Në një kohë kur Maqedonia e Veriut përballet me tensione të reja politike dhe zhgënjim brenda spektrit shqiptar, gazeta “Bota sot” sjell një intervistë ekskluzive me Arben Taravarin – një nga zërat më kritikë dhe të zëshëm në politikën shqiptare në RMV.

Si ish-ministër dhe ish-pjesëtar i qeverisë përmes koalicionit VLEN, Taravari flet për dështimin e këtij projekti, për tradhtinë politike që, sipas tij, iu bë votuesve shqiptarë, si dhe për vendimin e tij për të dhënë dorëheqje.

Në këtë intervistë, ai trajton sfidat më të mëdha që përballon aktualisht shoqëria shqiptare në Maqedoninë e Veriut, ndikimet e huaja që po e deformojnë demokracinë, si dhe rolin që duhet të kenë shqiptarët në ndërtimin e një shteti funksional, të drejtë dhe të barabartë.

Gjithashtu, Taravari flet edhe për rrugën e mëtejshme të Aleancës për Shqiptarët dhe për vizionin e tij mbi përfaqësimin real politik.

Intervista e plotë

Gazeta “Bota sot”: Si e vlerësoni situatën aktuale politike në Maqedoni të Veriut, cilat janë sfidat dhe problemet më të mëdha?

Arben Taravari: Keq dhe më e keqja është se jam realist. Me dështimin e projektit VLEN, po përjetojmë të gjithë pasojat.

Edhe pse luftuam që të largonim mentalitetin “yes sir” ndaj partive maqedonase që bëjnë formojnë qeveritë, tashmë grupi i atyre pak shqiptarëve që kanë mbetur në Qeveri, janë më lajkatarë e të bindur se kurrë.

Kjo i dëmton dhe vet ata, pa dyshim të gjithë shqiptarët por edhe çdo etni tjetër që jeton në vendin tonë, sepse kur shqiptarët janë keq, të gjithë janë keq!

Gazeta “Bota sot”: Z. Taravari, cilat janë arsyet konkrete që ju shtynë të jepni dorëheqje nga pozita në Qeveri?

Arben Taravari: Metamorfoza e shpejtë, e pabesueshme që ndodhi tek kolegët e VLEN-it, të cilët harruan se kishin ardhur në pushtet të ndërtonin një shtet më të mirë për shqiptarët dhe të gjithë qytetarët…dhe e dyta, largimi i politikave qeveritare nga rruga e BE-së. Këto ishin dy shkaqet kryesore të cilat ashtu si po duket dita-ditës janë kthyer në një alarm të kuq.

Shqiptarët janë në ditën e tyre më të errët dhe ka një shqetësim në rritje nga ndërkombëtarët për ndikim rus e serb në vendin tonë.

Gazeta “Bota sot”: A ishte dorëheqja juaj një akt proteste ndaj mënyrës së funksionimit të Qeverisë, apo një hap për të pozicionuar Aleancën për Shqiptarët ndryshe në skenën politike?

Arben Taravari: Po për të dyja. Ne protestuam duke u larguar dhe duke e bërë të qartë që sado oferta të majme të ketë, Aleanca për Shqiptarët nuk bëhet palë kundër mirëqenies.

Nuk është në rregull populli mos të ketë, të jetojë në vështirësi të shtuara, e pushtetarët të jetojnë mes parave dhe luksit!

Gazeta “Bota sot”: A do të ketë ndryshime strategjike në Aleancën për Shqiptarët pas këtij zhvillimi? Mendoni se partia duhet të kalojë në opozitë apo të vazhdojë përpjekjet për të qenë pjesë e qeverisjes?

Arben Taravari: Partia jonë është në Opozitë dhe do jetë gjithnjë aty ku mendon votuesi. Ne mburremi se u votuam nga 107 mijë njerëz si VLEN, por fatkeqësisht tashmë vetëm 107 veta janë të kënaqur me këtë Qeveri. Ndaj ne jemi në Opozitë se shkojmë aty ku është shumica!

