Connect with us

Lajme

Taravari për Bota Sot: Kurti burrë i rrallë që iu tregoi “të fortëve” se Kosova është shtet: Pritet finale e mirë në dialog

Published

on

Kryetari i partisë Aleanca për Shqiptarët, Arben Taravari, thotë se asociacioni serb ka dëshmuar që është një organizim problematik dhe një asociacion tjetër i bazuar në model të Bosnjës është problem.

Në një intervistë për gazetën ““Bota sot””, Taravari shprehet se sa herë takohen Kurti dhe Vuçiqi në dialog, ai sheh një kryeministër (duke aluduar në Kurtin) dhe një burrë që ka probleme me veten (duke aluduar me Vuçiqin.

Ai uron që Kurti të ketë më shumë durim në dialog, gjersa shton se diplomacia ndërkombëtare do ta kuptojë së shpejti se “jo të gjithë qaramanët zbuten duke i dhënë lodra, e mbi të gjitha Kosova nuk është lodër, është shtet”.

Duke folur rreth zhvillimeve të fundit në veri dhe pranimin e kryeministrit Kurti për zgjedhje të reja, Taravari pohon se ai i ka treguar shteteve të forta në botë, sikur që janë ato amerikane, se Kosova ka dinjitet dhe është shtet, por sipas tij diplomacia botërore po kërkon dëshpërimisht t’i jap fund tensionit në Ballkan.

Taravari ka folur edhe rreth “përkëdheljes” së BE-së dhe ShBA-së ndaj Serbisë si dhe “tentimet” e tyre që ta largojnë atë nga ndikimi rus dhe kinez, gjithashtu edhe për dhunën në kuvendin e Kosovës ditë më parë.

Në intervistë, kryetari i ASH-së ka folur: Edhe rreth bashkëpunimit në mes të Kosovës dhe Maqedonisë së Veriut si dhe sektorin që ka nevojë më tepër të bashkëpunojë.

“Bota sot”: Z. Taravari a i keni përcjell zhvillimet e fundit në Kosovë e veri të saj. Fillimisht zgjedhje, bojkotim, pranim i tyre, protesta të dhunshme për kryetarët e rinj dhe në fund pranimi i kryeministrit Kurti për zgjedhje të reja pas gjithë presionit ndërkombëtar. A mund të na jepni një koment rreth këtyre?

Arben Taravari: Politikë…kjo është përgjigjja e parë, por termi politikë është bërë aq i ndryshëm sa duhet ta specifikoj më detajisht. Kryeministri Kurti si rrallë ndonjë burrë shteti shqiptar i kohërave moderne, i tregoi botës dhe shteteve më të forta në botë sikur që janë ato amerikane, se kemi dinjitetin tonë dhe se Kosova është shtet. Presioni i z. Kurti ndaj ndërkombëtarëve ishte i papritur, i pa llogaritur për ta, dhe pavarësisht se kam objeksionet e mia, në total mendoj se ishte një strategji e shkëlqyer për t’i thënë botës se Kosova duhet trajtuar si një shtet i pavarur dhe i barabartë me cilindo shtet tjetër.

Nga ana tjetër pozita ku ndodhet diplomacia perëndimore, është një nga më të vështirat e hasura pas Luftës së fundit botërore.

Situata në Ukrainë, e ka kushtëzuar shumë sjelljen e fuqive më të mëdha. Ballkani ndërkohë është i njohur në histori si një nga vatrat ku ka nisur Lufta e Parë botërore, dhe ndaj Amerikës dhe Perëndimit nuk i intereson vetëm një Ballkan i Qetë…por nuk duhet ngatërruar koncepti i një Ballkani të Qetë me një Kosovë të Bindur.

Prandaj mendoj se të dyja palët diku shtrënguan, diku liruan, dhe gjendja duket se po shkon drejt një të mire të përgjithshme, që është edhe kuptimi im dhe esencial për politikën.

