Pas deklaratave të eksponentëve të VLEN se Qeveria ka miratuar ligjin e ri për kazinotë, ka ardhur reagimi i ashpër nga ish-partneri i tyre në koalicion, deputeti i ASH-së, Halil Snopçe.

Snopçe thekson se ligji i ri, që po përkrahet nga VLEN, nuk dallon nga ai i propozuar më parë nga Artan Grubi, pasi vetëm parashikon largimin e kazinove 500 metra nga shkollat dhe çerdhet, por nuk parashikon mbylljen e tyre.

“Disa nga eksponentët e VLEN po lëvdojnë qeverinë për miratimin e ligjit që parashikon distancë prej 500 metrash nga kazinotë, por ku është mbyllja e tyre? VLEN ka bërë hap pas, duke u rikthyer te versioni i ligjit të Artan Grubit, të cilin dikur e kritikuan fort, pasi edhe ai parashikonte të njëjtën distancë,” shkruan deputeti Snopçe në rrjetet sociale.

Ai shton se të gjitha premtimet për mbylljen e kazinove kanë qenë të kota dhe se nuk sheh ndryshim thelbësor mes ligjit të ri dhe atij të mëparshëm.

“A më ndihmon dikush të dalloj ndryshimin mes këtij ligji që po përmendet me kaq krenari nga VLEN dhe ligjit të ashtuquajtur ‘ligji i Artan Grubit’?,” pyet Snopçe.

Deputeti i ASH-së shprehet se, për fat të keq, nuk ka asnjë ndryshim real dhe situata vazhdon të jetë e njëjtë, duke e cilësuar si një “Deja Vu pa asnjë përfitim për qytetarët”.

“Katandisja me fatin e njerëzve dhe kazinotë do të vazhdojë,” përfundon ai.

Snopçe mbyll reagimin duke theksuar se asnjë premtim dhe asnjë ndryshim nuk është realizuar deri tani.

Por, sipas Mexhitit, kazinot, bastoret dhe klubet e aparateve të lojërave të fatit nuk do të lejohen më në afërsi të shkollave dhe institucioneve arsimore. “Do ta pastrojmë hapësirën përreth shkollave nga ndikimi i lojërave të fatit. Nxënësit nuk do të ekspozohen më ndaj kësaj industrie shkatërruese. Rinia do të jetë e mbrojtur, ashtu siç e meriton,” u shpreh ai.

Projektligji parashikon masa të rrepta për të kontrolluar këtë sektor, përfshirë vendosjen e rregullave të reja, taksa më të larta dhe kushte më të forta për licencimin e operatorëve. Qeveria synon të largojë nga tregu të gjithë operatorët që abuzojnë me ligjin dhe konsumatorin.

“Po i japim fund epokës kur fitimet e bixhozit vinin përpara mirëqenies së qytetarëve. Ky është një ligj për njerëzit e zakonshëm, për popullin – një ligj që mbron nxënësin, prindin dhe familjen,” tha më tej Mexhiti, duke theksuar se vullneti politik për ndryshim tashmë është dëshmuar.

Ky projektligj pritet të sjellë reformë rrënjësore në një industri të debatueshme, duke vendosur kontroll dhe përgjegjësi në funksion të interesit publik.

Me krenari të madhe dhe në shenjë triumfi, VLEN shpall një arritje të jashtëzakonshme që, sipas tyre, dëshmon fuqinë dhe vendosmërinë për drejtësi dhe barazi reale! Dje, Dogana e Maqedonisë së Veriut ka realizuar 21 punësime të reja – të gjithë shqiptarë – duke shkruar një faqe të re në historinë e përfaqësimit shqiptar në institucionet shtetërore.

Por pas kësaj fasade suksesi, kanë dalë në pah emra që hedhin hije dyshimi mbi procesin. Lirim Fetai, kushëri i Zëvendëskryeministrit Arben Fetai, është një nga të punësuarit në këtë valë punësimesh.

Po ashtu, vëllai i zëvendësministrit të Punëve të Brendshme, Astrit Iseni, Driton Iseni figuron mes të përzgjedhurve.

Në listën e të punësuarve është edhe bashkëshorti i zëvendësministres së Sportit, Safije Sadiku Shaini, i cili është emëruar në ndërmarrjen shtetërore MEPSO.

