë bërë me pagesë, duke rritur shpenzimet e qytetarëve.

Në konferencë u theksua gjithashtu se qytetarët e Tetovës paguajnë 40% më shumë për parkim zonal dhe parkingje të mbyllura, ndërkohë që Ndërmarrja Publike “Parkingu i Qytetit” ka raportuar humbje çdo vit, në total mbi 25 milion denarë për katër vitet e fundit. AKI akuzoi se këto humbje janë mbuluar nga buxheti i komunës, pra nga taksat e qytetarëve, ndërsa ndërmarrja shpenzon më shumë për paga dhe borde fiktive, duke punësuar militantë partiakë.

“Qytetarët paguajnë më shumë, ndërmarrja është në borxhe, ndërsa militantët shpërblehen me vende pune. Ky është modeli i kryetarit në ikje Bilall Kasami – mashtrime, zhvatje dhe kapje partiake e institucioneve publike”, thuhet në deklaratën e AKI-së.

Koalicioni theksoi se ky është shembull i keqmenaxhimit dhe se Tetova ka nevojë për një model të ri qeverisjeje lokale që i jep prioritet qytetarëve.Tetovasot

Reagimi i plotë:

Jemi sot këtu për të denoncuar një tjetër mashtrim dhe dështim të madh të kryetarit në ikje, Bilall
Kasami.
Në vitin 2021, ai u zotua para qytetarëve se për vetëm 6 muaj do të ndërtonte 7 parkingje me kate.
Sot, pas katër vitesh, Tetova nuk ka asnjë parking të ri, një premtim i zbrazët që tregon fytyrën e
vërtetë të këtij keqmenaxhimi.

Kryetari në ikje nuk ndërtoi asnjë parking të ri. Përkundrazi, vend-parkimet ekzistuese, si ky ku jemi
sot, i bëri me pagesë, pa ofruar asnjë zgjidhje. Si pasojë, vetëm u rritën shpenzimet e banorëve dhe
qytetarëve.

Po ashtu, kryetari në ikje premtoi se parkimi do të ishte falas deri në zgjidhjen e problemit me
hapësirat publike. Çfarë kemi sot? Qytetarët e Tetovës paguajnë 40% më shumë për parkim zonal
dhe për parkingjet e mbyllura. Pra, nga njëra anë premtime boshe, nga ana tjetër zhvatje e
drejtpërdrejtë e qytetarëve.

Ndërkohë, Ndërmarrja Publike “Parkingu i Qytetit” ka punuar me humbje çdo vit, katër vite rresht
ose në total mbi 25 milion denarë humbje.
Këto humbje janë mbuluar nga paratë e taksapaguesve tetovarë, pra nga buxheti i Komunës së
Tetovës, për një veprimtari e cila kryesisht ka të bëjë me gjobitjen e qytetarëve. Kjo do të thotë se
tetovarët paguajnë dy herë: një herë kur paguajnë gjobat dhe herën e dytë kur nga taksat dhe
tatimet e tyre mbulojnë humbjet e ndërmarrjes. Ky është një akt i pastër hipokrizie institucionale
dhe një dështim total.

Dhe pse ky dështim? Sepse paratë e qytetarëve nuk shkojnë për shërbime më të mira, por për paga
dhe borde fiktive. Në vitin 2024 shpenzimet për paga dhe kompensime u rritën ndjeshëm, që është
një shenjë e qartë se janë bërë punësime të panevojshme për militantë partiakë të BESA-s dhe
VMRO-së, meqë kjo ndërmarrje tash më 4 vite menaxhohet nga kuadër i VMRO-së.

Pra, qytetarët paguajnë më shumë, ndërmarrja mbyllet në borxhe, ndërsa militantët partiakë
shpërblehen me vende pune. Ky është modeli i kryetarit në ikje Bilall Kasami, mashtrime, zhvatje dhe
kapje partiake e institucioneve publike.

Deklaratat e fundit të Hristijan Mickoskit janë dëshmia më e qartë e panikut të tij para 19 tetorit. Kur një lider politik humb gjakftohtësinë dhe shpik skenarë imagjinarë për koalicione që nuk ekzistojnë, kjo do të thotë vetëm një gjë: ai e di se disfata dhe mosrealizimi i planeve antishqiptare po i trokasin në derë. Kështu ka thënë sot para gazetarëve Arta Bilalli-Zendeli nga Aleanca Kombëtare për Integrim, ndërsa ka shtuar se “e vërteta është e thjeshtë: projekti i tij i quajtur VLEN është në rënie të lirë dhe më 19 tetor do të pësojë një debakël të vërtetë”.

“Në vend që të flasë për vizion dhe program, Mickoski merret me trillime dhe përpiqet të shpikë skenarë për të zgjedhur ai vetë përfaqësuesit e shqiptarëve. Por qytetarët e dinë mirë: shqiptarët janë të bashkuar për barazi dhe dinjitet, ndërsa vegla e tij politike – VLEN-i po fundoset çdo ditë e më thellë”, tha Bilalli-Zendeli, ndërsa ka parashtruar disa pyetje.