Gazeta “Bota sot”: Cili është vizioni juaj për rolin që duhet të kenë shqiptarët në qeverinë e ardhshme – përfaqësim numerik apo ndikim real në vendimmarrje?

Arben Taravari: Shqiptarët janë shtet-formues dhe autokton në këto troje. Është e padiskutueshme që ata duhet të jenë pjesë e çdo niveli në shtet.

Gazeta “Bota sot”: Si e shihni rolin e shqiptarëve në ndërtimin e një shoqërie më të barabartë dhe më të integruar në Maqedoninë e Veriut? A mendoni se shqiptarët janë përfaqësuar siç duhet në këto vite?

Arben Taravari: Kjo shoqëri është e barabartë ku secila nga etnitë që jetojnë këtu ndihet njësoj e përfaqësuar dhe ka mundësi të barabarta.

Shqiptarët nuk kanë qënë pozicionuar aq sa ju takon këto vite, por është për të ardhur keq që aktualisht janë më keq se çdo herë pas Marrëveshjes së Ohrit.

Ne kritikonim me të drejtë në të kaluarën që shumë pika të kësaj marrëveshje nuk zbatoheshin, por ky VLEN që është në Qeveri po e gris dita-ditës këtë marrëveshje dhe po i ka kthyer shqiptarët të pavlefshëm në shtetin e tyre!

Kabineti i ri i Ministrit të Shëndetësisë, Azir Aliu, po ngjall debat për përbërjen e tij të përzier me figura të lidhura si me ish-kryeministrin Nikolla Gruevski, ashtu edhe me Lidhjen Socialdemokrate të Maqedonisë (LSDM).

Sipas informacioneve të siguruara, shef i kabinetit të ministrit Aliu është emëruar një simpatizant i njohur i LSDM-së. Në rrjete sociale qarkullojnë fotografi ku ai shfaqet në aktivitete partiake përkrah ish-presidentit Stevo Pendarovski, si dhe në ngjarje të organizuara gjatë qeverisjes së ish-kryeministrave Zoran Zaev dhe Dimitar Kovaçevski.

Për më tepër, Azir Aliu ka përfshirë në ekipin e tij edhe Aleksandar Mitov, një ish-këshilltar i afërt i ish-kryeministrit Nikolla Gruevski, i njohur për rolin e tij në periudhën e qeverisjes së VMRO-DPMNE-së.

Ky kombinim figurash politike nga spektri i kundërt ka ngritur pikëpyetje në opinion për drejtimin që do të marrë Ministria e Shëndetësisë dhe prioritetet që do të ndjekë kabineti i ri. Ende nuk ka një deklaratë zyrtare nga ministri Aliu në lidhje me këto emërime.

Zyrtari i Aleancës për Shqiptarët, Gadaf Uzairi, ka hedhur akuza të drejtpërdrejta ndaj koalicionit VLEN, duke i akuzuar për heshtje të qëllimshme dhe tolerim të industrisë së lojërave të fatit, e cila, sipas tij, po shkatërron të rinjtë dhe familjet shqiptare.

“VLEN po mbyll sytë para një plage që po shkatërron familjet shqiptare… lojërat e fatit! Ndërsa të rinjtë po fundosën në borxhe dhe varfëri, VLEN hesht… apo edhe më keq, i mbron interesat e atyre që pasurohen mbi shpresat e të mjerëve,” deklaroi Uzairi.

Ai shtoi se kjo sjellje nuk ka të bëjë aspak me idealin e ndryshimit që VLEN pretendon ta përfaqësojë:

“Ky nuk është ndryshim, kjo është shitje morale. Nëse nuk keni guxim të ndalni këtë të keqe, të paktën mos e mashtroni popullin me fjalën ‘ndryshim’,” përfundoi Uzairi.

Deklarata vjen në një moment kur shqetësimet për përhapjen e kazinove dhe bastoreve sportive, sidomos në zonat me shumicë shqiptare, janë në rritje, ndërsa institucionet heshtin. Aleanca për Shqiptarët ka paralajmëruar se do të vijojë me presion publik dhe institucional për ta ndalur këtë fenomen. Flaka