Hapja e Shtabit Zgjedhor të VLEN-it në Çair, që ishte menduar të jetë një shfaqje force politike dhe demonstrim i mbështetjes së gjerë, në fakt rezultoi në një paradë kontradiktash dhe autogolash politikë. Nga njëra anë, organizatorët tentuan të krijojnë një atmosferë festive e masive, por në përpjekje për të mbushur hapësirën e vogël të një oborri në një nga ndërtresat e Çairit, ata u detyruan të sjellin aktivistë nga cep në cep i Maqedonisë së Veriut. Në vend që kjo të jepte përshtypjen e një lëvizjeje të fuqishme lokale, në fakt u ekspozua një dobësi themelore: mungesa e mbështetjes së sinqertë dhe të madhe brenda vetë Çairit.

Shumë prej pjesëmarrësve shpërndanë në rrjete sociale postime nga Likova, Struga, Tetova e qytete të tjera, duke zbuluar pa vetëdije se turma ishte e importuar. Kjo e ktheu sloganin “Çairi foli” në një bllof të madh, pasi ata që folën nuk ishin çairas, por militantë të transportuar për të krijuar iluzionin e masës. Në këtë mënyrë, vetë VLEN-i e demaskoi veten duke shfaqur jo vetëm dobësitë organizative, por edhe mungesën e kredibilitetit për të bindur opinionin publik.

Fjalimet e liderëve e thelluan edhe më tej kontradiktën. Bekim Fazliu rikujtoi me stilin e tij retorik epokën e PDSH-së, kur sheshet mbusheshin me transport të organizuar, por zgjedhjet humbeshin. Adnan Azizi tentoi të japë një kuptim të ri emrit “Izet”, por doli kontradiktor dhe madje u ironizua nga fakti se në fjalorin shqip nuk ekziston një interpretim i tillë, përkundrazi ekziston vetëm fjala “lezet”. Zeqirja Ibrahimi bëri lapsusin e radhës duke futur fenë dhe të dërguarin e Zotit në një fjalim për një figurë që vetë e kishte quajtur dikur “kriminel, hajn, mashtrues”. Ky kthim i beftë dhe pa shpjegim e minon seriozisht kredibilitetin e tij. Ndërkohë, Bilall Kasami mbeti në vargjet e zakonshme të mësuara përmendësh, pa sjellë diçka të re, ndërsa Arben Fetai u paraqit si një figurë kontradiktore që shpesh ushqehet nga shpifje e gjysmë të vërteta.

Por autogoli më i madh erdhi nga vetë Izet Mexhiti. Ai foli për 20 vite keqqeverisje të BDI-së, duke harruar se vetë ka qenë pjesë kyçe e asaj periudhe, sidomos në Çair. Ky mesazh e dëmton rëndë, sepse publiku e di mirë rolin e tij dhe nuk mund të mashtrohet lehtë nga retorika. Në vend që të bindë për ndryshim, ai i rikujtoi votuesit të kaluarën e tij të gjatë në pushtet.

Moti stabil dhe pa reshje shiu nuk i ndihmoi aspak organizimit të VLEN-it. Në fakt, po të kishte rënë shi, çadrat e njerëzve do ta kishin mbuluar hapësirën e vogël dhe do ta bënin tubimin të dukej madhështor, me një panoramë masive që mungoi mbrëmë.

Në fund, hapja e shtabit nuk shërbeu për të ngritur moralin e strukturave, as për të tërhequr votuesit e pavendosur. Përkundrazi, u shndërrua në një shfaqje teatrale, ku në vend që të tregohej fuqi, u ekspozuan dobësi të thella strategjike dhe organizative. Çairasit e panë qartë se pas parullës “Çairi foli” fshihej një realitet tjetër: një grumbull militantësh të sjellë nga jashtë dhe një fjalor politik i vjetëruar, që nuk sjell frymë të re.

Ky aktivitet, që duhej të ishte kulm i entuziazmit për VLEN-in, përfundoi duke ofruar material ironik për kundërshtarët dhe zhgënjim për ata që prisnin diçka të re. Në vend të demonstrimit të vizionit, u dëshmua mungesa e tij.

Kandidati për kryetar komune të Çairit nga Aleanca Kombëtare për Integrim, Bujar Osmani, sonte ka folur para aktivistëve të kuvendit vendor “Fehmi Lladrovci”, ku ka bërë thirrje për mobilizim strukturor dhe rezistencë që po forcohet çdo ditë e më shumë.

Postimi i plotë i Bujar Osmanit:

Lëvizja për rilindjen e Çairit po shpërthen mbi pritshmëritë tona dhe dëshmia më e gjallë ishte sot në hapjen e Shtabit në Këshillin Vendor “Fehmi Lladrovci”.

Të lodhur nga premtimet boshe, projektet e parealizuara, ambienti i papastër dhe mungesa e sigurisë, qytetarët e Çairit po i thonë mjaft stagnimit. Zëri i tyre nuk është thjesht kritikë, por rezistencë që po forcohet çdo ditë e më shumë.

Aleanca Kombëtare për Integrim po ngrihet në një forcë të bashkuar, të fortë dhe inspiruese. #besëlidhja #AKI

Kandidati i Aleancës Kombëtare për Integrim për kryetar komune të Sarajit, Blerant Ramadani, së bashku me shefin e shtabit komunal, Senehat Murtezani, zhvilloi një takim me banorët e Krushopekut.

Ramadani theksoi se gjatë bashkëbisedimit u diskutua për disa projekte me rëndësi jetike për fshatin, si asfaltimi i rrugës që lidh komunën me Krushopekun, asfaltimi i rrugës që lidh Krushopekun me Nerezin, si dhe bekatonizimi i rrugicave të mbetura brenda vendbanimit.

Ramadani gjithashtu paralajmëroi se një prioritet tjetër do të jetë ndërtimi i kanalizimit atmosferik, për të zgjidhur përfundimisht problemet e ujërave të shiut dhe përmbytjeve. Po ashtu, u zotua se do të angazhohet për nisjen e punimeve të sallës së sportit pranë shkollës, e cila tashmë ka të kompletuar dokumentacionin.

“Banorët e Krushopekut dëshmuan edhe njëherë mikpritjen dhe besimin e tyre. U premtoj se këto kërkesa do të kthehen në projekte konkrete që do të ndryshojnë realisht jetën e këtij vendbanimi”, theksoi Ramadani.

Postimi i plotë i Blerant Ramadanit:

“Sot, bashkë me shefin e shtabit komunal, Senehat Murtezani, zhvilluam një takim të frytshëm me banorët e Krushopekut.

Diskutuam për projektet që janë jetike për fshatin: asfaltimin e rrugës nga komuna deri në Krushopek, asfaltimin e rrugës që lidh Krushopekun me Nerezin si dhe bekatonizimin e rrugicave të mbetura brenda fshatit.

Një tjetër prioritet do të jetë ndërtimi i kanalizimit atmosferik, i cili do të zgjidhë përfundimisht problemet e ujërave të shiut dhe përmbytjeve. Po ashtu, do të angazhohemi që salla e sportit pranë shkollës e cila ka të gjithë dokumentacionin e përfunduar të nisë më në fund punimet.

Banorët e Krushopekut dëshmuan edhe njëherë mikpritjen dhe besimin e tyre. U premtoj se këto kërkesa do të kthehen në projekte konkrete që do të ndryshojnë realisht jetën e këtij vendbanimi”, ka përfunduar Ramadani.