Koalicioni VLEN po përpiqet të fshehë përçarjen e thellë të brendshme përmes publikimit të fotografive “bashkëpunimi” që nuk reflektojnë realitetin. Megjithëse në publik shfaqen të buzëqeshur e të bashkuar, e vërteta është krejt tjetër: brenda VLEN mbretëron një përplasje serioze për pushtet dhe ndikim.

Burime të besueshme tregojnë se personat që po shfaqen në fotografitë e shpërndara në rrjete sociale nuk kanë mandat vendimmarrës dhe nuk luajnë rol real në drejtimin e koalicionit. Vendimet strategjike merren vetëm nga Izet Mexhiti, ndërsa të tjerët janë aty për fasadë.

Alternativa ka vendosur një vijë të kuqe të qartë: ose merr Sarajin, ose Çairin – ose del nga VLEN. Ky ultimatum e bën të qartë se durimit i ka ardhur fundi dhe nuk ka më vend për manovra politike e as për “unitet fotografik”.

Nëse ky kusht nuk merret parasysh, do të jetë një dorëzim total i Izet Mexhitit, që tashmë shihet si figura dominante brenda koalicionit.

VLEN po përballet me krizën më të rëndë që nga formimi, dhe asnjë foto nuk mund ta fshehë realitetin që qytetarët tashmë e kuptojnë qartë: përçarja është më e thellë se kurrë.

Përçarja në VLEN po thellohet. Pasi Alternativa ka kërkuar Çairin ose Sarajin, portali TS mëson se konflikti është zgjeruar edhe më tej. Në një mbledhje, sipas të njëjtit portal, acarimi ka ndodhur mes Izet Mexhitit dhe Zeqirja Ibrahimit, lidhur me kërkesën që Alternativa të marrë njërën nga këto dy komuna.

Në kulmin e debatit ka ndërhyrë Arben Fetahu, duke u përpjekur ta zbusë situatën. Ai i është drejtuar Zekës nga Alternativa, duke i kërkuar që të tërhiqet, me arsyetimin se Alternativa, sipas anketave të fundit, qëndron shumë më dobët krahasuar me Lëvizjen Demokratike të Mexhitit. Por reagimi i Zekës ka qenë i ashpër, duke i thënë: “Raj be tej mos fol, se tej n s’ke as parti!”

Nga ana tjetër, sot zyrtarisht, Bekim Sali ka paralajmëruar kandidaturën e tij për Çairin, duke i dërguar një mesazh të qartë Izet Mexhitit: “Për Çairin vendosin qytetarët, jo emrat!”

Ndryshe, në anketën e fundit të realizuar nga IRI- Amerikan të publikuar nga portali TS, në nivel kombëtar, Fronti Kombëtar rezulton me 14% mbështetje, ndërsa VLEN me vetëm 5%./TS/

Strukturat e degës së Alternativës në Tetovë kanë dhënë mesazh të qartë në një takim të degës ku kanë marr vendim se nëse kreu i Lëvizjes Besa, Bilall Kasami nuk pranon kandidatët e tyre Bekim Sali dhe Amir Elezi, ose nuk do të ketë asnjë mbështetje për të në Tetovë dhe komunat përreth.

Burime nga dega e Alternativës në Tetovë bëjnë të ditur se gjatë këtij takimi është vendosur unanimisht që dega e Tetovës dhe Tearcës të mbështesë vetëm Amir Elezin dhe Bekim Salin si kandidatë të tyre në kuadër të marrëveshjeve të mundshme politike. Në të kundërtën, Alternativa do të tërhiqet nga mbështetja ndaj Bilall Kasamit, jo vetëm në Tetovë, por edhe në komunat e tjera.

Ky zhvillim tregon për tensione të reja mes partnerëve opozitarë dhe paralajmëron vështirësi në koordinimin për zgjedhjet lokale që po afrohen.