Reagim

Aleanca për Shqiptarët – Dega Tetovë dënon ashpër deklaratën fyese të kryetarit të Komunës së Tetovës, Bilall Kasami, i cili ka cilësuar Republikën e Shqipërisë si “shtet të dobët për ne” dhe ka sulmuar politikisht Ambasadorin e saj në Shkup, z. Denion Meidani.

Kjo gjuhë është e papranueshme nga një kryetar që moti kohë nuk përfaqëson tetovarët dhe fyen jo vetëm shtetin shqiptar si një vend aleat i NATO-s dhe partner i Bashkimit Evropian, por edhe dinjitetin e shqiptarëve kudo që ndodhen. Shqipëria ka qenë dhe mbetet mbështetëse e palëkundur e shqiptarëve jashtë kufijve të saj dhe përfaqëson aspiratat tona për zhvillim, integrim dhe dinjitet kombëtar. Deri sa Bilall Kasami mbetet mbështetës vetëm i interesave të VMRO-DPMNE-së, mos emërimin e rrugëve me emra të figurave të çmuara të historisë shqiptare, zhdukjes së gjurmëve të masakrës së “Monopolit”, rreshtimit në Qeverinë që raporti i BE-së e quan “nën ndikimin serbo-rus” dhe së fundmi ofendimin publik ndaj Republikës së Shqipërisë.

Sulmet ndaj ambasadorit Meidani janë sulme ndaj shtetit shqiptar dhe kërkojnë përgjegjësi publike. I bëjmë thirrje Bilall Kasamit të tërheqë deklaratat e tij dhe të kërkojë falje publike para çdo qytetari shqiptar.

Aleanca për Shqiptarët – Dega Tetovë qëndron fuqishëm në mbrojtje të Shqipërisë si shtet europian, demokratik dhe faktor stabiliteti në rajon si dhe në krah të punës së palodhur të Ambasadorit Denion Meidani.

Burime të larta të sigurta të PressOnline.al pranë Frontit Europian, por edhe Frontit Kombëtar të partive shqiptare në Maqedoninë e Veriut, hedhin poshtë kategorikisht çdo spekulim për largimin e deputetëve nga këto struktura politike.

“Jo vetëm që nuk ka asnjë largim, por ne jemi në konsolidim të mëtejshëm të radhëve tona. Deputetët janë të bashkuar dhe të përkushtuar në qëllimin tonë të përbashkët – mbrojtjen e të drejtave të shqiptarëve dhe përshpejtimin e integrimit europian të vendit”, kanë deklaruar burimet tona.

Sipas këtyre burimeve, Fronti Europian dhe ai Kombëtar e konsiderojnë veten si platforma të hapura për çdo deputet shqiptar që është kundër diskriminimit etnik dhe politikave që pengojnë rrugën europiane të Maqedonisë së Veriut.

“Dera jonë është e hapur për çdo deputet që nuk e pranon përuljen e shqiptarëve dhe që refuzon stagnimin eurointegrues të vendit. Ky është një front politik i vlerave, jo i interesave të ngushta personale”, thuhet më tej në qëndrimin e siguruar nga PressOnline.al

Ky zhvillim vjen në një kohë kur skena politike shqiptare në vend është nën zhurmën e spekulimeve për ndarje dhe formacione të reja politike, por duket se brenda Frontit mesazhi është i qartë: unitet dhe orientim drejt Perëndimit.(PressOnline.al)

Kryetari i Aleancës për Shqiptarët, Arben Taravari thotë se ditë më parë realizoi takim me kryeministrin e Shqipërisë, Edi Rama në Çarshinë e Shkupit. Takimi ishte i natyrshëm mes përfaqësuesve politikë shqiptarë, në një moment të caktuar, në një kontekst që nuk është përgatitur si ngjarje protokollare.

“Megjithatë, për çdo ndjeshmëri që është shkaktuar te qytetarët tanë, unë dua ta them qartë se Aleanca për Shqiptarët dhe unë personalisht nuk do të pranojmë kurrë që dinjiteti i shqiptarëve në Maqedoninë e Veriut të shihet si i dorëzuar apo i përbuzur.

Respekti për përfaqësuesit institucionalë të Shqipërisë është i natyrshëm për ne si shqiptarë, por ne kërkojmë dhe presim që ky respekt të jetë gjithmonë i ndërsjellë. Marrëdhëniet ndërshqiptare duhet të ndërtohen mbi barazi, mbi dëgjim të ndërsjellë dhe mbi interes të përbashkët kombëtar.

Dhe në fund, dua të theksoj edhe një herë se Aleanca për Shqiptarët është dhe do të mbetet një forcë me orientim të qartë kombëtar. Shqiptarët si shtetformues në këtë vend besojmë në familjen, në identitetin tonë, në historinë dhe në të drejtën për të qenë zot të fatit tonë politik. Nuk jemi instrument i projekteve personale apo të huaja, por jemi këtu për të ndërtuar bashkë, me ju dhe për ju, një të ardhme ku shqiptari ndjehet krenar në vendin e vet”, thotë Taravari.