Në një zhvillim të bujshëm politik dhe ligjor, koalicioni VLEN ka dalë me një komunikatë të ashpër duke e cilësuar miratimin e Projektligjit për Lojërat e Fatit si “hapin më vendimtar kundër karteleve të bixhozit” në vend. Por, vetëm pak orë më pas, Aleanca për Shqiptarët ka reaguar fuqishëm, duke e cilësuar ligjin si një mbulesë për krijimin e një monopoli shtetëror të bixhozit, të kontrolluar nga strukturat politike dhe klienteliste të qeverisë, siç e quan ASH, FLEN, transmeton Flaka.

VLEN: Po e thyejmë rrethin vicioz që shndërroi varfërinë në valutë për kartelet e bixhozit

Sipas VLEN-it, miratimi i projektligjit është hapi i parë drejt çmontimit të perandorisë së bixhozit, për të cilën ata fajësojnë BDI-në dhe qeveritë e kaluara. “Trashëguam një shoqëri të pushtuar nga kazinot dhe bastoret, me mbi 7,000 aparate VLT që zbraznin pa mëshirë xhepat e qytetarëve,” thekson deklarata.

VLEN njofton se me këtë ligj:

Do të hiqen 4,000 aparate, duke reduktuar infrastrukturën e bixhozit me 70%;
Ndalohet çdo formë reklame për lojërat e fatit;
Krijohet një zonë mbrojtëse prej 500 metrash rreth shkollave;
Nuk do të ketë më licenca për degë të pafundme të bastoreve;
Rriten tarifat dhe detyrimet tatimore, ndërsa parashikohen masa penale dhe konfiskim për shkelësit;
Janë bllokuar mbi 200 faqe ilegale online, që shndërronin shtëpitë e qytetarëve në kazino virtuale.
“Po e zhvillojmë këtë luftë për familjet dhe të ardhmen që ua kemi borxh brezave tanë. Ky është fillimi i një epoke të re, ku kazinot nuk do të kenë më vend mes nesh,” përfundon VLEN.

ASH: Mexhiti, garantues i industrisë së bixhozit – jo luftëtar kundër saj

Por Aleanca për Shqiptarët nuk e pranon këtë narrativë. Në një kundërpërgjigje të fortë publike, ASH e quan këtë projektligj një iluzion të rrezikshëm, që në realitet forcon industrinë e bixhozit në emër të “rregullimit”.

“Izet Mexhiti nuk është armiku, por garantuesi më besnik i industrisë së bixhozit në vend. Në vend të reformës kemi riciklim të figurave që prej vitesh shërbejnë oligarkëve,” akuzon ASH, duke shtuar:

“Në çdo hallkë të kësaj skeme – nga Lotaria Shtetërore te koncesionet në Çair e deri te bastoret nëpër qytete – del emri i Mexhitit.”

Emërime të dyshimta dhe kapje të institucioneve publike

ASH hedh dritë mbi emërimin e Ahmet Miftarit si zëvendësdrejtor i Lotarisë Shtetërore, të cilin Mexhiti e prezantoi si kuadër të VMRO-së, por që sipas ASH-së është “bashkëpunëtor i ngushtë i Mexhitit dhe kuadër i Lëvizjes Demokratike.”

“Përfshirja e familjarëve të tij në Bordin Drejtues të Lotarisë dëshmon për një kapje të plotë të këtij institucioni, tashmë të shndërruar në vegël klienteliste.”

Rasti në malin Kozhuf: Bastoret përballë ekologjisë

ASH denoncon edhe heshtjen e Mexhitit përballë shkatërrimit të pyjeve në malin Kozhuf nga kompania e Gjoko Sterjoskit, pronar i rrjetit të njohur të bastoreve “Sportlife”.

“Kjo heshtje nuk është pasivitet – është kompromis,” thekson ASH, duke akuzuar se ekologjia po sakrifikohet në emër të interesave të bixhozit.

Kujtesë për të kaluarën: Çairi dhe Muminoviç

ASH përmend edhe lidhjet e mëhershme të Mexhitit me Rafet Muminoviç, një figurë kontraverse në industrinë e bixhozit. Sipas Aleancës, gjatë mandatit të tij në Çair, Mexhiti i dha Muminoviçit koncesione për pika bastesh dhe kazino në hapësira publike, përfshirë edhe stadiumin e Çairit.

Neni 24 – “hajmali” për bastoret pranë shkollave

ASH veçon si më problematik nenin 24 të projektligjit, i cili sipas tyre “dëshmon mungesë të plotë vullneti për mbylljen e bastoreve pranë shkollave.” Ky nen:

Parashikon distancë 500m vetëm për kazinot, jo për bastoret;
Ndalon vetëm pajisjet elektronike në bastore pranë shkollave, jo vetë aktivitetin e basteve;
Ia lë matjen e distancës kompanive private, duke hapur mundësi për manipulim;
Vendimmarrja për distancën i lihet Agjencisë së Kadastrës, jo institucioneve arsimore apo komunave.
ASH: Lufta e vërtetë bëhet me ligje të qarta dhe vullnet politik, jo me paravanë të industrisë

Në përmbyllje, Aleanca për Shqiptarët thekson:

“Lufta kundër bixhozit nuk bëhet me statuse në Facebook. Bëhet me ligje të qarta, kontrolle të rrepta dhe vullnet të sinqertë politik.”

Ata kërkojnë mbyllje të plotë, të pakushtëzuar dhe pa asnjë përjashtim të të gjitha formave të lojërave të fatit në afërsi të shkollave dhe lagjeve të banuara, si dhe transparencë të plotë për çdo licencë dhe vendimmarrje.

Artikulli thellon debatin mes dy kampeve shqiptare në pushtet dhe opozitë, ku ndërsa VLEN kërkon të mbajë flamurin e reformës, ASH kërkon të ekspozojë fasadën dhe lidhjet e fshehta që, sipas saj, e ushqejnë industrinë e bixhozit në Maqedoninë e Veriut. Flaka