Në mes tensionesh, rreth orës 16:00 pritet të fillojë protesta në Beograd të Serbisë, e cila konsiderohet të jetë më e madhja ndonjëherë në këtë vend. Mijëra studentë nga qytete e fshatra të ndryshme të Serbisë, por edhe protestues të tjerë raportohet të jenë stacionuar para Kuvendit të Serbisë, por edhe te Slavia, ku do të ketë skenë, kor dhe folës.

Pavarësisht se studentët në Serbi po organizojnë protesta duke kërkuar përgjegjësi për vdekjen e 15 personave në Novi Sad, politikanët shqiptarë nga Lugina e Preshevës thonë se presidenti Aleksandër Vuçiq, nuk do të jep dorëheqje.

Sipas tyre, protesta e sotme në Beograd është e paparashikueshme dhe mund të ketë përplasje e ndërhyrje të forcave policore.

Ish-deputeti shqiptar në Kuvendin e Serbisë, Fatmir Hasani në një prononcim për KosovaPress thotë se numri i protestuesve mund të arrijë afro një milion, derisa nuk përjashton tensionet e mundshme. Ai potencon se kjo protestë është një tregues për Vuçiq se kjo rrugë është e pakapërcyeshme për të.

Hasani: Vuçiq është një diktator i llojit të vet

“15 marsi është zgjedhur për shkak të 15 viktimave të Novi Sadit dhe kjo protestë është një tregues shumë i rëndësishëm që Vuçiq nuk është më interesant dhe se duhet të shkojë. Për shkak se nëse mblidhen afër një milion studentë të gjithë Serbisë, me sektorin privat dhe pjesën opozitare, kjo do të thotë që ai nuk e ka përkrahjen në Serbi dhe është bërë një lider i tepërt, i cili punon me kokë të veten…Beogradi dy ditët e fundit është duke u mbushur nga të gjitha vendet, qytetet, fshatrat e Serbisë…Nëse pjesa tjetër qeveritare fillon të bëjë dhunë, mund të vije deri te një përplasje, një kacafytje. Për shkak se është edhe një grup tjetër i cili është i vogël në përkrahje të Vuçiq, të cilët kanë mbledhur thasë me gurë, kanë sjellë disa traktorë dhe shtëpiza. Sot Vuçiq do ta kuptojë se është rrugë shumë e pakapërcyeshme e ardhmja e tij. Ai është kokëfortë, dorëheqje nuk jep dhe është një diktator i llojit të vet”,tha Hasani.

Hasani thekson se protesta mund të kalojë në luftë qytetarë, nëse studentët ia mësyjnë institucioneve shtetërore, me ç’rast do të reagojnë forcat policore dhe ushtria.

Hasani: Protesta mund të kalojë në luftë qytetare

“Kemi informata që edhe Daqiq do t’i largohet Vuçiqit. Është e paparashikueshme për shkak se ka shumë njerëz, me qindra-mijëra, ndoshta edhe një milion protestues. Gjithçka është e paparashikueshme nëse fillojnë studentët t’i marrin institucionet shtetërore dhe të ecin, atëherë Vuçiq do të reagojë me polici, ushtri dhe në këtë rast mund të vije edhe te lufta qytetare”, thekson Hasani.

Kryetari i Partisë Demokratike Shqiptare (PDSH), Ragmi Mustafa thotë se televizionet shtetërore dhe ato që përkrahin Vuçiq nuk po transmetojnë asnjë sekuencë nga protesta e sotme. Sipas tij, RTS dhe disa të tjerë, po shfaqin filma vizatimorë dhe dokumentarë ose pjesë të studentëve që mbështesin Vuçiq.

Përveç tjerash, për KosovaPress Mustafa shprehet se protesta mund të pasohet me incidente gjatë orëve në vazhdim.

