Nga Kim Mehmeti

Shpesh më ndodhë që posa të arrijë më Tiranë, i pari që më kujtohet të jetë Andi Bejtja. Mbase pse pas rënies së murit të Xhaxhit Enver, ai është shqiptar i parë i mëmëdheut me të cilin jam njoftuar. Asokohe të dy ishim edhe më të ri edhe më të bukur.
Aq më shumë ai ishte edhe më i ri se unë, i mençur dhe gjithmonë i buzëqeshur. Ato vite ai e botoi përmbledhjen e parë me poezi e unë thash se ato poezi lajmëronin ardhjen e një poeti të madh. Sot jam edhe më i bindur se Andi është nga ata poet që dëshmojnë se, njësoj siç nuk matet jeta me vitet sa ke jetuar, por me përjetimet dhe ngjarjet që ke përjetuar, edhe vlera e një krijuesi nuk matet me numrin e veprave që ka botuar, ngaqë shpesh herë mjafton edhe një poezi e vetme, si për shembull poezia e tij ‘Atdhedashuri’, e jo më një përmbledhje me poezi, që të mbetesh si vlerë e dalluar e tërësisë letrare të një populli.
Kohëve të fundit Andin e kujtojë edhe sa herë që më shtrëngon diçka në gjoks dhe kur më përfshin një trishtim që nuk ka të bëjë me frikën nga vdekja, por me të jetuarit në shoqëri ku te gjallit i jepen vetëm kurora me thera e sharje, e të vdekurin e mbulojnë me lëvdata e buqete me lule aq sa të të duket se flasin për ndonjë të vdekur të imagjinuar, për çka dua ta lus atë të mos lejojë që sharjet e për së gjallit ndaj meje të përkthehen në lëvdatat të pasvdekjes. Ndërkohë ndjej keqardhje pse Andi e la pas dore poezinë dhe iu dorëzua mjeshtërisë të ngritjes së mediave elektronike. Me çka mbeti themeltar thuajse i të gjitha televizioneve që sot mburren me madhështinë e vet, e që në mas të madhe atë ia kanë borxh edhe Andit.
Dhe nga do që të shkonte, ai nuk harronte të më lajmërohej e të më ofronte bashkëpunim e madje edhe që të drejtoja ndonjë emision timin, nëse atë e dëshiroja. E unë gjithmonë ia thosha të njëjtën: Në emër të miqësisë sonë do pranoja të bëhem edhe rojtar i shtëpisë publike që ti do e hapje, por kursem nga një obligim i tillë sepse një katundari si unë nuk i jepen në duar kurvat e qytetit! Në të vërtet ai është nga ata miq që nuk presin t’u kërkosh diçka, por gjithmonë të afrojnë më shumë seç e meriton. Siç ma ofronte Andi sigurinë gjatë viteve kur në Maqedoni të gjithë njësoj nuk më donin e kur me ofertat e veta për t’u angazhuar në televizionet që ai drejtonte sa nuk më thoshte: sa të më kesh mua në Tiranë s’ke pse i nënshtrohesh Shkupit për një pagë mujore.

Me çka ai dhe dy tre të tjerë të mëmëdheut, më mundësonin të mos dorëzohesha, të qëndroja e të mbetesha atë që doja të jem. Vetëm me ardhjen e tij në TV Syri nuk kisha ku të ‘ikë’. Edhe atë jo pse besoja se do jem ndonjë vlere e shtuar e këtij televizioni, por pse e dija se Andit i ngutej që sa më shpejt ta mbush me diçka atë ekran. Thënë edhe më qartë, pas njoftimit tonë në Tiranë kur unë isha flokë gjatë e ai më i buzëqeshur se sot, ne vazhduam të shkojmë poshtë e lartë nëpër jetë, por duke mbetur gjithmonë këtu ku jemi edhe sot: miq të përjetshëm.

Kryetari aktual i Komunës së Tetovës dhe kandidati i koalicionit VLEN për një mandat të dytë, Bilall Kasami, ka mbajtur sonte një takim me Forumin e Grave të VLEN-it, takim i cili është zhvilluar në ambientet zyrtare të komunës – konkretisht në sallën e Këshillit Komunal të Tetovës, shkruan Flaka Media

Në rrjetet sociale, vetë Kasami ka ndarë pamje dhe përmbajtje nga ky aktivitet, duke e prezantuar si një tubim partiak mobilizues në funksion të fushatës zgjedhore të tetorit. Ky veprim përbën një shembull të qartë të keqpërdorimit të hapësirave dhe resurseve institucionale për qëllime politike dhe partiake, në kundërshtim me normat e një administrate publike neutrale dhe të paanshme.

Praktika të tilla dëmtojnë integritetin institucional dhe krijojnë terren të pabarabartë në garën zgjedhore, ndërkohë që ngrejnë shqetësime serioze për respektimin e standardeve demokratike dhe ligjore. Institucionet përkatëse mbikëqyrëse dhe të drejtësisë duhet të reagojnë urgjentisht, të hetojnë këtë rast dhe të marrin masa konkrete për të ndaluar keqpërdorime të tilla në të ardhmen.

