Kryetari i VMRO-DPMNE-së, Hristijan Mickoski, gjatë një mbledhjeje të brendshme të partisë, nga informacione të brendshme që dëshirojnë të ngelen anonim, mësohet të jetë shprehur kritik ndaj Arben Fetait nga koalicioni VLEN, duke e quajtur “llafazan të Facebook-ut” që nuk shfaqet askund në anketa.

“Ky llafazan i Facebook-ut nuk del askund në anketa, por pretendon të bëhet kryetar i VLEN-it. Me largimin e Taravarit, VLEN ka pësuar rënie nga 13% në 7%. Nuk mund t’i mbajmë në pushtet duke dalë kundër vullnetit të shqiptarëve,” thuhet të ketë deklaruar Mickoski.

Kjo deklaratë vjen pas anketës së fundit të EuropeElects, ku VLEN shënon rënie drastike të rejtingut për zgjedhjet lokale në kampin shqiptar.

Sekretari organizativ i Aleancës për Shqiptarët , Gadaf Uzairi përmes një postimi në rrjetet sociale ka dënuar presionin e Kryetarit të Komunës së Tetovës, Bilall Kasami ndaj punonjësit komunal njëherësh edhe pronar i portalit informativ Top24.mk , Ylber Jahiu i cili u transferuar me urdhër zyrtar në një vend tjetër pune, konkretisht në Infoqendrën.

Reagimi i plotë i Uzairit:

“Ju mund të kërcënoni individin, mund të tentoni ta shantazhoni, ta izoloni apo ta godisni personalisht… por nuk mund ta ndalni një ide që ka lindur nga zemra e popullit.
Ndryshimi nuk ka emër të vetëm , ai është zëri i të gjithë atyre që s’pranojnë më padrejtësi, që s’frikësohen më nga kërcënimet dhe që nuk i nënshtrohen askujt.
Koha e manipulimeve po perëndon.
Afër është tetori”, ka nënvizuar Uzairi.

Nënkryetari i Aleancës për Shqiptarët, Gezim Kadriu, ka reaguar ashpër ndaj deklaratave të Arben Fetait, duke i cilësuar si përpjekje për të mbuluar tradhtinë politike ndaj partisë dhe kryetarit Arben Taravari.

Kadriu duke iu përgjigjur Fetait i cili kërkoi dorëheqje të deputetëve të ASH-së, dhe dorëzim të mandateve, theksoi se është absurde që një person pa asnjë legjitimitet votash kërkon të diktojë fatin e deputetëve të zgjedhur me votë popullore.

“Po kërkon dorëheqje një person që s’ka marrë asnjë votë nga qytetarët, por është bërë ministër dhe zëvendëskryeministër si peshqesh politik, pa meritë, pa legjitimitet – thjesht si eksperiment!”, tha Kadriu.

Ai akuzoi Fetain se, ndonëse pretendon se ASH po afrohet me BDI-në, vetë është kthyer në “shërbëtor të VMRO-së së Mickoskit”, duke mbështetur një qeveri që po përjashton shqiptarët nga institucionet.

“Ministrat shqiptarë janë kthyer në makineri votimi – shpesh as nuk dinë çfarë po votojnë. Vetë e kanë pranuar!”, theksoi ai.

Sipas Kadriut, për një vit qeverisje janë bërë 12.400 punësime, por vetëm 200 deri 300 prej tyre janë shqiptarë. Ai shtoi se përfaqësimi shqiptar është ulur nga 28% në vetëm 3%, ndërsa 500 milionë euro kredi do t’i paguajnë të gjithë qytetarët, por asnjë kompani shqiptare nuk është ndihmuar.

“Po, ne kemi kritikuar BDI-në dhe do ta kritikojmë sërish – por me argumente. Por nëse mendoni se BDI është më e rrezikshme se kjo VMRO e Mickoskit, atëherë ose jeni të kapur, ose të shitur, ose pa asnjë ndërgjegje kombëtare”, deklaroi ai.

Kadriu përmbylli reagimin me një paralajmërim të fortë: “Talluni me shqiptarët deri në tetor… pastaj ikni, nga keni ardhur!”, ka përfunduar Kadriu.