“Bota sot”: Për situatën në veri ndërkombëtarët “drejtuan gisht” kah Kosova si përgjegjëse për tensionim, madje edhe u sanksionua, në anën tjetër Serbia u amnistua dhe kjo gjë sipas analistëve i jep “forcë” bandave në veri, pse kjo qasje e ndërkombëtarëve ndaj Kosovës?

Arben Taravari: Këtë përgjigje do ta lidh pak me profesionin tim të mjekut. Duke qenë neurolog natyrisht që jam njohës i natyrës njerëzore. Ne kemi një tendencë që gjithnjë t’i kushtojmë vëmendje atij personi i cili krijon situata dramatike.

Dramat e Serbisë në Ballkan për fat të keq kanë shkruar tragjeditë e kohërave moderne. Nga pretendimet e tyre territoriale tokat e Ballkanit kanë kujtime të freskëta lufte. Ndaj Evropa dhe Amerika kërkon që të “zbus” Serbinë duke e trajtuar sjelljen e saj si legjitime dhe të kuptueshme…duket nga larg si një naivitet diplomatik, por le të mos heqim dorë nga besimi në shtetet mike tonat, të cilat mendoj se deri tani nuk e kanë trajtuar mirë këtë çështje, por kjo nuk domethënë që nuk do të kenë një Zgjidhje Finale të mirë…

“Bota sot”: Qasje kritikuese ndaj BE-së e ShBA-së, kanë një pjesë e deputetëve dhe ekspertëve ndërkombëtarë, a largohet Serbia nga ndikimi rus dhe kinez përmes “përkëdheljes” apo si duhet sjellë ndaj saj?

Arben Taravari: Pikë së pari duhet të kuptojmë për hir të korrektësisë se populli serb dhe politika drejtuese serbe janë dy gjëra të ndryshme. Mendoj se populli serb ka afinitet të kuptueshëm me sllavët e tokës së Tolstoit, kurse Aleksandër Vuçiç ka interes të kuptueshëm ndaj Vladimir Putinit. Sa i përket Kinës nuk mendoj se serbët kanë ndonjë afeksion me gjithë respektin për orizaret kineze, por sërish Vladimir Putin ka interes të kuptueshëm ndaj Xi Jinpingut. Pra, diplomacia evropiane dhe amerikane besoj se e kanë të qartë se Vuçiq shkëputet menjëherë nga “pasionet” aktuale politike, nëse interesi i tij njeh më shumë përfitime në një ofertë tjetër. Populli serb ka një lidhje sentimentale me paraardhësit e tyre të Karpateve. Por ky popull është shumë më i mençur se qeveria e tij. Ai as nuk kërkon çudira territoriale dhe as përkrah dhunën e terrorin e Putinit apo më keq të kërcënojë për luftë në mes të paqes. Një baba serb dëshiron më të mirën për djalin e tij, dhe nuk mendoj se vizioni i tij është ta shoh ushtar në front. Kurse krejt ndryshe është vizioni i Vuçiq për fëmijët serbë. Ai ata i ka vetëm mjete për të dalë nga bataku i thellë ku gjendet, kurse nga personaliteti i tij me shqetësime të natyrës klinike (flas me përgjegjësinë që ma jep profesioni im i neurologut), Vuçië e ka të vështirë shumë të shërohet. Ndaj është koha presidentit serb dhe gjithë enturazhit i tij, duhen parë të shkëputur nga populli serb i cili është viktimë e një politike të trishtë Dua të kujtoj thënien e mençur shumë të Presidentit amerikan Tomas Xhefersonit që thotë se një patriot i vërtetë duhet ta mbrojë vendin e tij nga Qeveria e ky është rasti tipik i serbëve dhe qeverisë së tyre.

