Ngjarja e djeshme në Kumanovë, ku një ndeshje basketbolli u njollos nga thirrje ekstremisht fyese dhe përjashtuese ndaj shqiptarëve, është e papranueshme dhe një kujtesë se rruga drejt një shoqërie të drejtë, gjithëpërfshirëse dhe të respektit të ndërsjellë kërkon angazhim të pandërprerë. Kështu reagon kryetarja e Parlamentit të Shqipërisë, Elisa Spiropali, ndërsa kërkon njëkohësisht reagim edhe më fortë publik të zyrtarëve më të lartë të vendit mik.

Reagimi i plotë i kryeparlamentares shqiptare, Elisa Spiropali:

Ngjarja e djeshme në Kumanovë, ku një ndeshje basketbolli u njollos nga thirrje ekstremisht fyese dhe përjashtuese ndaj shqiptarëve, është e papranueshme dhe një kujtesë se rruga drejt një shoqërie të drejtë, gjithëpërfshirëse dhe të respektit të ndërsjellë kërkon angazhim të pandërprerë.

Gjuha e urrejtjes që nxit dhunën, konfliktin etnik dhe racizmin, nuk ka vend në asnjë hapësirë publike, e aq më pak në sport, që në thelb të tij mbart frymën e bashkimit, të bashkëpunimit, të lojës së ndershme dhe të respektit ndaj tjetrit.

Vlerësoj reagimin e institucioneve të RMV, duke kërkuar njëkohësisht reagim edhe më fortë publik të zyrtarëve më të lartë të vendit mik.

Bashkëjetesa ndëretnike në Maqedoninë e Veriut është një vlerë e përbashkët në rrugën europiane, që duhet ruajtur dhe kultivuar me përgjegjësi nga të gjithë faktorët në rajon, përmes veprimit, qëndrimeve dhe shembullit.

Sjellja korrekte në fusha, në tribuna dhe në institucione flet shumë për vizionin tonë për të ardhmen.

Shqipëria dhe shqiptarët mbeten të palëkundur në promovimin e një bashkëjetese model dhe larg ndasive të dala mode e boje.

Sekretari i përgjithshëm i Aleancës për Shqiptarët, dhe kandidati për kryetar komunë të Seajat, Blerant Ramadani ka reaguar ashpër pas ngjarjeve të mbrëmshme në Kumanovë, ku gjatë një ngjarjeje sportive u dëgjuan thirrje me përmbajtje të rëndë urrejtjeje etnike kundër shqiptarëve.

“Në vend që të ishte arenë sporti, Kumanova mbrëmë u shndërrua në skenë të urrejtjes së paprecedent, me thirrje si ‘Shqiptari i mirë është i vdekur’,” deklaroi Ramadani, duke theksuar se këto ndodhën në prani të Kryeministrit dhe zyrtarëve më të lartë të shtetit.

Sipas tij, heshtja e institucioneve nuk mund të konsiderohet thjesht pasivitet. “Është bashkëpërgjegjësi morale dhe politike,” u shpreh Ramadani.

Ai kërkoi një hetim urgjent, ndëshkim shembullor dhe reagim institucional të menjëhershëm, duke e quajtur të papranueshme që në një shtet që aspiron anëtarësimin në Bashkimin Evropian, gjuha e urrejtjes të tolerohet, relativizohet apo të kalojë në heshtje.

“Bashkëjetesa nuk është opsion – është detyrim kushtetues dhe vlerë europiane. Dhe ne nuk do të heshtim,” përfundoi Ramadani.

“Thirrjet “dhoma gazi për shqiptarët” gjatë ndeshjes së basketbollit mes Maqedonisë së Veriut dhe Rumanisë janë fyerje raciste, fashiste dhe të papranueshme në çdo shoqëri normale.

Kërkojmë ndëshkim të menjëhershëm për organizatorët dhe autorët e këtij akti.
Heshtja është bashkëfajësi!” ka shkruar sekretari i përgjithshëm i BDI-së, Faton Ahmeti.

https://www.facebook.com/share/p/1AkWiLyW9p/