Aleanca për Shqiptarët shpreh shqetësim lidhur me projektligjin e ri që po “gatuhet” në fshehtësi për lojërat e fatit, i cili pritet të miratohet në ditët në vijim dhe që, ndryshe nga premtimet elektorale të VLEN-it, nuk përmban asnjë masë për mbylljen apo kufizimin e tyre. Përkundrazi, ky ligj fuqizon edhe më tej industrinë e bixhozit në vend.

Premtimet elektorale për mbylljen e lojërave të fatit në afërsi të shkollave dhe zonave të banuara u zhdukën sapo VLEN-i erdhi në pushtet. Projektligji që po përgatitet nuk parashikon as distancë fizike të detyrueshme nga institucionet arsimore, dhe as ndalim të funksionimit të pikave të basteve në zonat urbane me densitet të lartë.

Në vend të masave mbrojtëse për shoqërinë, ligji i ri parashikon vetëm rritje të vlerës së licencave dhe tatimeve, duke e kthyer shtetin – dhe për pasojë qeverinë aktuale – në ortak të drejtpërdrejtë financiar të industrisë së bixhozit.

Qytetarët në çdo lagje, shkollë e qytet janë dëshmitarë të shtimit të vazhdueshëm të kazinove dhe bastoreve, në vend që të shohin mbylljen e tyre, siç ishte premtuar.

Në këtë drejtim, emërimi i Ahmet Miftarit, bashkëpunëtor i afërt i Izet Mexhitit dhe anëtar i Lëvizjes Demokratike, në Bordin e Lotarisë Shtetërore, duke u kontrabanduar si kuadër i VMRO-së, konfirmon kapjen e institucioneve nga klientela politike dhe lidhjet me industrinë e bixhozit.

Po ashtu, heshtja e ministrit të Ekologjisë, Izet Mexhiti, për shkatërrimin masiv të pyjeve nga kompania “Sportlife” – pronë e Gjoko Sterjoskit, një nga emrat më të njohur të industrisë së bixhozit – ngre dyshime serioze për pengmarrjen politike dhe financiare të zyrtarëve të lartë të VLEN-it.

Aleanca për Shqiptarët pyet publikisht drejtuesit e VLEN-it:
• A është e vërtetë informata për premtime të sponsorizimit të fushatës zgjedhore nga kompania “Sportlife”?
• A po ju financojnë portalet, llotaritë dhe subjekte të tjera të industrisë së bixhozit?
• A jeni të përfshirë në hartimin e ligjit të ri për lojërat e fatit, i cili po përgatitet larg syve të opinionit publik dhe që planifikoni ta kontrabandoni në Kuvend së shpejti?

Aleanca për Shqiptarët kërkon informim të plotë të publikut dhe debat të gjerë shoqëror, me qëllim hartimin e një projektligji të ri që ndalon përhapjen e lojërave të fatit në afërsi të shkollave dhe zonave të banuara.

Qeveria dhe VLEN kishin mundësinë të sillnin ndryshim – por zgjodhën të bëhen partnerë të kazinove, në kundërshtim të hapur me premtimet e tyre. Një tjetër gënjeshtër ndaj qytetarëve shqiptarë.

Aleanca për Shqiptarët

PressOnline.al ka siguruar dëshmi ekskluzive që zbulojnë një skandal të rëndë institucional në sektorin e arsimit në Maqedoninë e Veriut. Bëhet fjalë për trajnimet e organizuara nga Byroja për Zhvillimin e Arsimit, të cilat këtë vit janë shndërruar në arenë të diskriminimit të hapur ndaj mësimdhënësve shqiptarë.

Burime të sigurta të redaksisë sonë, të konfirmuara me komunikime të brendshme të vetë pjesëmarrësve, flasin për një përjashtim të plotë të gjuhës shqipe nga seminarët, ndonëse të destinuara për arsimtarë shqiptarë. Trajnimet, të cilat deri më tani janë mbajtur në mënyrë të përbashkët dhe dygjuhëshe, këtë vit po mbahen ekskluzivisht në gjuhën maqedonase, pa ofruar as përkthim, as module në shqip, dhe as përfaqësues nga radhët e pedagogëve shqiptarë.

Kjo qasje përçmuese ka detyruar dhjetëra mësimdhënës shqiptarë të largohen nga seminari në shenjë revolte, duke refuzuar të marrin pjesë në një proces që jo vetëm i përjashton, por i nënçmon në mënyrë sistematike.

Në mesazhet që kanë mbërritur në redaksinë tonë, arsimtarët janë të qartë: “Ky nuk është trajnim, është dhunë institucionale ndaj gjuhës shqipe.” Ata kërkojnë që seminari të anulohet menjëherë dhe të organizohet sërish në gusht, me module të dedikuara në gjuhën shqipe dhe me trajnerë shqiptarë që njohin kontekstin kulturor dhe arsimor të shqiptarëve.(PressOnline.al)

Ministri i Administratës publike, Goran Minçev sot ka goditur sërish partnerët shqiptarë të koalicionit, Mexhitin, Kasamin dhe Ibrahimin.

Në konferencë për shtyp në një vit qeverisje, Minçev sot paralajmëroi se në të ardhmen punësimet në administratën publike do të bëhen vetëm sipas numrit të banorëve “rezident” nga regjistrimi i vitit 2021 të popullatës edhe pse metodologjinë e ndarjes në “rezident” dhe “jo rezident” e shfuqizoi Gjykata Kushtetuese.

Aleanca për Shqiptarët paralajmron se me deklarimin e sotëm të Minçevit i cili vjen nga paria “ZNAM”, përfaqësimi i shqiptarëve nëpër institucionet publike gjatë punësimeve të ardhshme në vend të 29,5% do të ulet në 19%, gjë e cila edhe tashmë është duke ndodhur.

Pyesim publikisht përfaqësuesit e “VLEN” në këtë Qeveri monoetnike pse heshtin ndaj këtyre deklarimeve, kujtë i shërbejnë ata dhe çfarë fshihet pas gjithë kësaj, cili është pazari i Mexhitit, Kasamit dhe Ibrahimit me partitë maqedonase që janë në koalicion e me të cilat drejtpërdrejtë dëmtojnë Shqiptarët.

Aleanca për Shqiptarët rithekson që sa më shpejtë të sillet Ligji për Përfaqësim të Drejtë dhe Adekuat të cilin ua lamë të gatshëm dhe mos lejohet akoma që Shqiptarët të përjashtohen nga institucionet publike gjatë punësimit.

Poashtu, i bëjmë thirrje “VLEN”-it që në vend të konferencave qesharake për regjistrimin e vitit 2021 të cilin, një pjesë e tyre e kishin votuar, të marrin masa adekuate për të mbrojtur përfaqësimin adekuat të shqiptarëve.

Për këtë situatë diskriminuese ndaj shqiptarëve që u bënë kjo qeveri, Aleanca për Shqiptarët tashmë ka vendosur kontakte me të gjitha përfaqësitë diplomatike në vend nga të cilat kërkojmë ndërhyrjen e tyre sa më parë. Ndërkohë, i bëjmë thirrje përfaqësuesve shqiptarë në Qeveri të reflektojnë dhe mos lejojnë “Botën Serbe” të cilën e noton edhe Raporti i fundit nga KE-ja.

Aleanca për Shqiptarët