Mustafa: Televizionet shtetërore në Serbi nuk shfaqin protestën, japin filma vizatimorë

“Ne nuk mund të shohim këtu prej televizione shtetërore të Serbisë, Radio Televizioni i Serbisë nuk jep asnjë sekuencë të tubimit të sotëm. Happy Televizoni dhe Pink që janë në krah të presidentit Vuçiq nuk iu vjen turp që në këto situata, kur e gjithë Serbia është grumbulluar në Beograd, ata japin filma vizatimorë ose dokumentarë të tjerë. Në kohën lajmeve japin disa sekuenca, edhe atë për ata studentë që i ka grumbulluar rreth presidencës së presidenti Vuçiq që kërkojnë vazhdimin e mësimeve në fakultete dhe universitete të Serbisë…Ka një numër të madh të buqëve që me traktorë kanë ardhur në mes të Beogradit. Janë parkuar në vende të caktuara ku shihet demolomi i xhamave të traktorëve, nga ana e akterëve që janë pjesë e strukturës politike dhe të brendshme të Serbisë, të udhëhequr nga Vuçiq dhe në këtë drejtim deri në orët e vona të mbrëmjes sa do të zgjasë protesta do të ketë edhe incidente, mbase mund të jenë edhe më të rënda”, tha Mustafa.

Ish-kryetari i Këshillit Kombëtar Shqiptar, Ragmi Mustafi thotë se ka pasur një mobilizim të jashtëzakonshëm për protestën e sotme në Beograd, derisa shton se pushteti aktual atje ka paralajmëruar se mund të ketë dhunë.

Mustafi: Kjo do të jetë protesta më e madhe në Beograd

“Shumica kanë paralajmëruar se kjo do të jetë protesta më e madhe ndonjëherë e bërë në Beograd çfarë edhe kanë të drejtë. Pasur parasysh që tashmë studentë që kanë filluar që në dhjetorin e vitit të kaluar në mënyrë sistematike e kanë pasur ngritje të vetëdijes ndaj represionit të dyfishtë që ju ndodhë përmes inxhinierimit të lajmeve të rreme dhe lajmeve që kanë krijuar një realitet tjetër alternativ. Ka pasur një mobilizim të jashtëzakonshëm gjithandej. Pushteti ka paralajmëruar që do të ndodhë dhunë. Pushteti i Vuçiq, i një totalitaristi modern ka paralajmëruar që sikur po përgatitet një revolucion me ngjyra. Megjithatë, kjo sipas tij nuk do të funksionojë”, potencon Mustafi.

Ndonëse protesta është paralajmëruar të jetë paqësore, Mustafi thotë se mund të ketë inskenime të situatave nga grupe të kontrolluara të Vuçiqit, për të legjitimuar përdorimin e dhunës. Sipas Ragmi Mustafit, edhe pas kësaj proteste Vuçiq nuk do të jep dorëheqje, derisa shton se këtë të fundin e ka kapur paniku.

Mustafi: Mund të ketë inskenime në protestë, për ta legjitimuar përdorimin e dhunës nga shteti

“Vuçiq si duket për herë të parë ndihet se nuk është në kontroll të situatës, atë e ka kapur edhe paniku. Gjithsesi, studentët ka paralajmëruar protesta do të jetë e qetë, paqësore…Ndoshta dorëheqje nuk do të jap, nuk e pres që mund të jep. Vuçiq mund të mbajë pushtetin ndoshta edhe për një kohë, por ai si duket të mbajë një shoqëri të tërë në gjendje pezullimi mes frikës dhe iluzionit. Nëse ai tashmë nuk reflekton, kjo është vetëm fillimi i fundit të tij…Mund të inskenohet një situatë e vërtetë, madje tani kemi edhe paralajmërime se ka pasur disa që kanë shkelur me vetura protestuesit. Mund të jenë inskenime nga ato grupet fashiste që kanë qenë nën kontrollin e Vuçiqit…Për të legjitimuar më pas përdorimin e monopolit të dhunës nga shteti. Në anën tjetër, mund të ketë një situatë në të cilën gjithashtu studentët që janë në parkun ‘Pionir’ mbështetës të Vuçiqit që quhen studentë që e duan të mësojnë, të ketë prapë edhe aty një inskenim që mund të jetë mes studentësh për të legjitimuar dhunën e presidentit Vuçiq”, thotë Mustafi.

Studentët në Serbi kanë organizuar protesta dhe bllokada për katër muaj në disa qytete të mëdha, duke kërkuar përgjegjësi për vdekjen e 15 personave në Novi Sad, pas shembjes së një strehë betoni në stacionin hekurudhor më 1 nëntor 2024.

Ata kërkojnë publikimin e të gjitha dokumenteve të lidhura me rikonstruksionin e stacionit hekurudhor për të përcaktuar se kush mban përgjegjësi për këtë aksident, ndjekjen penale të personave që kanë sulmuar protestuesit, si dhe pezullimin e procedurave ndaj të arrestuarve gjatë protestave të mëparshme.