Në lidhje me punimet që janë paralajmëruar për në Kalanë e Shkupit ka reaguar edhe Aleanca për Shqiptarët e Arben Taravarit.

“Aleanca për Shqiptarët shpreh shqetësim të thellë dhe dënim të prerë ndaj skemave të fundit korruptive ku janë përfshirë drejtuesit e grupimit politik VLEN, veçanërisht në dritën e paralajmërimeve për ndërtime të reja në hapësirën historike të Kalasë së Shkupit – një veprim që rrezikon të tjetërsojë identitetin kulturor dhe arkitektonik të këtij lokaliteti me rëndësi të veçantë për qytetarët dhe për historinë shqiptare”, deklaruan nga ASH-ja e Taravarit.

Ata vlerësojnë se VLEN-i i Izet Mexhitit nuk mund të mbrojë shqiptarët, pasi është i zhytur në bixhoz e ndërtimet të egra në Çair.

“Shembulli më skandaloz është Monopoli i Tetovës, simbol i historisë kolektive shqiptare, i kthyer në një kantier të betonit, përmes një pazari të pistë ku prona u ble për vetëm 7 mijë euro dhe më pas u shit për 5 milionë euro. Ky është krim ekonomik dhe kulturor që meriton hetim dhe ndëshkim, jo heshtje dhe justifikim”, deklaruan nga ASH-ja, duke përmendur edhe donacionin prej 800 mijë euro nga kompania serbe UNIPROMET.

Influenserët dhe krijuesit e përmbajtjeve në rrjetet sociale do t’i nënshtrohen rregullimit. “Profesioni” ose veprimtaria e viteve të fundit që u sjell në jo pak raste përfitime shumë të larta dhe të paevidentuara krijuesve, tashmë do të definohet dhe të ardhurat e tyre do të kontrollohen.
Agjencia për Shërbime Mediatike Audio dhe Audiovizuale ka përgatitur draft-rregulloren sipas të cilës, që dikush të llogaritet infleunser, të bëhet pjesë e regjistrit dhe të jetë nën mbikëqyrje do të duhet të plotësohen disa kritere.

“Ndër kriteret kyçe është; a publikon personi përmbajtje me qëllim informimi, argëtimi ose edukimi, a e kanë përmbajtjet si qëllim publikun më të gjerë, a ka aktivitet ekonomik gjegjësisht a përfiton personi nga video të tilla që i publikon në rrjetet sociale, si dhe a ka personi përgjegjësi editoriale për atë që publikon. Ne vlerësuam se nuk është as e mundur dhe ka nevojë që të rregullohen të gjithë influenserët por vetëm ata që kanë ndikim të rëndësishëm në treg. Prandaj kemi vendosur pragun prej 10 mijë ndjekësish dhe sigurisht, nëse dikush e kalon këtë numër, do të bëhet pjesë e rregullimit”, tha Vlladimir Gjorgjieski, drejtues sektori, ASHMAA.

Secili prej tyre që i plotëson kriteret do të duhet të mbushë formularin e Agjencisë. Influenserët që kanë përfitime materiale dhe të ardhura nga puna e tyre, do të duhet të paguajnë tatim prej 0.05.%, të ardhura që do të shkojnë në sektorin mbikëqyrës në kuadër të Agjencisë. Deri tani, nuk ka asnjë të dhënë sesa influenserët në vend përfitojnë, sa janë të ardhurat e tyre nga ndjekësit dhe sa janë nga reklamat.

Fokusi gjatë monitorimit do të jetë në përmbajtjet video në Youtube, Instagram dhe TikTok por nuk përjashtohet mundësia që edhe përmbajtje në media të tjera sociale t’i nënshtrohen monitorimit.
Vlladimir Gjorgjieski nga Agjencia për Shërbime Mediatike Audio dhe Audio-vizuale thotë se monitorimi është pasojë e nevojës për përmbajtje më të sigurta në rrjetet sociale por edhe i një tregu të barabartë mediatik.

