VLEN erdhi në pushtet me premtime të mëdha për shqiptarët, por realiteti është krejt i kundërt. Nga premtimet e tyre të shumta, realizimi është zero, ndërsa i vetmi “rezultat” është degradimi i pozitës së shqiptarëve në shtet.

Një nga premtimet madhore ishte decentralizimi. VLEN premtonte më shumë buxhet dhe më shumë fuqi vendimmarrëse për komunat, zhvillim dhe barazi për qytetarët, modele evropiane të decentralizimit si Gjermania dhe Belgjika, si dhe komuna si nivel kryesor shtetëror për investime, administratë, rend civil dhe shërbime publike.

Por, çfarë ndodhi në realitet?

Qeveria VMRO-VLEN është duke përgatitur projektligj për pushtetin lokal më centralizues se kurrë më parë, duke i marrë kompetencat komunave, sikurse vendimi arbitrar për uljen e numrit të këshilltarëve komunal, që prek drejtpërdrejtë përfaqësimin e shqiptarëve, sidomos të mërgatës.Ky vendim u anulua nga Gjykata Kushtetuese, por qeveria dhe shumica parlamentare vazhdojnë ta injorojnë vendimin dhe të mbajnë në fuqi një diskriminim flagrant ndaj shqiptarëve.

Kjo është prova më e qartë se VLEN nuk punon për interesat e shqiptarëve, por vetëm për interesa të ngushta pushteti dhe për llogari të VMRO-së.

Aleanca për Shqiptarët thekson se decentralizimi është shtyllë e Marrëveshjes së Ohrit dhe vlerë evropiane. Çdo tentim për centralizim të pushtetit është hap prapa, dëmton zhvillimin ekonomik dhe thellon pabarazinë mes rajoneve të privilegjuara dhe atyre me shumicë shqiptare.

Nisur nga ky realitet i hidhur, bëhet edhe më e qartë se vendimi i Aleancës për Shqiptarët për të braktisur këtë qeveri antishqiptare dhe koalicionin VLEN ka qenë i drejtë, i qëlluar dhe vizionar. Çdo ditë që kalon dëshmon se ky vendim ishte jo vetëm reagim politik, por edhe alarm i domosdoshëm kundër padrejtësive sistematike që po u bëhen shqiptarëve nga kjo shumicë parlamentare, e cila në vend të barazisë dhe zhvillimit, ka zgjedhur rrugën e centralizimit, diskriminimit dhe degradimit të pozitës së shqiptarëve në shtet.

Shqiptarët nuk meritojnë të mashtrohen me fjalë të bukura, ndërkohë që në realitet qeveria e VLEN-it punon për ta kufizuar fuqinë e komunave dhe për ta dobësuar zërin e shqiptarëve, thuhet në kumtesën e Aleancës për Shqiptarët.

Disa media në gjuhën maqedonase i kanë reaguar ashpër shkrimtarit dhe publicistit të njohur shqiptar, Kim Mehmeti, pas një deklarate të tij ku ai shprehet kritik ndaj strukturës etnike dhe politike të elitave në Maqedoninë e Veriut.

Në një analizë të publikuar së fundmi, Mehmeti shkruan se: “Elitat maqedonase kryesisht janë të përbëra nga bullgarë e shqiptarë ortodoksë të serbizuar”, deklaratë kjo që ka shkaktuar reagime të forta në disa qarqe mediatike dhe politike maqedonase.

Sipas mediave maqedonase, fjalët e Mehmetit përbëjnë një “fjalor urrejtjeje dhe nënçmimi” ndaj popullit maqedonas dhe cenojnë bashkëjetesën ndëretnike në vend. Disa prej tyre e kanë akuzuar shkrimtarin për shpërndarje të gjuhës së urrejtjes dhe përpjekje për të delegjitimuar identitetin kombëtar maqedonas. Dhe kjo ka nxitur një varg reagimesh ku kërkohet ndëshkimi i Mehmetit për këto deklarata të tij.

