Lajme

Taravari: Ku ka sfidë më të madhe për shoqërinë tonë dhe familjet tona sesa plaga e emigrimit

Published

1 year ago

March 18, 2024

Admin01

Siç kam paralajmëruar tanimë në disa paraqitje televizive, do t’i shfrytëzoj javët në vijim deri në zgjedhjet presidenciale të 24 prillit, për t’i dëgjuar dhe konsultuar qytetarët rreth prioriteteve që do t’i shtyj përpara si President i ardhshëm i vendit.

Ramazani është një muaj reflektimi, ku duke u fokusuar në besimin tonë, duhet të forcojmë ndjenjat e solidaritetit dhe mbështetjes në komunitetin tonë, duke diskutuar si mund të punojmë së bashku për t’i tejkaluar sfidat që na prekin si shoqëri.

Dhe ku ka sfidë më të madhe për shoqërinë tonë dhe familjet tona sesa plaga e emigrimit që ndan familjet dhe na largon nga më të dashurit tanë?

Vetëm gjatë periudhës 2011-2019, sipas burimeve qeveritare, nga Maqedonia e Veriut janë larguar 700.000 qytetarë, apo çdo i katërti qytetar. Këto të dhëna janë konfirmuar me regjistrimin e popullsisë të vitit 2021, ku, për shembull, Gostivari im del se ka humbur 36% të popullatës. Pra, për dy gostivaras në vendlindje, kemi një në mërgatë.

Ky trend është rritur tejmase gjatë 5 viteve të fundit. Sipas disa të dhënave të publikuara nga Instituti Arbën Xhaferi, vetëm në vitin 2021 dhe 2022, 85.000 qytetarë të Maqedonisë së Veriut janë larguar drejt Gjermanisë, kryesisht njerëz të rinj dhe të kualifikuar. Pra, jemi duke humbur me shpejtësi të hatashme pjesën më vitale të shoqërisë sonë, me pasoja afatgjata për fuqinë punëtore, për zhvillimin dhe për perspektivën ekonomike të vendit.

Kjo murtajë duhet ndalur sa nuk është bërë vonë. Duhet vepruar tani duke diskutuar bashkërisht se si do t’i qasemi këtij problemi ekzistencial të vendit tonë.

Me këtë qëllim, do të organizoj një tribunë publike mbi temën e parandalimit të emigrimit. Tribuna do të mbahet të shtunën, ora 12.00, në Komunën e Tetovës.

Shfrytëzoj rastin t’i ftoj publikisht të gjithë kandidatët për president që të marrin pjesë në këtë tribunë, e cila trajton një temë që vërtetë i tangon qytetarët. ⁠Urdhëroni, ju ftoj të diskutojmë mbi këtë temë prioritare për të gjithë ne dhe pres që secili kandidat t’i përgjigjet ftesës pozitivisht.

Lajme

BDI: VLEN vegël e VMRO për të sulmuar regjistrimin dhe gjuhën shqipe

Published

40 minutes ago

June 30, 2025

Admin01

Bashkimi Demokratik për Integrim ka reaguar ashpër ndaj, siç e cilëson, një strategjie të re të orkestruar nga partitë maqedonase VMRO-DPMNE dhe ZNAM, përmes bashkëpunimit me partitë e vogla shqiptare të mbetura nga koalicioni VLEN, me qëllim që të zhbëhet barazia ndëretnike në Maqedoninë e Veriut.

Në një komunikatë për media, BDI shpreh “shqetësim të thellë” për atë që e quan një “fushatë të rrezikshme dhe të paprecedentë” kundër procesit të regjistrimit të popullsisë – një element kyç për funksionimin demokratik dhe multietnik të shtetit.

“Po shohim një model të rrezikshëm që po përsëritet me një skenar të qartë,” thuhet në reagimin e BDI-së, duke kujtuar rastet e mëparshme kur, sipas partisë, sulmet ndaj institucioneve që burojnë nga Marrëveshja e Ohrit kanë ndjekur një logjikë të përsëritur: fillimisht relativizim nga partitë shqiptare të vogla, më pas anulim nga partitë maqedonase.

BDI përmend shembuj konkretë si Balancuesin administrativ, përdorimin e gjuhës shqipe dhe tashmë regjistrimin e popullsisë – të gjitha, sipas tyre, nën shënjestër për të dobësuar themelet e barazisë.

“BDI e denoncon me forcë këtë qasje si një strategji të mirëkoordinuar për të dobësuar themelet e barazisë në këtë shtet,” thekson komunikata, duke i bërë thirrje qytetarëve shqiptarë dhe të gjithë faktorëve të përgjegjshëm ta kuptojnë rrezikun e këtij modeli të ri që prodhon ndasi, mohim dhe tension.

Partia thekson se do të vazhdojë të qëndrojë në mbrojtje të barazisë, përfaqësimit dhe vlerave të Marrëveshjes së Ohrit, e cilësuar si themeli i paqes dhe bashkëjetesës ndëretnike në vend.

Lajme

Nafta më e lirë nga 1 Korriku – Ulen çmimet e të gjitha derivateve!

Published

48 minutes ago

June 30, 2025

Admin01

Komisioni Rregullator për Energjetikës (KRRE) solli vendim, me të cilin bëhet ulja e çmimeve të shitjes me pakicë të derivateve të naftës, mesatarisht për 2,30 % në raport me vendimin e datës 27.06.2025.

Nga data 01.07.2025 nga ora 00:01 çmimet maksimale të derivateve të naftës do të jenë:

EUROSUPER BS – 95 75,50 (denarë/litër)
EUROSUPER BS – 98 77,50 (denarë/litër)
EURODIZEL BS (D-Е V) 69,50 (denarë/litër)
Vaj për djegie Ekstra i Lehtë 1 (EL -1) 69,50 (denarë/litër)
Mazut М-1 SU 39,583 (denarë/kilogram)

Çmimet e shitjes me pakicë të benzinës EUROSUPER BS – 95 dhe EUROSUPER BS – 98 ulen për 2,00 den/litër.
Çmimi i shitjes me pakicë të EURODIZEL (D-E-V) ulet për 1,00 den/litër.

Çmimi i shitjes me pakicë të Vajit Ekstra të Lehtë për amvisëri (EL-1) ulet për 2,50 den/litër.
Çmimi i shitjes me pakicë të Mazut М-1 SU ulet për 0,605 den/kg dhe tani do të jetë 39,583 den/kg.

Theksojmë se këto janë çmimet maksimale të derivateve të naftës që nga ora 00:01 e datës 01.07.2025.

Lajme

Halili nga ASH: Investimet anashkalojnë zonat shqiptare – Pabarazi dhe dështim

Published

1 hour ago

June 30, 2025

Admin01

Deri më sot nuk ka asnjë investim të huaj në komunat me shumicë shqiptare – një dështim i qartë i politikës ekonomike, vuri në dukje
Arben Halili në konferencën për media.

“Ministri i Ekonomisë bën propagandë me vetëpunësim, por asnjë investim nuk ka shkuar në vendbanimet shqiptare. Kjo është fyerje për rajonin dhe për votuesit.”, shtoi Halili nga Aleanca për Shqiptarët.