Ambientet komunale janë prona publike dhe nuk mund të vihen në shërbim të interesave të një subjekti politik apo kandidati të caktuar. Në një kohë kur pritet që fushata zgjedhore të zhvillohet në frymën e barazisë, transparencës dhe respektimit të ligjit, veprime të tilla janë të papranueshme dhe përbëjnë një precedent të rrezikshëm për procesin demokratik.

Ky rast, paraqet lëndë për Komisioni. Shtetëror për Parandalimin e Korrupsionit, pasi ka konflikt interesash. Nuk lejohet përdorimi i automjeteve zyrtare, hapësirave publike, mjeteve teknike të institucioneve për qëllime partiake. Kjo parashikohet në Ligjin për Zgjedhjet dhe në rregullat e Komisionit Shtetëror të Zgjedhjeve (KSHZ).

Po ashtu, ndalohet keqpërdorimi i administratës shtetërore për tubime, shpërndarje materialesh apo presion politik mbi punonjësit. Qëllimi i këtyre ndalesave është që pushteti aktual të mos ketë përparësi të padrejtë ndaj kundërshtarëve politikë. /Flaka Media/

Të largohesh nga vendi për një jetë më të mirë. Kështu janë shprehur një përqindje e lartë e popullsisë në anketën e zhvilluar nga Banka Qendrore e Austrisë në vendet e Evropës, Qendrore, Juglindore dhe Lindore CESEE (Bullgari, Çeki, Hungari, Poloni, Rumani, Shqipëri, Bosnjë, Maqedonia e Veriut dhe Serbi). Rezultatet treguan se ndonëse dëshira për të emigruar është në rënie në shumicën e vendeve të rajonit, Maqedonia e Veriut vazhdon të qëndrojë ndër vendet me përqindjen më të lartë të popullsisë që synon largimin. Mbi 11 për qind e të anketuarve janë shprehur se synojnë largimin nga vendi gjatë vitit 2025. Pas Maqedonisë renditet Shqipëria (me 10 për qind), shkruan gazeta Koha.

“Në vitin 2024, numri më i lartë i individëve me qëllime migrimi në 12 muajt e ardhshëm u regjistrua në Maqedoninë e Veriut dhe Shqipëri, të ndjekura nga Serbia, Rumania, Bosnja dhe Hercegovina, Bullgaria dhe Polonia. Shkallët më të ulëta u regjistruan në Hungari dhe Çeki Rënia e numrit të njerëzve që synojnë të emigrojnë në të ardhmen e afërt është një lajm i mirë për vendet e EQLJ-së, duke pasur parasysh se emigrimi ka përkeqësuar trendet demografike dhe disponueshmërinë e fuqisë punëtore të kualifikuar në shumë vende në të kaluarën”,thuhet në anketë, e cila kishte si qëllim përdorimin e euros në këto vende, përfshiu edhe pyetjet për emigracionin.

Vala e vitit 2024 e Anketës Euro të OeNB përfshinte gjithashtu një pyetje që na lejon të vlerësojmë hapjen ndaj migrimit në përgjithësi. Përveç qëllimeve të migrimit në të ardhmen e afërt, njerëzve iu kërkua se sa të ngjarë ishin të emigronin përkohësisht ose përgjithmonë brenda dhjetë viteve të ardhshme. Grafiku 10 tregon se kjo është një pjesë shumë më e konsiderueshme e popullsisë, përkatësisht afërsisht 10% mesatarisht në të gjitha vendet.

Grafiku tregon gjithashtu ata që përgjigjen me “nuk e di” në njërën nga pyetjet në lidhje me qëllimet e migrimit. Mesatarisht, kjo është një tjetër 8.5% e popullsisë, të cilët me sa duket nuk e përjashtojnë kategorikisht mundësinë e emigrimit në një pikë të ardhshme të jetës së tyre. Grafiku ilustron dallime të theksuara midis vendeve. Në Shqipëri, njerëzit me qëllime migrimi në të ardhmen e afërt ose të largët përbëjnë 33% të popullsisë. Në Çeki dhe Hungari, shifra përkatëse është vetëm 7%. Sa i përket arsyeve të emigrimit të përshkruara në grafikun 11, shumica e njerëzve deklarojnë se duan të emigrojnë për arsye që lidhen me punësimin (46% në të gjitha vendet).

Kjo pasohet nga kushte më të mira jetese jashtë vendit si arsyeja e dytë kryesore (26% në të gjitha vendet). Kështu, përmirësimet në kushtet e tregut të punës dhe në shërbimet publike – si arsimi ose kujdesi shëndetësor – mund të jenë thelbësore në uljen e mëtejshme të qëllimeve të migrimit në CESEE ose në nxitjen e kthimit të njerëzve.