“Bota sot”: Tensionet në veri kanë bërë që dialogu të ketë ngecje dhe pavarësisht “përpjekjeve” për një takim Kurti- Vuçiq, një gjë e tillë nuk është bërë, çka duhet të presim nga ky dialog?

Arben Taravari: Sa herë Kurti takohet me Vuçiçin unë shoh përpara meje një kryeministër dhe një burrë që ka probleme me veten. Kurti ulet për të fol për shtetin, Vuçiq ulet për të fol për gjendjen e tij psiko-emocionale. Kurti flet për Kosovën, Vuçiq flet për grupin e tij të ngushtë. Kurti përfaqëson Kosovën, Vuçiq përfaqëson një shoqatë fanatike e të rrezikshme veteranësh nga koha e Millosheviçit, që për bela të Serbisë dhe gjithë botës kanë ende poste. Ndaj çfarë të presësh nga takime të tilla?! Kemi një njeri i cili ka qenë pjesë e luftës pushtuese në Kosovë në kohë të Millosheviçit, që ka qenë pjesë aktive e atij grupi që ka vrarë e prerë në Kosovë, që i thotë kryeministrit të atij vendi “dua që të ndërtoj një shtëpi aty, premtoj që “tokën” nuk ta marr…pra takimet janë të ç’ekulibruara. Unë uroj që z.Kurti të ketë sa më shumë durim sepse si neurolog e di se sa e vështirë është të merresh ndonjëherë me pacientë të vështirë. Jam konfident që diplomacia ndërkombëtare në mos e ka kuptuar do ta kuptoj së shpejti se jo të gjithë qaramanët zbuten duke i dhënë lodra, e mbi të gjitha Kosova nuk është lodër, është shtet.

“Bota sot”: Pak muaj para tensioneve të fundit në veri të Kosovës, Kosova dhe Serbia janë pajtuar në Ohër për marrëveshjen e normalizim të marrëdhënieve, cili është kuptimi i kësaj marrëveshjeje kur nuk zbatohet?

Arben Taravari: Shikoni, mendoj se fola qartë se Aleksandër Vuçiq ndodhet në një gjendje të rënduar psikologjike ndaj nuk mendoj se marrëveshjet e arritura me të kanë ndonjë peshë specifike. Më duket se diplomacia botërore po kërkon dëshpërimisht që t’i japi fund tensionit në Ballkan, kurse Kurti ka fatin e dëshpëruar që të jetë shteti i tij toka e zgjedhur për kurban nga Vuçiq. Qëndrimi i z.Kurti është një faqe e ndritur e qëndrimit të një burri shteti përballë një njeriu i cili ka probleme të dëshmuara në historinë e tij si është presidenti serb.

lg.php.gif

”Bota sot”: Asociacioni, një marrëveshje e nënshkruar nga qeveritë e kaluara po kërkohet me ngulm për ratifikim, edhe pse ajo bie ndesh me kushtetutën e Kosovës dhe sipas ekspertëve “bosnjëzon” Kosovën. Cila do të ishte zgjidhje për këtë marrëveshje dhe serbët në veri të Kosovë?

Arben Taravari: Asociacioni serb ka dëshmuar që është një organizim problematik. Pretendimet e asociacioni serb në Bosnjë janë ngacmuese dhe vazhdojnë të mbajnë të minuar qetësinë e brishtë në atë vend. Ndaj një asociacioni tjetër i bazuar në atë model sigurisht që është problem, por problemet janë bërë për t’u zgjidhur. Unë kam një shpresë të madhe tek zgjidhjet që vijnë nga popujt. Besoj fort se populli i Serbisë dhe serbët që kanë zgjedhur të rrojnë në veri të Kosovës, do te dinë të orientojnë aty ku duhet Vuçiçin dhe linjën e tij pseudo-patriotike. Marrëveshja më e mirë do të jetë ajo që ende nuk ka ardhur sepse ende, dhe do të ndodhë shpresoj natyralisht dhe pa komplikime të natyrës ultra-nacionaliste dhe absurde si është sjellja e palës serbe.