Këto punësime janë interpretuar nga opinioni publik si raste të pastër nepotizmi dhe kanë ngritur pikëpyetje serioze për transparencën dhe meritokracinë e premtuar nga përfaqësuesit e VLEN-it.

VLEN, ndërkohë, vazhdon të theksojë se ky është vetëm fillimi i një administrate moderne, gjithëpërfshirëse dhe të drejtë, ku çdo shqiptar gjen vendin e vet me dinjitet.

Megjithatë, përfshirja e të afërmve të zyrtarëve të lartë shtetërorë në këto punësime, ka rrezikuar të zbehë kredibilitetin e procesit dhe ta kthejë në një shembull klasik të riciklimit të privilegjeve familjare në institucionet publike.

Kur parimi është më i rëndësishëm se pushteti: Taravari zgjodhi të largohej nga një qeverie që i përdor shqiptarët si dekor politik

Editorial nga PressOnline.al

Kur Arben Taravari zgjodhi të largohej nga Qeveria dhe të mos bëhej pjesë e konfigurimit të ri politik me VMRO-DPMNE-në, shumëkush e paragjykoi. Por sot, me një realitet të zymtë për shqiptarët në Maqedoninë e Veriut, është më se e qartë: Taravari kishte të drejtë, shkruan PressOnline.al

Qeveria e re VMRO-VLEN nuk është qeveri e barazisë, as e reformës, dhe sigurisht as e përfaqësimit të denjë të shqiptarëve. Është një qeveri ku shqiptarët janë të pranishëm vetëm numerikisht – por të përjashtuar nga vendimmarrja. Janë aty si stoli politik, jo si faktor shtetformues. Pikërisht këtë e paralajmëroi Taravari që në momentin e ndarjes nga projekti VLEN.

Sot, lideri i Aleancës për Shqiptarët e thotë troç: VLEN si projekt ka dështuar, dhe ajo pjesë e shqiptarëve që kanë mbetur në qeveri janë thjesht lajkatarë të pushtetit. Me fjalë të tjera, ata nuk përfaqësojnë interesat e shqiptarëve, por mbrojnë një agjendë që shërben tjetërkund – aty ku fuqia dhe ndikimi vijnë nga qendrat e vendimmarrjes maqedonase.

Në vend që të luftojnë për barazi, për rol real në qeverisje, për drejtësi e zhvillim për shqiptarët, ata janë kthyer në zëdhënës të interesave të huaja politike. Kjo, siç thotë vetë Taravari, nuk është vetëm dëm për shqiptarët – është dëm për të gjithë qytetarët, sepse “kur shqiptarët janë keq, të gjithë janë keq”.

Shqiptarët, sipas Taravarit, po kalojnë ditët më të errëta në Maqedoninë e Veriut. Dhe me të drejtë paralajmëron se faktori ndërkombëtar tashmë ka filluar të shqetësohet për ndikimin rus dhe serb në rrjedhat politike të vendit – një alarm që nuk mund të injorohet. Në këtë kontekst, heshtja e përfaqësuesve të VLEN në qeveri është dëshmi e një kapitullimi të plotë politik.

Më e rënda? VLEN ka harruar pse erdhi në pushtet. Harroi fjalët e mëdha për “ndryshim”, “dinjitet” dhe “barazi”. Harroi qëllimin për të ndërtuar një shtet më të mirë për shqiptarët. Sot, pjesëmarrja e tyre në qeveri është shndërruar në legjitimim të një sistemi që i mban shqiptarët të margjinalizuar.

Në këtë dritë, Taravari nuk është thjesht opozita shqiptare – ai është zëri i arsyes dhe parimit. Ai nuk pranoi të bëhet pjesë e një fasade. Ai kërkoi jo përfaqësim numerik, por ndikim real në vendimmarrje. Dhe kjo është ajo që i takon shqiptarëve si shtetformues në këtë vend.Sot, kur realiteti politik flet vetë, shqiptarët duhet ta kuptojnë qartë një gjë: largimi i Taravarit nga kjo qeveri nuk ishte një akt i dobësisë, por një akt i guximit dhe përgjegjësisë. Ai refuzoi të bëhet pjesë e një mashtrimi dhe sot e ka fituar të drejtën morale dhe politike për të thënë: e paralajmërova këtë, por nuk më dëgjuat.(PressOnline.al)