“Pyetjet që Mickoski nuk guxon t’i prekë: Pse Mickoskit i pengon aq shumë BDI? Mos vallë sepse e di që BDI-në nuk mund ta nënshtrojë dhe ta shndërrojë në vasal? Pse LSDM nuk ka kandidatë aty ku nuk garon VMRO, si në Çair, Tetovë, Gostivar e Strugë? A nuk është kjo dëshmi se VMRO dhe LSDM po zbatojnë një plan të përbashkët për asimilimin politik të shqiptarëve dhe vazhdimin e projektit degradues me vasalët e VLEN-it? A mendon Mickoski se mund të caktojë vetë përfaqësuesit e shqiptarëve, duke i reduktuar në figurantë të skenës së tij politike? Pse u shfaq aq i brengosur në Kuvend kur tha se plani i BDI-së qenka që ‘mos të lejohet maqedonasit të zgjedhin kush do të udhëheqë me komunat shqiptare’?”, ka pyetur ajo.

Realiteti sipas Bilalli-Zendelit, është se Mickoski e ka kuptuar se BDI nuk eliminohet dot.

“Sepse BDI nuk është thjesht parti – është organizimi politik i shqiptarëve, themeli i barazisë dhe arkitekti i arritjeve më të mëdha të këtij vendi: Marrëveshja e Ohrit, anëtarësimi në NATO, negociatat me BE, të drejtat gjuhësore e institucionale. Çdo fjalë e tij për ‘eliminim’ është, në fakt, thirrje për të eliminuar zërin politik të shqiptarëve. Kjo është retorikë e rrezikshme nacionaliste – ajo dështoi në vitin 2001 dhe do të dështojë përsëri”.
Fatkeqësisht, vijoi më tej ajo, në këtë lojë të tij, VLEN-i ka pranuar të bëhet vegël, madje një vegël e vogël e Mickoskit.

“Me këtë rol vasali, ata po përgatisin terrenin për rikthimin e ‘botës serbe’ përmes VMRO-së. Por le ta dinë: me vasalë nuk ndërtohet as stabilitet, e aq më pak shtet. Më 19 tetor shqiptarët do të japin përgjigjen më të fuqishme: do të rrëzojnë projektin e rrezikshëm të Mickoskit dhe do ta vjen deri te shpërbërja e VLEN-it. Sepse përfaqësuesit e shqiptarëve nuk i zgjedh VMRO-ja – shqiptarët i zgjedhin vetë, dhe zgjedhja e tyre është BDI”

Ne nuk zhdukemi, tha Bilalli-Zendeli, nuk dorëzohemi dhe nuk shitemi – e aq më pak blihet dinjiteti shqiptar. “Zëri ynë është më i fortë se çdo trillim, dhe më 19 tetor ky zë do të dëgjohet si kurrë më parë. BDI është këtu dhe do të mbetet adresa e vetme politike e shqiptarëve”.

Kandidati për kryetar të komunës së Çairit, Bujar Osmani, nga një takim me qytetarët përcolli një mesazh të fuqishëm për kthesën politike dhe kombëtare që pritet në nëntor. Në fjalën e tij, Osmani paralajmëroi se pas strategjisë politike të VMRO-DPMNE-së dhe Hristijan Mickoskit nuk qëndron vetëm ndërrimi i pushtetit, por përpjekja për të fshirë gjithçka që përfaqëson trashëgimi historike dhe vlerore e shqiptarëve.

“Mickoski dëshiron që BDI-ja të fshihet nga skena politike. Pse? Sepse dëshiron të fshihen vlerat e BDI-së, trashëgimia e BDI-së, rrënjët e BDI-së. E ato rrënjë kanë degë që do të zgjasin për breza dhe shekuj. Dhe çdo i ri, edhe nëse harron çfarë ka ndodhur historikisht, do të ketë një nerv brenda vetes: si filloi ky rrugëtim për rikthimin e dinjitetit”, tha Osmani.

Sipas Osmanit, beteja që vjen është përplasja e dy vizioneve: njëra që dëshiron të fshijë dinjitetin shqiptar dhe tjetra që synon ta ruajë dhe ta forcojë atë. Ai paralajmëroi se zgjedhjet në tetor do të jenë një test i pjekurisë historike për secilin individ:

“Në tetor, secili prej nesh do të jetë para një testi: ose do ta legjitimojë politikën e marrjes së sovranitetit, tapinë e shtëpisë, statusin e zotit të saj, ose do ta pranojë rolin e shërbëtorit. Kjo varet nga ju, vëllezër e motra”, tha Osmani.

Osmani theksoi përgjegjësinë që ka secili qytetar si ruajtës i vlerave të fituara me dekada të tëra luftë. Ai i bëri thirrje njerëzve të mos jenë indiferentë, por të mendojnë seriozisht për zgjedhjen që sjell vota e tyre:

“Unë vetëm dua që secili prej jush të ndajë pak kohë dhe të mendojë për përgjegjësinë e madhe që do të bjerë mbi supet tona në tetor. Bisedoni në shtëpi, me miqtë tuaj: a do të lejojmë të na merret e drejta për të vendosur? A do të lejojmë të na poshtërohet gjuha?”

Në fund, Osmani iu drejtua emocioneve dhe kujtesës historike të komunitetit të tij:

“Kur të qëndroni para kutisë së votimit, mendoni për gjakun dhe djersën që janë derdhur për këtë dinjitet, që të respektohemi si zot të shtëpisë sonë. Dhe vendosni: cili do të jetë akti juaj që do të mbahet mend për breza”, përfundoi Osmani.