”Bota sot”: Z. Taravari javën e kaluar Kuvendi i Kosovës u përballë me dhunë mes deputetëve të PDK-së dhe VV-së, sa keni pasur mundësi t’i përcillni dhe kujt i shkojnë në favor skena të tilla?

lg.php.gif

Arben Taravari: Fatkeqësisht i ndoqa ato pamje që të duken si ndonjë film i ndonjë regjisori serb i cili kërkon t’i tregojë Eskobarit dhe Lajçakut se vetë politika e Kosovës po rrihet e vritet për të drejtat e serbëve që kanë zgjedh Kosovën me jetu. Nuk dua të futem në nivelin se kush kishte të drejtë pasi ai reagim ishte aq qartësisht gabim dhe sarkastik sa çdo koment përtej saj është i tepërt. Nuk është vetëm kuvendi i Kosovës që ka përshkallëzime të kësaj natyre, por sido që të jenë dhe kudo që të jenë dhuna nuk është opsion. Kurse subjekti i pyetjes tuaj se “kujt i shkojnë në favor skena të tilla”, mendoj se është retorike. Për një fatlum aspak shkencor por kokëfortë shqiptarët reagojnë kundër vetes së tyre në momentet më decizive për ta.

“Bota sot”: Të ndalemi pak të situatën politike në Maqedoni. Javë më parë ShBA ka shpallë “non grata”, kryetarin e komunës së Strugës në Maqedoninë e Veriut, Ramiz Merkon, ndërsa ambasadorja e ShBA-së në Shkup paralajmëron se “lista e zezë”, mund të zgjerohet, qëndrimi juaj rreth kësaj çështjeje?

Arben Taravari: Unë kam një afeksion personal për demokracinë dhe sidomos për themelet e ndërtimit politik të Amerikës. Në këtë sens jam veçanërisht i kënaqur që një superfuqi vulosi mendimin tonë si parti për Ramiz Merkon.

lg.php.gif

Ky individ është një nga shembujt më seriozë të krimit dhe korrupsionit aktiv, dhe shpallja e tij non grata është po njësoj përgjigja e zero tolerancë për këtë kontingjent njerëzish të cilët grabisin me kostum dhe kollare.

Ishte shumë mirë kjo që ndodhi, sepse Amerika tregon që është rreshtuar në krahun tonë për të luftuar dhe larguar të keqen nga ky vend. SHBA-të janë një nga shpresat e vetme që ngushëllon të rinjtë e vendit tonë të cilët realizimin e tyre e shohin aty, por tani ka ndodhur pikërisht Një Mrekulli Amerikane sepse ata po ngjallin shpresën se ky vend mund të çlirohet nga e keqja. Mesazhi që ka marrë shteti është i qartë, Merko do gjykuar dhe dënuar, dhe se do të ketë disa Merko të tjerë të cilët me punën e tyre e bëjnë të zezë listën amerikane. Jam i sigurt se shteti ynë do të çojë para drejtësisë atë që tashmë e ka dënuar drejtësia amerikane!

“Bota sot”: Si e vlerësoni bashkëpunimin Kosovë- Maqedoni e Veriut, në cilën sektor ka nevojë për më shumë bashkëpunim?

lg.php.gif

Arben Taravari: Bashkëpunimi midis dy vendeve është natyral sepse jemi vende fqinje, por kemi edhe një thirrje të veçantë sepse Kosova është shtet shqiptar dhe Maqedonia ka shqiptarët si shtet-formues. Ka shumë për t’u bërë në çdo sektor por veçanërisht në unifikim e traditave dhe dokeve tona të njëjta të cilat vetëm se i japin më tepër qytetërim dhe histori gadishullit tonë.

Faleminderit!

