Koalicioni shqiptar VLEN, që dikur u promovua si “Fronti i ndryshimit”, po përballet me turbullira të brendshme politike që po e lëkundin seriozisht kohezionin e tij. Pas largimit zyrtar të Aleancës për Shqiptarët së Arben Taravarit dhe përçarjeve të hapura brenda Alternativës, gazetari Urim Saliu ka reaguar me një koment ironik që po shpërndahet me shpejtësi në rrjete sociale.

“Nga VLEN në LEN dhe nga LEN në EN. Dhe kur EN ia shtojmë një D në fund, del END, domethënë FUND”, shkruan Saliu, duke përshkruar në mënyrë simbolike degradimin e unitetit brenda koalicionit opozitar.

Kjo deklaratë pason zhvillimet e ditëve të fundit, ku përveç largimit të ASH-së, brenda Alternativës janë shfaqur ndarje të thella, me zëra kritikë që kërkojnë mbledhje të jashtëzakonshme të kryesisë dhe madje rikthim të vlerave fillestare të partisë që po rrezikohen nga, siç thuhet, “instrumentalizimi i Alternativës në shërbim të partive të tjera”.

Disa burime të brendshme flasin për trysni të jashtme dhe pakënaqësi për rolin e Alternativës brenda Qeverisë, ndërsa të tjerë e shohin këtë si pasojë të mungesës së qartësisë strategjike dhe ndarjes së pushtetit.

Në këtë kontekst, batuta e Urim Saliut nuk është vetëm sarkazëm, por edhe një sinjal alarmi për rrëshqitjen e koalicionit drejt një fragmentimi të pashmangshëm politik.

Nëse trendi i përçarjes vazhdon, “VLEN” rrezikon të shndërrohet jo vetëm në formulë të dështuar politike, por edhe në një shembull klasik se si përplasjet personale dhe mungesa e vizionit të përbashkët mund të rrënojnë shpejt shpresën për ndryshimin e proklamuar nga VLEN.

Nga data 14 deri më 22 qershor 2025, Hamza Nuhiu, kryetar i Forumit Rinor të Aleancës për Shqiptarët – dega Çair (FRASH), mori pjesë në një trajnim ndërkombëtar me temën “Demokracia, menaxhimi i polariteteve të demokracisë”, i zhvilluar në Bansko të Bullgarisë, informon PressOnline.al

Në këtë projekt të organizuar nga Bashkimi Evropian, VVI Foundation dhe Erasmus+, Nuhiu ishte një nga 28 pjesëmarrësit, mes të cilëve ishin liderë të forumeve rinore të partive politike dhe drejtues të OJQ-ve nga 8 shtete të ndryshme evropiane.

Gjatë programit u organizuan sesione të fokusuara në menaxhimin e demokracisë, analiza të zbatimit të saj në vendet pjesëmarrëse, si dhe aktivitete bashkëpunuese dhe sfiduese në natyrë.

Përvoja më e veçantë, sipas Nuhiut, ishte ndjekja e ligjëratave të profesorit të njohur amerikan, Dr.William Benet, ideator i konceptit “Demokracia Plurale”, i cili ndau me pjesëmarrësit një qasje të thellë mbi pluralizmin demokratik dhe sfidat e kohës moderne.

Nuhiu falënderoi të gjithë mbështetësit e tij dhe veçanërisht kryetarin e Aleancës për Shqiptarët, Arben Taravari, për përkrahjen dhe mundësinë përfaqësuese.

“Rinia, çelësi i Tetorit”, ishte mesazhi përmbyllës ngakreu i FRASH, Çair.

Në njëvjetorin e Qeverisë, kryetari i Aleancës për Shqiptarët (ASH), Arben Taravari, i cili e braktisi atë para dy muajsh, shprehet se VLEN, nga një projekt i mrekullueshëm, u shndërrua në një dështim.

Treshja që aktualisht përbën ekzekutivin, Taravari e cilëson si një zhgënjim.

“Sot, në njëvjetorin e qeverisjes nga trojka VMRO–ZNAM–VLEN, nuk më mbetet tjetër veçse, me zhgënjim, të konstatoj se VLEN, nga një projekt i mrekullueshëm, u shndërrua shpejt në një përpjekje të dështuar…”, shkruan kryetari i ASH-së, Arben Taravari, në statusin e tij të fundit në rrjetet sociale.

Më tej në shkrimin e tij, Taravari thotë:
“Duke qenë pjesë e kësaj qeverie për 11 muaj, marr përgjegjësitë e mia dhe ju kërkoj ndjesë që nuk arritëm ta çonim ndryshimin përpara!”

Kreu i ASH-së thekson se ndryshimi nënkupton ndërrim të mentalitetit, jo vetëm të subjekteve politike.

“Ndryshim nuk do të thotë të ndryshojnë emrat e partive, por mentaliteti i tyre!”

Shkrimin e tij, kryetari i ASH-së e mbyll me një mesazh të fuqishëm:

“Gjithsesi, jemi ende në kohë, nëse jemi në vendin e duhur. Prandaj, ftoj çdo parti të bashkohet me forcën e popullit dhe me të drejtat e tij!”

Në fund, Taravari thekson:
“Ngadhnjejmë në tetor, i cili është afër – shumë, shumë afër!”