Ndryshe, në analizën e tij, Mehmeti e përshkruan Maqedoninë e Veriut si një shtet të paqartësive dhe kontradiktave, ku sipas tij mungon një ndjenjë e vërtetë e bashkëjetesës dhe ku gënjeshtra është bërë pjesë e kulturës politike dhe shoqërore.

Ai shpreh kritika të forta edhe ndaj politikanëve shqiptarë në vend, të cilët i cilëson ose si “idiotë që nuk kuptojnë”, ose si “qyqarë që kanë frikë ta thonë të vërtetën”. Mehmeti thekson se shumë prej elitave politike maqedonase mohojnë origjinën e tyre etnike dhe përpiqen ta maskojnë këtë duke ushqyer urrejtje ndaj shqiptarëve dhe bullgarëve.

Reagimet ndaj shkrimit të Mehmetit kanë hapur sërish debatin për kufijtë e lirisë së shprehjes në një shoqëri multietnike si ajo e Maqedonisë së Veriut, ku tensionet ndëretnike ende nuk janë shuar plotësisht.

Kim Mehmeti, i njohur për stilin e tij kritik dhe për shkrimet që trajtojnë realitetin politik dhe shoqëror të shqiptarëve në Maqedoninë e Veriut, nuk ka reaguar ende publikisht ndaj akuzave të mediave maqedonase.

Tetova çdo ditë po humb pamjen e saj të gjelbër dhe të lirë për shkak të politikave të mbrapshta të kryetarit Bilall Kasami. Në vend që të punojë për zhvillim të qëndrueshëm, ajër më të pastër dhe hapësira të gjelbra për qytetarët, ai po e betonizon çdo cep të qytetit, duke e kthyer Tetovën në një kaos urban, në një qytet pa identitet.
Pronat publike që u takojnë të gjithë qytetarëve po shiten si të ishin pasuri private, duke i shërbyer interesave të klanit të tij dhe jo të ardhmes së qytetit. Këto veprime dënohen çdo ditë nga qytetarët të cilët përballen me këto devijime në përditshmërinë e tyre. Jo vetëm që jetesa sot është bërë e vështirë dhe e papërballueshme në këtë qytet por këto veprime të papranueshme janë shumë të dëmshme sidomos për gjeneratat që do të vijnë.
Rasti i fundit me ndryshimet e planifikuara për Bllokun Urban 42 në Tetovë ka ngritur shqetësime serioze në opinion. Drafti i ri i planit urbanistik, i miratuar nga Komuna e Tetovës, shënon fundin e Qendrës së Vjetër Tregtare dhe në vend të saj parashikon ndërtimin e dy kullave të mëdha banesore e afariste.
Në radhë të parë, një zhvillim i tillë pritet të ndikojë negativisht në komunikacion, duke rritur ndjeshëm qarkullimin e automjeteve në një zonë tashmë të ngarkuar. Për më tepër, ndërtimi i kullave të larta do të thellojë procesin e betonizimit të qytetit, duke reduktuar hapësirat publike të gjelbra dhe duke cenuar ekuilibrin estetik e historik të qendrës së vjetër.
Tetova nuk ka nevojë për më shumë betonizim, por për më shumë gjelbrim, parqe, shkolla, kopshte dhe infrastrukturë cilësore. Ka nevojë për plan të mirëfilltë afatgjatë dhe punë të mira e të mbara. Qyteti ynë meriton vizion, jo improvizime dhe vendime të shpejta që lënë pasoja afatgjata.
Qytetarët tanimë po ngrejnë zërin dhe do të mbrojnë pronën publike, do ta ruajnë qytetin e dy universiteteve sepse Tetova është e të gjithëve, jo e individëve që e përdorin për përfitime politike e personale, përfundojnë nga BDI dega Tetovë.