Zudi Xhelili, analist politik, në një prononcim për agjencinë informative Flaka, ka komentuar rezultatet e sondazhit më të fundit të realizuar nga portali MKD.mk në bashkëpunim me agjencinë “Market Vision”, i cili ka matur përkrahjen për liderët dhe partitë politike në Maqedoninë e Veriut.

“Sondazhi i fundit dëshmoi qartë se përkrahja për opozitën shqiptare është më shumë se dyfish në krahasim me koalicionin qeveritar VLEN. Ky është një tregues i qartë i humbjes së legjitimitetit nga ana e partive që vazhdojnë të qëndrojnë në qeveri pa mbështetjen e shumicës shqiptare”, theksoi Xhelili.

Ai nënvizon se VLEN ka humbur pothuajse gjysmën e elektoratit që nga momenti kur Aleanca për Shqiptarët (ASH) u largua nga koalicioni. “Në të njëjtën kohë, dy liderët kryesorë të opozitës shqiptare – duke iu referuar Arben Taravarit dhe drejtuesve të tjerë të Frontit Kombëtar – gëzojnë një përkrahje të lartë dhe në rritje. Për dallim nga kjo, tre liderët e VLEN-it mbeten në kuota minimale, nga vetëm 1 deri në 2%, çka tregon mungesën e besimit të qytetarëve ndaj tyre”, deklaroi Xhelili për FLAKA.

Sipas tij, largimi i ASH-së nga qeveria ka qenë një sinjal i fortë politik. “Ai tregoi se margjinalizimi dhe përjashtimi i shqiptarëve nga proceset vendimmarrëse duhet të marrë fund. Ky hap ka sjellë ndjeshëm një ripozicionim të elektoratit shqiptar.”

Xhelili shton se paralajmërimet për një bashkim të mundshëm mes Frontit Europian dhe Frontit Kombëtar për zgjedhjet lokale e rrisin ndjeshëm mundësinë për fitore të sigurt në shumë komuna. “Një bashkëpunim i tillë do të ketë ndikim të madh në riformatimin e skenës politike shqiptare dhe do të sigurojë një përfaqësim më të drejtë e më të fuqishëm të shqiptarëve në institucionet shtetërore.”

Ai përfundoi se sondazhet janë një pasqyrë e asaj që ndodh në terren, por dinamika e re politike, veçanërisht bashkimi opozitar, do të jetë vendimtar në ndërtimin e një alternative të fuqishme dhe legjitime për shqiptarët në Maqedoninë e Veriut.

Sipas rezultateve të fundit nga një sondazh i realizuar nga MKD.mk në bashkëpunim me agjencinë e specializuar për hulumtime të opinionit publik Market Vision, qytetarët e Maqedonisë së Veriut mbeten të ndarë sa i përket drejtimit të vendit.

Në pyetjen “Në cilin drejtim mendoni se po shkojnë punët në Maqedoninë e Veriut?”, 40.5% e të anketuarve mendojnë se vendi po ecën në drejtim të gabuar, krahasuar me vetëm 34.3% që besojnë të kundërtën.

Ky perceptim negativ, sipas Aleancës për Shqiptarët (ASH), konfirmon shqetësimet e kahmotshme të ngritura nga kjo parti, se Maqedonia e Veriut po largohet nga rruga euroatlantike dhe po afrohet rrezikshëm me ndikime të huaja, sidomos me rrjetin ruso-serb.

“Këto shqetësime nuk janë vetëm të brendshme. Ato u artikuluan qartë edhe në Raportin e fundit të Parlamentit Evropian, i cili thekson ndikimin gjithnjë e më të madh të fushatave të dezinformimit dhe ndërhyrjeve të huaja në vendet e Ballkanit Perëndimor – përfshirë Maqedoninë e Veriut – duke vënë në dukje rolin destabilizues të qeverive të Hungarisë dhe Serbisë në avancimin e interesave strategjike të Rusisë dhe Kinës në rajon.

Përballë këtij realiteti alarmant, Aleanca për Shqiptarët u bën thirrje drejtuesve shtetërorë që të reflektojnë me përgjegjësi të plotë dhe të ndalin çdo qasje destruktive ndaj Bashkimit Evropian dhe Shteteve të Bashkuara të Amerikës. Po ashtu, kërkojmë që të ndërpriten menjëherë të gjitha lidhjet dhe komunikimet me “botën serbe” dhe aksin ruso-kinez, të cilat rrezikojnë integritetin demokratik dhe të ardhmen euroatlantike të vendit.

Kjo thirrje drejtohet sidomos ndaj përfaqësuesve shqiptarë në qeveri, përkatësisht liderëve të koalicionit VLEN, të cilët janë të obliguar të reflektojnë mbi këtë gjendje të rëndë dhe të tërhiqen nga një qeveri pa legjitimitet etnik, pa përkrahje shumicë dhe me orientim konfliktuoz ndaj Perëndimit.

