Aleanca për Shqiptarët me keqardhje konstaton se Ministri aktual i Shëndetësisë, z. Azir Aliu, vijon të mashtrojë opinionin publik me rikiciklime të projekteve tashmë të përfunduara nga paraardhësit e tij, në vend se të ofrojë ndonjë qasje konkrete, profesionale dhe me impakt në sektorin jetik të shëndetësisë.

Deklarata e fundit e ministrit Aliu për hapjen e 300 vendeve të reja të lira për kuadro nga radhët e specializantëve privatë është vetëm përpjekje për të marrë lavdinë e një pune që tashmë është përgatitur, inicuar dhe proceduar nga ish-ministri i Shëndetësisë dhe lideri i Aleancës për Shqiptarët, z. Arben Taravari.

Është e pakuptimtë që një ministër të sillet si zëdhënës i projekteve të paraardhësve të tij, duke mohuar kontributin e tyre dhe duke përvetësuar punën e kryer nga të tjerët.

Që nga dita e emërimit, z. Aliu më shumë është marrë me vizita protokollare e fotografo-seanca në spitale, se sa me sfidat reale që përjeton sistemi ynë shëndetësor. Nga gafa me parkingjet në hotele private për stafin mjekësor, deri te deklaratat bombastike për “digjitalizimin e sistemit”, një proces që është përmbyllur vite më parë, z. Aliu po dëshmon se është i shkëputur nga realiteti i profesionistëve të shëndetit.

I vetmi aktivitet konkret që mund t’i faturohet kabinetit të tij është punësimi i familjarëve, miqve, duke kthyer kështu Ministrinë e Shëndetësisë në një degë të nepotizmit politik dhe jo të reformës institucionale.

Aleanca për Shqiptarët thekson se shëndetësia nuk është ekuacion digjital dhe aq më pak një zyrë për marketing personal. Nëse ministri Aliu vazhdon me këtë retorikë dhe qasje deri në fund të mandatit të përkohshëm të kësaj qeverie teknike, historia do ta regjistrojë si një nga ministrat më joprofesionalë dhe më të padukshëm në funksionin që i është besuar ndonjëherë.

Shëndetësia kërkon përkushtim, transparencë dhe profesionalizëm – jo shfaqje për media, përfundojnë nga Aleanca për Shqiptarët.

Qyteti i Shkupit sot bëri të ditur se Prokuroria ka filluar procedurën pas raportit të parë për parregullsitë e mundshme me legalizimin e ndërtesave në komunën e Çairit.

“Prokuroria themelore publike ka nisur procedurën pas denoncimit të parë me falsifikimet. Tashmë ka edhe dy procedura që më parë janë iniciuar kundër Visar Ganiut prej të cilave e para është për falsifikim të tërë librit arkivor me numra dhe kërkesa për legalizime dhe e dyta për një rast tjetër ku në mënyrë joligjore kanë legalizuar me një bashkëpunëtor tjetër”, thonë nga Pres shërbimi i Qytetit të Shkupit.

Nga Qyteti i Shkupit presin që edhe Prokuroria themelore publike për ndjekje penale të krimit të organizuar dhe korrupsionit të fillojë të veprojë kundër, siç thonë ata, “bandës së krimit të organizuar në komunën e Çairit”.

“Gjithashtu presim që Prokuroria themelore publike për ndjekjen e krimit të organizuar dhe korrupsionit të fillojë të veprojë kundër bandës së krimit të organizuar në komunën e Çairit e cila mundësoi ndërtimin e paligjshëm të objekteve të PASIGURTA me para të zeza nga burime jolegale, ndërtesa të cilat u regjistruan në emër të personave që kinse kanë ndërtuar në 5, 6, 10 dhe 11 vjet, ndërsa tani janë milionerë!, thuhet në komunikatën e Qytetit të Shkupit.

Pas dy postimeve të fundit të deputetit Halil Snopçe në lidhje me votimin e ligjit për regjistrim në vitin 2021, kanë pasuar shumë reagime nga qytetarë të ndryshëm, të cilët kanë shprehur habi për informacionet e publikuara. Deputeti Snopçe thotë se është koha për të vendosur faktet në vend dhe për të ndalur shtrembërimin e realitetit.

“Në atë kohë, Aleanca për Shqiptarët dhe Alternativa – me të cilën ishim në koalicion – ishin të vetmet forca politike shqiptare që kundërshtuan hapur ligjin për regjistrim, i cili përfshinte edhe metodologjinë që më vonë u rrëzua nga Gjykata Kushtetuese”, thekson Snopçe.

Ai kujton se ishte ndër deputetët më të zëshëm në kundërshtimin e këtij ligji, si në Kuvend, ashtu edhe në emisione televizive përballë përfaqësuesve të Entit Shtetëror të Statistikave. “Kushdo mund t’i kthehet arkivave dhe ta verifikojë këtë. Madje, disa deklarata të mia kanë mbetur si më të shikuarat në mediat online për atë periudhë,” – shton ai.

Sipas Snopçes, edhe pse koalicioni ASH-Alternativa ishte kundër, nuk arriti të bindë partitë tjera shqiptare që të veprojnë njësoj. “Fakt është se Lëvizja Besa dhe BDI, përfshirë edhe deputetin Izet Mexhiti, në atë kohë koordinator i grupit parlamentar të BDI-së, e përkrahën ligjin,” thekson deputeti.

Ligji për regjistrim u votua në seancën e 29-të të mandatit të kaluar, me 62 vota për, dhe për të kaluar u desh edhe mbështetja e 29 deputetëve të etnive jomaqedonase, për shkak të shumicës së Badinterit. Por Snopçe thekson se pa votat e Lëvizjes Besa, ligji nuk do të kalonte, sepse nuk do të arrihej minimumi prej 61 votash.

“Kush sot del dhe kritikon ligjin për regjistrim, duhet së pari të kërkojë falje për përkrahjen që i ka dhënë në vitin 2021. Sa faj ka BDI, ka Lëvizja Besa dhe Izet Mexhiti,” përfundon Snopçe.