Burime të sigurta nga kabineti qeveritar zbulojnë se Izet Mexhiti, një nga figurat kyçe të koalicionit VLEN, po ndërmerr veprime të koordinuara për manipulimin e opinionit publik përmes sondazheve të fabrikuara. Sipas këtyre burimeve, Mexhiti vepron në sinkron me kryeministrin Hristijan Mickoski, me qëllim të ngritjes artificiale të pëlqyeshmërisë së Arben Fetait dhe paraqitjes së tij si lider de facto i VLEN-it.

Manovra, e cila përfshin publikimin e sondazheve të porositura që nxjerrin Fetain si politikani më i vlerësuar shqiptare, shihet si përpjekje për të imponuar një figurë të preferuar nga strukturat maqedonase në krye të bllokut shqiptar në pushtet. Kjo lëvizje, sipas vlerësimeve brenda qeverisë, është pjesë e një skenari më të gjerë për ta kontrolluar diskursin politik shqiptar dhe për ta dobësuar qëndrimin kritik brenda vetë VLEN-it.

“Nuk është hera e parë që strukturat pranë VMRO-DPMNE-së përpiqen të ndërhyjnë në riorganizimin e politikës shqiptare, por kjo që po ndodh tani është e pashembullt,” tha një zyrtar i lartë qeveritar në kushte anonimiteti.

Sipas tij, rritja e papritur dhe joorganike e perceptimit pozitiv ndaj Fetait nuk përputhet as me realitetin elektoral dhe as me terrenin politik në zonat shqiptare.

Po ashtu, thuhet se Mexhiti po përdor ndikimin e tij në disa media pranë VLEN-it për të përforcuar narrativën se VLEN tashmë ka një lider të ri, duke hequr qafe Bilall Kasamin,
ndonëse as strukturat e brendshme dhe as përbërja politike e koalicionit nuk e pranon një gjë të tillë, sidomos pas paraqitjeve skandaloze të Fetait në media, duke lënë lapsuse të pajustifikueshme.

Deputeti i ASH-së, Halil Snopçe ka mbajtur një fjalim në Kuvend në lidhje me prioritetet Daneze gjatë presidencës gjashtë mujore me Kēshillin e Europës.

Në fjalën e tij, deputeti Snopçe ka theksuar se “ajo që bie në sy është se nën presidencën paraprake Polake Zgjerimi i Bashkimit Evropian me Ballkanin Perëndimor, përfshirë Maqedoninë, ishte prioritet i theksuar”.

Snopçe thotë se kësaj radhe ka një lëvizje pas për sa i përket Maqedonisë.

“Danimarka nuk ka vendos tërësi me fokus të veçantë për Procesin e Maqedonisë”, ka theksuar deputeti Snopçe.

“Ne si shtet nuk kemi alternativë tjetër përvec realizimit të reformave (që në mënyre shumë konkrete parashihen edhe nga ana e presidencës Daneze) dhe normalisht ti realizojmë ndryshimet kushtetuese”, ka nënvizuar më tej deputeti Snopçe.

Ai thotë se ua ka rikujtuar të gjithëve porosinë eksplicite të Kryetarit te Këshillit të BE-së, Antonio Koshta i cili i tha kryeministrit të vendit se marrëveshje tjetër nuk ka. “Zbatoni atë për të cilin jemi marrë vesh. Ditën e njëjtë patem dorëheqjen e ministrit te shendetsisë z. Taravari. Partia e tij vendosi të lëshojë qeverinë për shkak të pakenaqesive nga rrjedha dhe dinamika e reformave në shtet”.

Deputeti Snopçe ka deklaruar shqetësimin nga ndikimet e huaja, posaçërisht të botës lindore si Rusia dhe Kina që janë bërë të dukshme dhe fatkeqësisht po përcaktojnë drejtimin strategjik të shtetit.

“Në kuadër të kësaj shqetësuese është rikthimi aktiv i projektit të “botës serbe”, një agjendë që, përmes lidhjeve politike, kulturore dhe religjioze, po tenton të forcojë ndikimin e saj në të gjithë rajonin, përfshirë edhe Maqedoninë e Veriut. Kjo Është një strategji shumë e rrezikshme për të ardhmen e vendit”, ka deklaruar më tej deputeti i ASH.

Të gjitha këto nuk janë hamendësime apo teori konspirative, thotë ai, por janë fakte të dokumentuara në raportet e Bashkimit Evropian, të Departamentit Amerikan të Shtetit dhe organizatave ndërkombëtare që monitorojnë zhvillimet në Ballkanin Perëndimor.

Aleanca për Shqiptarët – Dega Tetovë shpreh shqetësimin e thellë lidhur me presionin e ushtruar ndaj gazetarit Ylber Jahiu dhe njëherit pronarit të portalit Top24, për shkak të raportimit të tyre kritik dhe të pavarur. Kërcënimet e bëra përmes ndërrimit të vendit të punës përbëjnë një formë të rrezikshme të frikësimit dhe tentativës për të ndikuar në lirinë e medias.

Të synosh heshtjen e një gazetari duke ushtruar presion me ndërrimin e vendit të punës të tij nuk është vetëm goditje ndaj individit, por një kërcënim i drejtpërdrejtë ndaj së drejtës për informim të lirë dhe të pandikuar. Kjo qasje tregon qartë frikën e pushtetit nga transparenca dhe llogaridhënia publike që Bilall Kasami duhej ta kishte dhënë me kohë përpara qytetarëve të Tetovës! Por vonesën e transparencës dhe llogaridhënies, tani më edhe presionin ndaj gazetarëve të çmuar të qytetit, Bilall Kasamit do të ja japin qytetarët e Tetovës duke e dënuar me votë në Tetor.

Aleanca për Shqiptarët – Dega Tetovë qëndron fuqishëm në mbështetje të gazetarit Ylber Jahiu dhe të çdo përfaqësuesi të mediave që punon me integritet dhe profesionalizëm. Ne bëjmë thirrje për ndaljen e menjëhershme të çdo forme presioni politik apo institucional ndaj mediave dhe gazetarëve në vendin tonë. Liria e shprehjes është themel i demokracisë dhe nuk do të lejojmë që ajo të nëpërkëmbet për interesa personale apo partiake.