Ndërtimi i shkollës në fshatin Xhermë dhe në lagjen Migjeni mbetet premtim i pa realizuar i Komunës së Tetovës, shkruan Portalb.mk.

Në programin zgjedhor ‘Me ka krejt për Tetovën’ 2021-2025 me të cilin kryetari i Komunës së Tetovës Bilall Kasami garoi dhe fitoi në zgjedhjet e fundit lokale tetorin e vitit 2021, mes tjerash përmend edhe ndërtimin e objekteve të reja shkollore.

Te pjesa e arsimit, konkretisht në faqe 7 thuhet:

“Afatmesëm do të ndërtojmë politika ku të gjithë shkollat fillore të jenë me një ndërrim, duke ndërtuar objekte të reja shkollore në qytet dhe fshatrat e malësisë (në lagjen Migjeni, Sellcë dhe Xhermë)”.

Por, gati se katër vite më vonë prej kur Kasami erdhi në krye të Komunës së Tetovës, shkolla në Xhermë dhe lagjen Migjeni nuk janë ndërtuar.

Nga Komuna e Tetovës nuk përgjigjen në pyetjet gazetareske për mosrealizimin e këtij premtimi.

Nuk është realizuar as mësimi me një ndërrim.

Përndryshe, shkolla në Sellcë ka filluar të ndërtohet, megjithatë e njëjta nuk pritet të jetë gati për vitin e ardhshëm shkollor.

Aleanca për Shqiptarët dënon trendin e vazhdueshëm diskriminues në institucionet shtetërore, ku shqiptarët përjashtohen sistematikisht nga punësimi dhe avancimi, ndërsa grupimi VLEN vazhdon të heshtë si pjesë e këtij makinerie përjashtuese.

Vetëm në ditën e para të gushtit, shembujt flasin vetë, në Agjencinë për Kadastrën e Pasurisë së Paluajtshme, bilanci i avancimeve dhe punësimeve të fundit është 25 maqedonas dhe 0 shqiptarë, kurse në Agjencinë për Nxitjen e Zhvillimit të Bujqësisë, u punësuan 20 maqedonas dhe 0 shqiptarë.

Ky është bilanci real i “përfaqësimit të drejtë dhe adekuat” që propagandon kjo qeveri, ndërsa VLEN, në vend që të reagojë, qëndron i ngujuar në heshtje përballë padrejtësive, nga frika se mos i hapen dosjet e mbajtura në sirtaret e Mickoskit.

Kjo nuk është vetëm padrejtësi – është një strategji sistematike për dobësimin e pozitës së shqiptarëve në Maqedoninë e Veriut. Dhe është një shkelje e rëndë e frymës kushtetuese për barazi etnike.

Për më tepër, janë ende të freskëta premtimet boshe për 2.500 punësime për shqiptarët, të cilat VLEN i promovoi si “fitore historike” gjatë formimit të qeverisë. Sot, kur shifrat e punësimeve tregojnë zero shqiptarë, del qartë se gjithçka ka qenë vetëm një mashtrim për konsum elektoral dhe një tjetër akt nënshtrimi ndaj qendrës së pushtetit.

Grupimi VLEN ka zgjedhur ta mbrojë veten në vend të qytetarëve shqiptarë, të ruajë karriget dhe lirinë personale në vend të interesit kolektiv. Të panikosur nga sondazhet, të demaskuar nga skandalet korruptive dhe të shantazhuar nga dosjet kriminale, sot ata janë kthyer në zëdhënës të heshtur të pushtetit që punëson vetëm maqedonas.

Aleanca për Shqiptarët paralajmëron se çdo përjashtim etnik në punësim do të dokumentohet, do të denoncohet dhe do të shërbejë si provë për regresin demokratik që po kalon shteti nën qeverisjen aktuale.

Shqiptarët nuk janë qytetarë të dorës së dytë. Kemi kontribuar për këtë shtet dhe nuk do të pranojmë të zhdukemi me zero në statistikat zyrtare të administratës.

Aleanca për Shqiptarët

Editorial nga PressOnline.al

Zgjedhjet lokale të vitit 2025 nuk janë thjesht një përballje personale mes Bujar Osmanit dhe Izet Mexhitit. Në thelb, ato janë një referendum qytetar për të zgjedhur midis dy rrugëve: një politike të konsumuar që mbahet gjallë me retorikë të vjetër dhe strukturë klienteliste – dhe një politike moderne që ka vizion, përvojë shtetërore dhe ide konkrete për të ardhmen.

Izet Mexhiti është mishërimi i modelit të vjetër: një politikë që jeton nga tensionet, nga përçarja, nga e kaluara, nga e ashtuquajtura “fuqi në terren” që më shumë shërben për të ruajtur pozitat e pak njerëzve, sesa për të ndërtuar projekte që ndryshojnë jetën e qytetarëve. Për vite me radhë, qytetarët e kanë parë këtë model: shumë zhurmë, shumë premtime dhe, në fund, pak punë konkrete që mbetet pas.

Çfarë ka ofruar realisht Mexhiti për komunën në këto dekada në politikë? Shumë prej gjërave që përmend si arritje janë ose punë të nisura prej të tjerëve, ose projekte minimale që as nuk e afrojnë komunën me standardet që qytetarët meritojnë. Ai flet për “mbrojtje të interesave shqiptare”, por realisht ofron vetëm mbrojtjen e interesave të rrethit të tij politik.

Përballë këtij modeli të konsumuar, Bujar Osmani përfaqëson një qasje tjetër: një politikë që mbështetet tek profesionalizmi, bashkëpunimi me institucionet dhe hapja ndaj qytetarëve. Ai nuk ka nevojë për tensione dhe as për grupe presioni për të udhëhequr. Përkundrazi, ka ndërtuar karrierën e tij mbi besimin, kompetencën dhe punën konkrete.

Bujar Osmani nuk vjen nga politika e fjalëve të mëdha dhe e kulisave të vogla. Ai vjen nga një përvojë konkrete: ministër i Jashtëm, ministër Shëndetësie, zëvendëskryeministër për eurointegrime – poste ku matet rezultati, jo propaganda.

Komunës nuk i duhen më njerëz që dinë vetëm të bëjnë presion dhe të grumbullojnë vota me retorikë të viteve ‘90. Komunës i duhet një vizion europian: projekte që sjellin investime, infrastrukturë moderne, mbështetje reale për të rinjtë, digjitalizim dhe një administratë që punon për qytetarin, jo për partinë.

Një model i vjetër që rrotullohet në vend dhe që mendon vetëm për betejat e brendshme partiake. Apo një model i ri që e hap komunën ndaj botës, që sjell zhvillim, që vendos rininë dhe qytetarin në qendër.

Viti 2025 është koha për ta mbyllur kapitullin e politikës së vjetër të Izet Mexhitit. Është koha për të zgjedhur punën, jo propagandën; zhvillimin, jo tensionin; të ardhmen, jo të shkuarën. Është koha për të votuar Bujar Osmanin.