Zëvendësdrejtori i Drejtorisë së Doganave, Garip Kaba për TV21 foli edhe për importin e veturave të përdorura në Maqedoninë e Veriut,. Kaba thotë se pavarësisht zërave të ndryshëm, deri tani nuk ka nismë për ndryshimin e çmimeve për tarifat e importit.

“Nuk ka diçka të tillë. Nuk ka iniciativë që do të jepte mundësi, do të jepte para opinionit informacion se do të ketë ndryshime të tarifave doganore për makinat e përdorura. Njëherë për njëherë, nuk ka diçka të tillë. Ne jemi institucion që funksionojmë në kuadër të Ministrisë së Financave, edhe iniciativat e ndryshme sigurisht që burojnë për këtë sistem, burojnë nga Ministria, por edhe nga Qeveria. Ne jemi aty për të dhënë propozime, dhe mundësisht ato do të kualifikohen, do të analizohen dhe në kuadër të Qeverisë, ndoshta, ndoshta, nuk po them tani, por në të ardhmen”, tha mes tjerash Kaba.

Kaba: shqiptarët në Drejtorinë e Doganave janë të përfaqësuar me 24,4%
Kaba tha se, shqiptarët në këtë drejtori janë të përfaqësuar me 24,4 për qind ose me 1186 të punësuar, sa është numri i përgjithshëm i shqiptarëve në këtë drejtori. Kaba tha se, kjo përqindje është rritur në dy vitet e fundit.
“Po nga numri i përgjithshëm, 1186 të punësuar. Në Drejtorinë e Doganave, shqiptarët janë të përfaqësuar me 24,4 për qind. Kjo përqindje është rritur sidomos në dy vitet e fundit”, shtoi më tej Kaba.

Zëvendësministri i Bujqësisë, Flakron Bexheti nga radhët e Aleancës për Shqiptarët ka njoftuar se Ditët Informuese për IPARD III po hyjnë në fazën përmbyllëse, duke ofruar mundësi të rëndësishme për përfituesit e mundshëm të këtij programi.

Gjatë këtyre takimeve, shumë fermerë dhe sipërmarrës bujqësorë janë informuar mbi procedurat dhe mundësitë e financimit përmes IPARD III, me qëllim zhvillimin e bizneseve të tyre.

Më 13 mars (e enjte) do të mbahen edhe dy takime të rëndësishme:

Kumanovë – ora 11:00, në Shtëpinë e Zejtarëve
Likovë – ora 14:00, në ndërtesën komunale

“Ftojmë të gjithë përfituesit e interesuar nga Kumanova dhe Likova të marrin pjesë në këto takime, të informohen dhe të shfrytëzojnë mundësitë që ofron IPARD III për zhvillimin e sektorit bujqësor,” theksoi Bexheti.

Ky program mbështet fermerët dhe sipërmarrësit ruralë në rritjen dhe modernizimin e aktiviteteve të tyre, duke krijuar një perspektivë më të qëndrueshme për zhvillimin e bujqësisë në vend.

Komuna e Gostivarit ka filluar me realizimin e projekteve kapitale infrastrukturore të cilat i fitoi nga thirrja e parë qeveritare. Nga trembëdhjetë, në tre projekte tashmë punimet kanë filluar në terren. Një ndër ato është rruga “13” përballë shkollës së muzikës dhe e cila lidhet me “JNA”-në. Zhvillimin e punimeve nga afër e ka ndjekur një delegacion nga komuna e Gostivarit, drejtuar nga kryetari Valbon Limani. Ai me këtë rast sqaroi se në këtë rrugë zgjerohen punimet nga projekti fillestarë, pasi do të ndërrohet edhe gypi i ujësjellësit në gjatësinë e gjithë rrugës.
“Sot kemi dalur për të inspektuar punimet te një nga 13 projektet që kemi fituar si grante prej Qeverisë. Bëhet fjalë për rrugë ‘13’ ku përveç asflatimit që ishte i paraparë me projektet e Qeverisë, ne do të bëjmë edhe ndërrimin e gypit të ujësjellësit, investim ky nga ana e Komunës së Gostivarit”, deklaroi Valbon Limani, kryetar i Komunës së Gostivarit.
Limani poashtu bëri të ditur se disa nga projektet më të mëdha të financuara nga Qeveria, do të fillojnë të realizohen këto ditë, sikurse është buleradi kryesorë i qytetit dhe rruga “Beliçica”.
“Gjithashtu punohet edhe në dy lokacione të tjera. Për momenin punime zhvillohet te rruga e vjetër e Balindollit dhe te rruga ‘Nikolla Teslla’. Ditëve në vijim do të fillohet edhe në tre lokacione të tjera të punohet. Së shpejti, për dy apo tre javë do të fillojnë edhe dy prej projekteve më të mëdha njëri nga lagja ‘Maleardi’ deri te ura te Gjykata Themelore, dhe projekti me Bankën Botërore që kemi e që bëhet falë për rrugën ‘Beliçica’”, deklaroi Valbon Limani, kryetar i Komunës së Gostivarit.
Vendosja e gyit të ri të ujësjellësit dhe asfaltimi i rrugës “13” pritet të jetë gati nga fundi i prillit. Aty, aktualisht është larguar asfalti i vjetër dhe eskavatori i ndërmarrjes publike “Komunalec” po punonte për rregullimin e instalimeve nëntokësore nga ku do të kalojë edhe gypi i ujësjellësit.
Vlera e investimit të kësaj rruge kap shifrën e 6.5 milionë denarë, prej të cilave 4.5 milionë janë për asfaltim dhe 2 milionë denarë për gypin e ri të ujësjellësit. Ndryshe, 13 projektet e fituara nga Qeveria nga ana e Komunës së Gostivarit janë me vlerë prej afërsisht 2.7 milionë euro. Nga thirrja e dytë qeveritare, ajo pret të fiton edhe 40 projekte të reja.