Continue Reading

Lajme

Valbon Limani u uron mirëseardhje mërgimtarëve: Po punojmë që Gostivari të jetë i denjë për ju

Published

on

By

Me fillimin e sezonit të verës dhe ardhjen e mërgimtarëve në vendlindje, kryetari i Komunës së Gostivarit, Valbon Limani, ka publikuar një mesazh mirëseardhjeje, duke i siguruar ata për përkushtimin maksimal të institucionit që ai udhëheq në përmirësimin e kushteve të jetesës në qytet.

“Motra dhe vëllezër, ju që keni ardhur si çdo verë në Gostivarin tuaj, më lejoni që në emrin e Komunës tonë t’ju uroj mirëseardhje,” shkroi Limani në një status në Facebook. Ai theksoi se komuna po punon intensivisht për të realizuar projekte të shumta infrastrukturore, të cilat do ta transformojnë qytetin.

“Sikurse e shikoni, rrugë të reja po ndërtohen dhe një numër rekord projektesh na presin përpara. Puna është forma më e mirë për të shprehur respektin dhe dashurinë për secilin nga ju!”, përfundoi Limani, duke lënë të kuptohet se vera e këtij viti do të shoqërohet me investime konkrete në zhvillimin urban të Gostivarit.

Continue Reading

Lajme

Arben Fetai: Ndërtova shtetin – themelova institucionet e Kosovës

Published

on

By

Arben Fetai rikujton veten si arkitekt të institucioneve të Kosovës, por harroi të përmendë Vetëvendosjen, PSD-në dhe këshillat për Hashim Thaçin, shkruan Flaka

Zëvendëskryeministri i Maqedonisë së Veriut, Arben Fetai, vazhdon të vetëpromovohet si figurë kyçe në historinë moderne të shqiptarëve në Ballkan – këtë herë nëpërmjet një interviste në emisionin “Pastel” në TV21. Duke folur për fazën e tij të hershme në politikë, Fetai tha se ka dhënë kontribut të drejtpërdrejtë në ndërtimin e shtetit të Kosovës.

“Në Prishtinë shkova me idenë për gjashtë muaj dhe të kthehem, por aty e gjeta veten shumë mirë… Më pas kam dhënë kontributin tim në formimin e Agjencisë Anti-korrupsion, Agjencisë për Barazi, Agjencisë së Inteligjencës dhe përgatitjen e parë të Kushtetutës së Republikës së Kosovës,” u shpreh Fetai.

Për një çast, intervista dukej si një lexim zyrtar i CV-së së një diplomati të nivelit të lartë. Por, ndërkohë që përmendja e agjencive dhe shtyllave institucionale mund të tingëllojë mbresëlënëse për publikun e TV21, faktet politike nga Prishtina tregojnë një tjetër realitet.

Fetai mbahet mend në Kosovë si këshilltar i Hashim Thaçit, më pas si fraksionist i larguar nga Vetëvendosje dhe si bashkëthemelues i PSD-së – një parti e ndërtuar nga të pakënaqurit me Albin Kurtin.

Fetai, që sot shfaqet si pjesë e qeverisë së VLEN-it në Shkup, është po ai që Albini i dërgoi emisarin Arben Taravari për ta ndalur të bëhej zëvendëskryeministër. Në fund, nuk e ndali dot. Por historia e vërtetë nuk harrohet aq lehtë, edhe pse Fetai vazhdon të shkruajë versionin e tij.

“Kudo që shkojmë nuk duhet të harrojmë vendin nga vijmë,” tha ai në intervistë. Flaka

Continue Reading

Lajme

Skandal me rrëfimin e Arben Fetait: Kam protestuar në vitet ’80 –  por atëherë ishte vetëm 7 vjeç

Published

on

By

Zëvendëskryeministri i Maqedonisë së Veriut, Arben Fetai, ka habitur publikun me një deklaratë të pazakontë gjatë intervistës në emisionin “Pastel” në TV21, ku foli për fëmijërinë e tij dhe përvojat personale gjatë viteve të tensionuara për shqiptarët në Maqedoni dhe Kosovë, shkruan Flaka

“Menjëherë pas diferencimeve politike dhe protestave në Kumanovë, babi iku nga vendi për në Belgjikë dhe unë bashkë me motrat mbetëm vetëm me nënën në shtëpi. Ndërsa pas një periudhe kohore, pasi babi u sistemua në Belgjikë, ne u ribashkuam dhe vazhduam jetën bashkë në Belgjikë,” deklaroi Fetai.

