Kryetari i Aleancës për Shqiptarët, Arben Taravari, ka ngritur shqetësime serioze mbi legjitimitetin e qeverisë aktuale në Maqedoninë e Veriut, duke theksuar se mungesa e përfaqësimit të plotë të shqiptarëve në ekzekutiv përbën një deformim të vullnetit qytetar në një shtet multietnik.

Në një intervistë për median kosovare Nacionale, Taravari deklaroi se përbërja aktuale e qeverisë nuk reflekton përbërjen reale të Kuvendit dhe as të shoqërisë, duke vënë në pah se pjesa dërrmuese e deputetëve shqiptarë ndodhen në opozitë.

“Në një vend ku shqiptarët janë shtetformues, nuk mund të kemi një qeveri që funksionon pa përfshirjen e drejtë të përfaqësuesve të tyre. Deputetët janë zëri i popullit, dhe kur shumica e tyre janë lënë jashtë qeverisë, përfaqësimi bie në krizë legjitimiteti,” u shpreh Taravari.

Ai theksoi se modeli aktual qeverisës rrezikon të thellojë ndasitë etnike dhe politike në vend, duke i lënë shqiptarët në margjinat e proceseve vendimmarrëse, pavarësisht kontributit të tyre të vazhdueshëm në jetën institucionale të shtetit.

Kryetari i Aleancës për Shqiptarët, Arben Taravari, ka folur hapur mbi arsyet që e çuan subjektin e tij të braktisë koalicionin VLEN dhe të ndërpresë bashkëpunimin në kuadër të qeverisë së Maqedonisë së Veriut. Në një intervistë për Nacionale, Taravari tha se vendimi nuk ishte as spontan, as emocional, por i ndërtuar mbi një analizë të gjatë të situatës politike dhe sjelljes së partnerëve të deridjeshëm.

“Kur mungon respekti për qytetarin që të ka dhënë votën, çdo projekt politik humbet kuptimin. Ajo që pamë brenda VLEN ishte arrogancë politike, jo partneritet i barabartë,” deklaroi Taravari.

Ai shpjegoi se vendimi për të dalë me lista të veçanta për zgjedhjet këshilltare nuk u mirëprit nga partnerët e koalicionit dhe, përkundrazi, u shoqërua me akuza dhe tensione që, sipas tij, e bënë bashkëpunimin të pamundur.

Megjithëse i vetëdijshëm se largimi ka shkaktuar zhgënjim te një pjesë e anëtarësisë dhe mbështetësve të koalicionit, Taravari është i bindur se ky është hapi i duhur për të ruajtur integritetin politik dhe për të mos u bërë pjesë e një qeverisjeje që nuk pasqyron vullnetin e plotë të shqiptarëve në vend.

“Aleanca për Shqiptarët do të vazhdojë e vetme në zgjedhjet lokale, me synimin për të forcuar lidhjen me qytetarët dhe për të ndërtuar një alternativë të ndershme përfaqësimi,” përfundoi ai.

Në Maqedoni, tashmë prej 11 muaj në qeverisje është koalicioni VLEN, praktikisht prej zgjedhjeve të 8 majit të vitit 2024 kur arriti të bëjë një rezultat shumë të mirë, fituam 14 dhe të jetë pjesë e Qeverisë. Normalisht, ne me kryeministrin e Qeverisë kishim negociata për disa pika kyçe, të rëndësishme nga programi ynë zgjedhor. Fatkeqësisht pas 11 muajsh konstatojmë se asgjë nga programi ynë nuk arritëm të realizojmë dhe prandaj u larguam nga Qeveria.

Ky sqarim mbi arsyet e largimit të ASH nga Qeveria vjen vetë nga kreu i kësaj partie Arben Taravari.

Ai në një intervistë për televizionin “MCN” në Shqipëri potencoi se partia më e madhe qeverisëse maqedonase VMRO-DPMNE së bashkë me partinë tjetër maqedonase ZNAM kanë 64 deputetë, d.m.th katër më shumë se sa nevojitet për ta formuar Qeverinë dhe se ka pasur tendenca dhe përshtypje nga ana e ASH ka qenë se janë të margjinalizuar dhe të papërfillur.

“Ne si ASH nuk jemi mësuar të jemi në Qeveri dhe të jemi vetëm dekor aty. Prandaj vendosëm të dalim në opozitë dhe të kthehemi te qytetari dhe të bashkëbisedojmë me ata dhe të përgatitemi për zgjedhjet lokale që duhet të mbahen në tetor të këtij viti. Jemi 5 muaj para zgjedhjeve lokale dhe mendoj se duhet të mobilizohet partia sepse për ne shumë e rëndësishme është korrja e fitores në zgjedhjet vendore”, deklaroi Taravari.

Ai shtoi se është hera e parë që katër parti shqiptare të jenë bashkë në qeverisje, por tha se ka pasur një lloj diskoordinimi që nga nëntori, dhjetori dhe është shfrytëzuar prej partisë më të madhe maqedonase.

“Kjo na bëri që ne të sjellim vendimin që të dalim me lista të veçanta për zgjedhjet lokale për këshilltarë komunal, por kjo nuk u pranua kurrë nga partnerët e koalicionit dhe pastaj kishte presione të hatashme ndaj kryeministrit dhe ne vendosëm të shkojmë në opozitë që mos mbetemi vetëm dekor më Qeveri dhe mos realizojmë asgjë prej pikave që i premtuam. Për shembull ishte rruga evropiane që mbetet e bllokuar, decentralizimi i pushtetit lokal, pasi këtu bashkitë kanë shumë pak kompetenca në krahasim me shtetet e rajonit. Pastaj, u shfuqizua mekanizmi i Balancuesit i cili rregullore përfaqësimin e të gjitha etnive që jetojnë këtu dhe ne duhej ta sjelli një ligj për përfaqësim adekuat që nga nëntori dhe ja sot është 16 maj dhe ligji nuk është askund. Ndërkohë kishte punësime nëpër institucionet dhe zakonisht punësoheshin maqedonas dhe shumë pak shqiptarë. Përshtypja te qytetarët ishte se VLENI nuk përfillet në Qeveri ku ishim edhe ne si parti. Ne dolëm prej Qeverisë, i kthehemi popullit dhe organizohemi sa më mirë për zgjedhjet lokale”, tha më tej Taravari.

Ne bëmë një rezultat shumë të mirë prej 107 mijë votash në zgjedhjet parlamentare, nënvizoi më tej kreu i ASH-së, por edhe në ideologji, siç ai potencoi në VLEN kanë qenë inkopaktibil.

“U munduam të jemi bashkë deri për zgjedhjet lokale, por ishte thjeshtë e pamundshme të pranohen ultimatume që të shkohet në zgjedhje siç imponohet prej partnerëve të koalicionit. Partitë tjera vazhdojnë të jenë në pushtet dhe unë ju urojë të kenë suksese të shumta”, tha Taravari.