“Qëllimi kryesor i rregullimit mediatik është sigurisht mbrojtja e publikut, veçanërisht e kategorive më të brishta si fëmijët dhe të rinjtë. Influenserët sot kanë ndikim të madh në opinion, shumë më shumë sesa që dikur kanë pasur mediat tradicionale, veçanërisht te publiku më i ri. Infleunserët më nuk janë vetëm individë që argëtojnë por garojnë me televizionet dhe mediat e tjera për vëmendje, për ndikim por edhe për të ardhura nga reklamat. Prandaj është e rëndësishme që të gjithë në tregun e medias të luajnë sipas rregullave të njëjta, transparencë, përgjegjësi dhe etiketim të qartë të reklamave, sponzorizimeve dhe përmbajtjeve të paguara”, shtoi ai.

Rregullorja do të hyjë në fuqi pas publikimit të Gazetës Zyrtare kurse influenserët do të kenë mundësi të përshtaten me rregullat e reja deri në fund të dhjetorit të këtij viti.

Gjatë dekadës së fundit, infleunserët e mediave sociale janë shfaqur si një forcë e fuqishme në kulturën dixhitale, marketing dhe madje edhe në politikë. Me platforma si Instagram, TikTok, YouTube dhe X, ata tani arrijnë miliona ndjekës çdo ditë kurse përmbajtjet e tyre shpesh përfshijnë stilin e jetës, modën, gatimin, fitnesin, lojërat, prindërimin dhe financat, por shpesh duke zbehur vijën ndarëse midis mendimit personal dhe përmbajtjeve të paguara promovuese. Kjo rritje e shpejtë ka ngritur shqetësime serioze në lidhje me transparencën, shëndetin mendor, dezinformimin dhe llogaridhënien financiare të fitimit të tyre. Ata promovojnë produkte pa zbuluar sponsorizimet, synojnë audiencat e reja me standarde bukurie joreale ose ndajnë këshilla shëndetësore të paverifikuara.

Deputeti i Aleancës për Shqiptarët, Halil Snopce, ka ngritur sërish çështjen e ndryshimit të vendimit të qeverisë për numrin e këshilltarëve nëpër komuna, duke kërkuar zbatimin e plotë të vendimit të Gjykatës Kushtetuese që ndalon ndarjen e qytetarëve në “rezidentë” dhe “jo-rezidentë”.

Përmes një reagimi në rrjete sociale, Snopce thekson se java e ardhshme është afati i fundit për të korrigjuar këtë vendim dhe bën thirrje që një nga ministrat e VLEN-it të propozojë në mbledhjen e qeverisë implementimin e vendimit kushtetues.

“Java që vjen është java e fundit ku mundet të ndryshohet vendimi i qeverisë për numrin e këshilltarëve duke e zbatuar vendimin e gjykatës kushtetuese se nuk ka më ndarje të qytetarëve në rezident dhe jorezident.
Edhe njëherë ftoj njërin prej ministrave të VLENIT që në mbledhjen e kësaj jave të propozon Mickovskit zbatimin e vendimit të gjykatës kushtetuese.

Përndryshe do të jenë fajtor për heshtjen e tyre ndaj diskriminimit të komunave shqiptare.

Ashiqare, VMRO dëshiron të jep mesazh se për shtetin tonë, mërgimtarët tanë janë qytetar të rendit të dytë.

VlEN nuk duhet të FLEN. Duhet të ketë guxim dhe të mos hesht. Vetëm të kërkojnë zbatimin e vendimit të gjykatës kushtetuese. Asgjë më shumë.

Mërgimtarët nuk meritojnë një qasje të tillë diskriminuese. Është momenti jo për veprim, por vetëm një propozim. Njëri prej ministrave e ngren gishtin dhe kërkon të zbatohet vendimi i gjykatës.
Nëse ministrat kanë punë më të rëndësishme dhe nuk mund të shkojnë në mbledhje të qeverisë, atëherë fjalë mund të kërkojë njëri nga zëvendës ministrat.

Edhe njëherë, java që vjen është java e fundit. Pastaj dot jetë vonë. Përndryshe do të mbetet një njollë për vet VLENIN për mosveprim dhe heshtje karshi VMRO-së.