Të dielën, më 5 korrik, në Teatrin Shqiptar në Shkup, Bekim Fazliu, Orhan Ibrahimi dhe Gazmend Aliu – ish-deputetë të Partisë Demokratike Shqiptare të Menduh Thaçit – pritet të themelojnë një subjekt të ri politik, të cilin e kanë quajtur Lëvizja “ARBËRIA”.

Në një paralajmërim publik, Bekim Fazliu e paraqet këtë iniciativë si një “vetëdije të re” dhe “revoltë ndaj zhgënjimit politik”, duke tentuar të distancohet nga e kaluara politike.

“ARBËRIA nuk është parti. Është vetëdije e re… një organizim i lirë që lind nga shqiptarët dhe punon për shqiptarët”, deklaron Fazliu.

Por burime për Top24 raportojnë ndryshe: sipas informacioneve jozyrtare, qëllimi i vërtetë pas kësaj lëvizjeje është krijimi i një strukture formale politike, e cila pas regjistrimit pritet t’i bashkohet koalicionit VLEN, në një përpjekje për të krijuar perceptimin e rritjes dhe zgjerimit të këtij fronti opozitar.

Kjo manovër, sipas të njëjtave burime, shihet si një përpjekje për të mbuluar përçarjet e brendshme brenda VLEN-it, sidomos për çështjen e kandidatëve për kryetar komunash në zgjedhjet lokale të tetorit.

Kritikët e kësaj nisme vënë në pikëpyetje edhe kredibilitetin moral të figurave të përfshira, duke kujtuar se pikërisht këta ish-deputetë kanë qenë pjesë e strukturave të vjetra politike që sot i sulmojnë.

Ndërkohë që nisma e re synon të projektohet si një alternativë “e pastër”, për shumë vëzhgues politikë, ajo përfaqëson më tepër një recycled version të elitave të vjetra që kërkojnë riintegrim në pushtet përmes rrugëve anësore dhe diskurseve të njohura.

Gazetari dhe analisti i njohur Furkan Saliu ka reaguar ndaj deklaratave të fundit të kryeministrit të Maqedonisë së Veriut, Hristijan Mickoski, i cili në një fjalim të zgjatur kritikoi partitë shqiptare dhe përmendi drejtpërdrejt bashkëpunimin e tyre të mundshëm me VMRO-DPMNE-në në të kaluarën dhe të tashmen.

Në reagimin e tij, Saliu u shpreh me ironi të mprehtë:

“Kur Mickoskit i duhet t’i bindë shqiptarët për kë duhet të votojnë, dije se punët nuk janë mirë.”

Kjo deklaratë vjen si kundërpërgjigje ndaj fjalimit të Mickoskit, ku ky i fundit akuzoi partitë shqiptare se kanë mashtruar votuesit për më shumë se dy dekada dhe fajësoi drejtuesit shqiptarë për rënien e popullsisë në Komunën e Gostivarit.

“Ata që i mashtruan shqiptarët më shumë se 22 vjet, e që janë arsyeja kryesore që në vitin 2002 Komuna e Gostivarit ka pasur 85 mijë banorë kurse në 2021 kishte 26 mijë më pak, sollën metodologji mashtruese. Dhe me kë duhet të bëjnë qeveri? Me VMRO-në sipas tyre ‘antishqiptare’, sepse realiteti është që VMRO-DPMNE-ja do të fitojë”, deklaroi Mickoski.

Deklarata e kryeministrit është lexuar gjerësisht si një përpjekje për të ndikuar në opinionin shqiptar dhe për të justifikuar marrëveshjet e reja politike me disa liderë shqiptarë të opozitës. Por, komenti i Furkan Saliut i ka dhënë një tjetër kthesë debatit, duke vënë në pikëpyetje qasjen e Mickoskit ndaj shqiptarëve si votues dhe si partnerë të koalicionit.

Reagimi i Saliut është përshëndetur në rrjetet sociale nga qytetarë dhe figura publike, të cilët e shohin atë si një zë kritik, të paanshëm dhe të guximshëm në analizën politike në vend. Flaka

Vendimi i Qeverisë për legalizimin e objektit shkollor në fshatin Nerovë të Krushevës, që i hap rrugë arsimimit në kushte të denja për mbi 120 nxënës shqiptarë, ka shkaktuar reagime të përziera – dhe polemika politike.

Deputetja e VLEN-it , Saranda Imeri Stafaj, ka hedhur hije dyshimi mbi rolin e ambasadorit të Shqipërisë në Shkup, Denion Meidani, në këtë zhvillim të rëndësishëm.

“Shkolla në Nerovë u legalizua nga Qeveria VLEN. Nuk e di çfarë kontributi ka dhënë Ambasadori Meidani që po gllabëron meritat!?” – shkroi ajo në rrjetet sociale, duke shtuar me ironi: “Ku ishit deri tani?”

Por faktet flasin ndryshe.

Angazhimi i drejtpërdrejtë i ambasadorit Meidani ka qenë vendimtar në këtë proces. Gjatë një vizite në Nerovë javën e kaluar, ai dëgjoi shqetësimet e banorëve dhe premtoi veprim të menjëhershëm. Dhe e mbajti fjalën.

Në prani të banorëve, ambasadori komunikoi drejtpërdrejt me zëvendëssekretarin për punë të përgjithshme në Qeveri, duke insistuar që çështja e shkollës të futet në rend dite të mbledhjes së ardhshme të ekzekutivit.

Ky angazhim diplomatik prodhoi efekt konkret: Qeveria miratoi vendimin për legalizimin e objektit shkollor dhe regjistrimin e pronës shtetërore në emër të Komunës së Krushevës.

Reagime të shumta në opinionin publik, përfshirë përfaqësues të shoqërisë civile dhe vetë banorët e Nerovës, i janë bashkuar falënderimeve për ambasadorin Meidani dhe kanë kërkuar që suksese të tilla të mos politizohen apo banalizohen.