Qëndrimi i Aleancës për Shqiptarët është i qartë, nuk synojmë pushtetin por kërkojmë ndalimin e politikave antishqiptare dhe antiperëndimore të kësaj qeverie. Ajo që kërkojmë është presion politik dhe qytetar mbi qeverinë aktuale që të ndalë orientimin e rrezikshëm dhe të kthehet në rrugën e integrimeve evropiane.

Aleanca për Shqiptarët ishte pjesë e qeverisë, por zgjodhi të largohet kur ky kurs u deformua. Të gjithë të tjerët që ndihen të kërcënuar nga zëri opozitar, duhet të kuptojnë se ne nuk ua zëmë vendin – por ua tregojmë drejtimin.

Se jemi në rrugë të drejtë dhe në përputhje me pritshmëritë e qytetarëve, këtë e dëshmojnë qartë edhe sondazhet më të fundit, të realizuara nga agjenci relevante dhe profesionale, të cilat flasin në mënyrë të padiskutueshme në favor të Aleancës për Shqiptarët dhe në dizfavor të thellë për përfaqësuesit e koalicionit VLEN. Ky është momenti që ata të reflektojnë me seriozitet, të kthehen te populli, dhe të ndjekin zërin e shumicës shqiptare, që sot kërkon qartazi orientim të vendosur pro-perëndimor dhe përfaqësim dinjitoz në skenën politike”, thekson ASH.

Një tjetër përpjekje për manipulim të opinionit publik po vjen nga portale të afërta me grupin e Arben Taravarit dhe koalicionin VLEN, të cilat kanë publikuar lajme të fabrikuara, duke pretenduar se zëvendëskryeministri për Qeverisje të Mirë, Arben Fetai, është politikani më i preferuar në shumicën e komunave shqiptare.

Në lajmin e botuar nga portali FOL, thuhet se sipas një ankete të realizuar nga agjencia kosovare UBO Consulting, Arben Fetai gëzon përkrahjen më të madhe në komunat si Gostivar, Dibër, Kumanovë, Likovë dhe Tearcë, duke lënë pas liderë të tjerë të VLEN-it si Izet Mexhiti, Bilall Kasami, Zeqirja Ibrahimi dhe Bekim Qoku.

Por asnjë element metodologjik i sondazhit nuk është publikuar. Nuk ka të dhëna për kampionin, pyetësorin, përqindjet, moshat, apo ndarjen gjinore dhe rajonale të të anketuarve. Madje, burime nga media të ndryshme theksojnë se nuk ka asnjë publikim zyrtar nga UBO Consulting që të konfirmojë një anketë të tillë gjatë periudhës 1–7 korrik 2025, siç pretendohet. Më shqetësuesja është se i njëjti sondazh, në versione të tjera të shpërndara nga portale pro-VLEN, është prezantuar si anketë për zgjedhjet lokale, dhe jo për liderët më të preferuar – një mospërputhje që zbulon nivelin e manipulimit dhe fabrikimit të lajmit.

Kjo duket si një tentativë e hapur nga Arben Fetai për të forcuar pozitat e tij brenda koalicionit VLEN, përmes një “ankete” që më shumë se çdo gjë tjetër synon të diskreditojë figurat tjera të VLEN-it si Izet Mexhiti, Bilall Kasami dhe Zeqirja Ibrahimi. Kjo qasje, për analistë të ndryshëm, vlerësohet si shenjë e qartë e tensioneve të brendshme në koalicion, ku në vend të sinergjisë politike, po zhvillohet një luftë e ftohtë për dominim personal.

“Në vend që të fokusohen në një alternativë të vërtetë për qytetarët shqiptarë, disa brenda VLEN po merren me ‘anketa’ që s’kanë asnjë bazë dhe shërbejnë vetëm për të rritur egon personale”, thonë burime të brendshme nga vetë strukturat e VLEN-it.

Arben Fetai, i vetëshpallur si trashëgimtar politik i ASH-së brenda koalicionit VLEN, nuk ka arritur të matet as në nivelin minimal të përkrahjes në mesin e liderëve shqiptarë, sipas anketës më të fundit të realizuar nga MKD.mk në bashkëpunim me agjencinë Market Vision. Kjo e bën rolin dhe peshën e tij politike brenda VLEN-it praktikisht të papërfillshme, sidomos në krahasim me rejtingun që gëzon ASH-ja e Arben Taravarit pas ndarjes nga koalicioni.

Analistë të ndryshëm e kanë lexuar këtë si përpjekje të Fetait për të ngritur artificialisht profilin e tij brenda një koalicioni që po përballet me rënie të mbështetjes dhe përçarje të brendshme. Në vend që të fokusohet në ndërtimin e alternativës, VLEN po përballet me një garë të brendshme për dominim, në të cilën fake news dhe propagandat personale po zëvendësojnë bashkëpunimin dhe vizionin e përbashkët.