Sot bëhen tre ditë që nga momenti kur kryeministri Mickovski ka “goditur” ashpër shefin e shtabit të VLEN-it, Adnan Azizin. Në pyetjen e gazetarit të TS, se si e komenton patriotizmin e Adnan Azizit i cili në një tubim u shpreh se do ti ndalojë projektet sllave në Tetovë, kryeministri Mickovski nuk deshi t’ia thotë as emrin, por tha se “personi që përmendet nuk ka fuqi politike për të vendosur për proceset aktuale në vend”.

Kjo deklaratë e ashpër është konsideruar si një sulm i drejtpërdrejtë dhe ka tensionuar më tej marrëdhëniet mes VMRO-së dhe VLEN-it.

Pavarësisht kësaj deklarate të ashpër, nuk ka pasur asnjë reagim edhe pas 3 ditëve nga Adnan Azizi, por dje ka reaguar kreu i BESËS dhe i komunës së Tetovës, Bilall Kasami.
Ai në vend që ti përgjigjet kryeministrit Mickovski, Kasami drejtoi akuza ndaj BDI-së duke thekësuar se BDI-ja po përgatitet të krijojë tensione ndëretnike.

Sipas portalit TS, tensionet mes VMRO-së dhe VLEN-it po përkeqësohen edhe për shkak të qëndrimeve kontradiktore të vetë përfaqësuesve të VLEN-it. Nga njëra anë, Adnan Azizi kritikon projektet “sllave” në Tetovë dhe shfaqet me shqiponjën dykrenare, ndërsa nga ana tjetër, Bilall Kasami kërkon votat maqedonase nga VMRO-ja në Tetovë.

Ndërkohë, kryeministri Mickoski, përmes portalit TS, ka dërguar një mesazh të drejtpërdrejtë liderit të BDI-së, Ali Ahmetit, i cili nga mediat maqedonase është cilësuar si një sinjal i afrimit të qëndrimeve mes VMRO-së dhe BDI-së para zgjedhjeve lokale.

Ndryshe, në anketat e IRI-it, agjencive të tjera si Rejting, si dhe në sondazhet që qarkullojnë në zyrat e VMRO-së, thuhet se Aleanca Kombëtare për Integrim (AKI) pritet të marrë mbi 150 mijë vota, ndërsa VLEN vetëm 50 deri në 55 mijë. Një rezultat 3 me 1 që, sipas analistëve, mund të tronditë rëndë pozitat e VLEN-it pas 18 tetorit dhe të shpërbëhet komplet koalicioni siç ka deklaruar Arben Taravari./TS/

Aleanca për Shqiptarët pyet publikisht zëvendëskryeministrin e parë, Izet Mexhiti: Çfarë ndodhi me kazinotë dhe bastoret në Maqedoninë e Veriut – u mbyllën apo, përkundrazi, u shtuan edhe më shumë?

Ligji i ri për lojërat e fatit vetëm sa e forcoi biznesin e oligarkëve të bixhozit, këtë herë me ligj dhe Maliq. E Maliqi, në këtë rast, është vetë Izet Mexhiti – kumbara i kumarit. Ndryshimet e fundit hoqën edhe argumentin e vetëm që përdornin Mexhiti dhe klika VLEN. Me këto ndryshime, përsëri mundësohet organizimi i lojërave të fatit online nga subjekte private – saktësisht siç ka qenë edhe më herët.

Kur ishte në opozitë, Mexhiti premtonte se do të mbyllte të gjitha kazinotë dhe bastoret që po shkatërrojnë mijëra familje shqiptare. Sot, nga posti qeveritar, realiteti është krejt ndryshe: në vend të shuarjes së këtij fenomeni, çdo ditë po hapen pika të reja.

Heshtja dhe justifikimet nuk mund ta fshehin të vërtetën. Mexhiti u paraqit si shpëtimtar nga bixhozi, por sot është kthyer në simbol të dështimit dhe hipokrizisë politike.

Aleanca për Shqiptarët i bën thirrje qeverisë të zbatojë menjëherë masa për kufizimin dhe kontrollin e lojërave të fatit, në vend që të bëhet palë me mafien e bixhozit. Qytetarët meritojnë qeveri që kujdeset për familjet, jo pushtetarë që premtojnë një gjë dhe bëjnë të kundërtën.

Aleanca për Shqiptarët

Nga Naser Selmani

Kërkesa e kryeministrit Mickovski që rrahjes brutale të nxënësve shqiptarë në Tetovë nga tifozët e Teteksit të mos i jepet karakter etnik është paturpësi e skajshme. Nëse dhuna ndaj fëmijëve shqiptarë nuk ka motive etnike, pse kryeministri nuk i tregon motivet e vërteta të kësaj dhune barbare?

Me qasjen e tij, Mickovski dhe qeveria kanë nxitur përshkallëzimin e gjuhës së urrejtjes dhe të dhunës etnike. Kur tifozët maqedonas në Kumanovë kërkuan vdekjen e shqiptarëve, reagimi i tij ishte i vakët: njëherë tha se nuk i dëgjoi thirrjet, pastaj e minimizoi duke thënë se ishte një grup i vogël.

Sikur institucionet të kishin vepruar me vendosmëri, tifozët e Pelisterit nuk do të guxonin të kërkonin vdekjen e shqiptarëve në ndeshjen me Shkupin.

Fakti që autorët e urrejtjes dhe dhunës etnike nuk zbrapsen dëshmon se institucionet veprojnë dobët, ose në rastin më të keq, i tolerojnë me vetëdije. Pikërisht për këtë arsye, në Veles dhe Tetovë shfaqen grafite me thirrje për vdekjen e shqiptarëve, të cilat nesër mund të nxisin dhunë në vende të tjera.

Për t’u shfajësuar, Mickovski madje akuzoi opozitën shqiptare për dhunën etnike – një absurditet që nuk bind askënd. E vërteta është se mosndëshkimi i gjuhës së urrejtjes në Kumanovë dhe Manastir çoi në dhunën e Vojvodëve ndaj nxënësve shqiptarë në Tetovë. Kur urrejtja nuk ndëshkohet, ajo kthehet në dhunë fizike.
Institucionet përshkallëzojnë dhunën sepse tregojnë edhe standarde të dyfishta sipas përkatësisë etnike. Sulejman Llamallari dënohet me dy vjet e gjysmë burg për një debat verbal, ndërsa tifozët që përdorin gjuhën e urrejtjes kundër shqiptarëve dyshohen për kundërvajtje. Cilësimi i saktë i veprës do të ishte
gjuhë e urrejtjes që parasheh dënim me burgim deri në pesë vjetë.

Këto raste dëshmojnë se drejtësia është selective dhe thellon përçarjet ndëretnike.
Motivet e Mickovskit janë të qarta: me retorikën antishqiptare ai kërkon të ruajë lidershipin në parti, të kompensojë humbjet në zgjedhjet lokale, t’i shërbejë Vuçiqit për të shpërqendruar protestat në Serbi dhe të shantazhojë BE-në me kartën e destabilizimit.
Sa largë do të shkojë Mickovski varet prej sjelljes së partive shqiptare, në pushtet dhe opozitë. Në këtë skenar, më në siklet është VLEN-i.

Nëse nuk arrin të ndalë përshkallëzimin e dhunës etnike, do të paguajë çmim të lartë në zgjedhjet lokale. Sepse nga dhuna kundër shqiptarëve përfitojnë VMRO-ja dhe opozita shqiptare, ndërsa humb VLEN. Do të dëshmohet se janë parti në pushtet, pa pushtet, e pafuqishme të parandalojë dhunë kundër shqiptarëve.