Fetai, i lindur më 11 dhjetor 1980 në Kumanovë, pretendon se ka qenë i pranishëm në protestat e viteve ’80, një periudhë kur, sipas tij, kishte ndërgjegje politike dhe aktivizëm qytetar – megjithëse atëherë ishte vetëm 7 vjeç.
“Që nga fëmijëria mbaj mend protestat në Kumanovë kur mësuesit dhe intelektualët shqiptarë u përzunë nga puna, por edhe protestat në Kosovë pas heqjes së statutit,” tha Fetai.

Por faktet historike flasin ndryshe.
Sipas dokumenteve dhe dëshmive historike, protestat në Kumanovë dhe Gostivar që nisën në gusht të vitit 1988 u zhvilluan si reagim ndaj ndalimit të gjuhës shqipe në shkollat fillore dhe të mesme, si dhe ndaj përjashtimit nga puna të dhjetëra arsimtarëve shqiptarë. Nxënësit dhe mësuesit që kundërshtuan politikën e asimilimit u përballën me burgosje dhe represion.

Pra, në vitin 1988, kur protestat kulmuan, Arben Fetai ishte vetëm 7 vjeç.
Ky detaj e bën të paqartë, në mos të pabesueshme, deklaratën e tij se ka marrë pjesë në protesta si pjesë aktive. Fëmijët e asaj moshe mund të kenë përjetuar atmosferën familjare të kohës, por jo të kenë qenë aktorë të vetëdijshëm të protestave, aq më pak siç portretizohet në këtë rast – si “njeri i protestave”.
Me titull: Nga njeri I protestave te zevendeskryeminister- historia qe nuk keni degjuar per Fetain, ky i fundit shpërndajti lajmin në media.
Lajmi ka shkaktuar reagime të shumta në rrjete sociale, ku përdoruesit kanë ironizuar pretendimin e zëvendëskryeministrit, duke e quajtur “falsifikim emocional të biografisë për qëllime politike”.

“Që të vetëquhesh njeri i protestave si 7-vjeçar është fyerje për ata që me të vërtetë sakrifikuan në atë kohë – që humbën vendet e punës, u rrahën, u burgosën,” shkruan një komentues.
Fetai, madje ka pretenduar që ndihmoi edhe në ndërtimin e shtetit të Kosovës, si këshilltar i Hashim Thaçit.

“Në Prishtinë shkova me idenë për gjashtë muaj dhe të kthehem, por aty e gjeta vetën shumë mirë dhe pastaj mu ofrua një kontratë më afatgjate në Kuvendin e Kosovës. Pas përvojës në Kuvend, u angazhova në zyrën e Kryeministrit të Kosovës dhe më pastaj kam dhënë kontributin tim në formimin e Agjencinë Anti-korrupsion, Agjencinë për Barazi, Agjencinë e Inteligjencës por edhe përgatitjen e parë të Kushtetutës së Republikës së Kosovës. Pra si një i ri kisha mundësi të jashtëzakonshme të jem pjesë e formimit të institucioneve të Kosovës”, u shpreh Fetai.

Në mungesë të ndonjë reagimi apo sqarimi nga kabineti i zëvendëskryeministrit Fetai, pyetja që mbetet është: A po përdoren dramat e një kohe të errët për të ndërtuar kredibilitet të vonshëm politik? Flaka

Continue Reading

TOP Lajme