Parlamenti i Sllovakisë votoi një amendament në kushtetutë që njeh vetëm dy gjini, së bashku me masa të tjera që kritikët thonë se mund të shkelin detyrimet ndërkombëtare të vendit dhe të minojnë mbrojtjen e të drejtave të njeriut. Amendamenti, i cili u hartua nga qeveria e kryeministrit Robert Fico, kërkonte një shumicë prej tre të pestash.

Ai kaloi me 90 vota në Këshillin Kombëtar me 150 vende, me 12 ligjvënës nga opozita konservatore që ndihmuan koalicionin qeverisës të fitonte votimin. Kushtetuta e ndryshuar tani njeh vetëm dy gjini, mashkull dhe femër, dhe thotë se Sllovakia ruan sovranitetin në çështjet e identitetit kombëtar, i cili nuk është përcaktuar konkretisht, veçanërisht në çështjet themelore kulturore-etike.

Amendamenti gjithashtu e bën pothuajse të pamundur për këdo tjetër përveç çifteve të martuara të birësojnë fëmijë. Kushtetuta e kishte përcaktuar tashmë martesën si një bashkim unik midis një burri dhe një gruaje. Tani kërkohet pëlqimi i prindërve për akses në edukimin seksual dhe garantohet paga e barabartë për burrat dhe gratë. Ministri i Drejtësisë Boris Susko i tha parlamentit se amendamenti duhet të nxisë vlerat tradicionale. Ndërsa Amnesty International e dënoi këtë veprim.

“Sot, qeveria sllovake zgjodhi të ndiqte shembullin e vendeve, si Hungaria, politikat e të cilave kanë çuar në një erozion të të drejtave të njeriut”, tha ajo në një deklaratë.

Komisioneri për të Drejtat e Njeriut i Këshillit të Evropës, Michael O’Flaherty, më parë u bëri thirrje ligjvënësve të mos u jepnin dritën e gjelbër ndryshimeve. Ai tha se ato mohojnë realitetet e personave transgjinorë dhe interseksualë dhe mund të ndikojnë në garancitë e të drejtave të njeriut, siç është qasja në njohjen ligjore të gjinisë.

“Përpjekja për të mos zbatuar të drejta specifike sepse ato prekin ‘identitetin kombëtar’ do të ishte thelbësisht e papajtueshme me detyrimet ndërkombëtare të Republikës Sllovake”, shtoi ai.

Fico ka qenë prej kohësh një figurë përçarëse, si në vend ashtu edhe në të gjithë Evropën. Kritikët e tij pretendojnë se nën sundimin e tij, Sllovakia ka braktisur kursin e saj pro-perëndimor dhe është anuar më shumë nga Moska, në një mënyrë të ngjashme me Hungarinë nën kryeministrin Viktor Orbán. Gjithashtu Fico ka refuzuar të bashkohet me pjesën tjetër të BE-së në vendosjen e sanksioneve ndaj Rusisë në përgjigje të pushtimit të plotë të Ukrainës dhe ka thënë se Ukraina nuk do të ftohet të bashkohet me NATO-n.

Kryetari i Aleancës për Shqiptarët, Arben Taravari, ka kritikuar hapur disa zëvendësministra të koalicionit VLEN, duke i akuzuar për mungesë angazhimi dhe papërgjegjësi institucionale.

Duke folur në Debat në SHENJA, Taravari tha se një pjesë e zëvendësministrave nuk kanë as prezencë të rregullt në zyrat e tyre dhe madje disa nuk kanë as infrastrukturën bazë për të ushtruar detyrën.

“Kemi zëvendësministra që nuk shkojnë as në punë. Disa shkojnë vetëm një herë ose dy herë në javë. Nuk është vetëm një ose dy, janë shtatë,” deklaroi Taravari.

Ai shtoi se vetëm tre prej tyre kanë qenë aktivë dhe kanë treguar interes real për detyrën që mbajnë. “Tre zëvendësministra kanë qenë aktivë, të cilët janë interesuar. Disa nuk kishin as zyra, as veturë zyrtare nuk kishin. Ata e dinë vetë se kush janë,” u shpreh Taravari me ironi. /SHENJA/

Kryetari i Aleancës për Shqiptarët, Arben Taravari, deklaroi se disa nga figurat aktuale të koalicionit VLEN kishin shprehur gatishmëri për të marrë mbështetjen e BDI-së në zgjedhjet për komunën e Likovës.

Në emisionin “Debat në SHENJA”, Taravari përmendi konkretisht Nexhmedin Sadikun, kandidatin aktual të VLEN-it për Likovën, si dhe Omer Ajdinin.

“Nexhmedin Sadiku, kandidati për Likovë, erdhi në zyrën time dhe tha se mund të jetë kandidat i pranueshëm edhe për BDI-në, edhe për Aleancën. E njëjta gjë vlen edhe për Omer Ajdinin. Para disa ditësh, në një restorant në Shkup, në prani të dy shokëve të tij, e pranoi se kishte qenë i gatshëm të dilte si kandidat i përbashkët me BDI-në,” u shpreh Taravari.

Ai gjithashtu përmendi rastin e Rexhail Qerimit, duke theksuar se në atë kohë Izet Mexhiti ishte nënkryetar i BDI-së dhe sipas tij, nuk kishte ndërmarrë asnjë hap për ta kundërshtuar mbështetjen ndaj kandidaturave të tilla.