Connect with us

Lajme

Mësimi i gjuhës gjermane – bileta për dalje nga mjerimi

Published

on

Për shumë njerëz, veçanërisht ata në Ballkanin Perëndimor, njohja e gjuhës gjermane është bileta për në tregun e punës atje, shkruan DW, përcjell PRESSonline.al

Për miliona njerëz anembanë botës, anglishtja është bërë një lloj “lingua franca” e re, pra gjuha që ata përdorin për të komunikuar me njerëz jashtë gjuhës së tyre amtare. Në botën e globalizuar dhe të digjitalizuar të kanaleve të shumta të komunikimit dhe ekonomive të ndërthurura ngushtë globalisht, njohja e gjuhës angleze është e vetëkuptueshme, mbi të gjitha në botën e biznesit dhe tek të rinjtë. Me këtë gjuhë ata mund të komunikojnë në të gjithë botën, pavarësisht se ku janë apo ku janë duke udhëtuar.

Prandaj, nuk është për t’u habitur që edhe në vendet e Ballkanit Perëndimor (BP), anglishtja është kudo gjuha e parë e huaj që mësohet në shkolla. Por menjëherë pas saj në Kosovë, Bosnjë-Hercegovinë (B-H), Kroaci apo Serbi dhe vende të tjera të BP, është gjermanishtja ajo që mësojnë shumë njerëz. Këtë konfirmon në një intervistë për DW edhe Benjamin Hexhiq, këshilltar për arsim i ministrit federal në B-H dhe kryetar i Shoqatës Ndërkombëtare të Profesorëve të Gjuhës Gjermane IDV.

Duke folur për situatën në Bosnjë-Hercegovinë, ai thotë se “ka pasur përpjekje për të futur gjuhën ruse, turke, arabe e madje edhe kineze, si gjuhë të dytë. Por të gjitha këto ishin projekte të vogla rreth të cilave u mblodhën vetëm pak studentë. Në shumicën e rasteve, anglishtja është gjuha e parë e huaj, ndërsa gjermanishtja e dyta. E për ata që studiojnë të tretën, në disa gjimnaze, atëherë është frëngjishtja.”

Gjuha dhe emigracioni

Ka disa arsye pse të rinjtë mësojnë gjermanishten, thotë Hexhiq, por më e rëndësishmja është ajo ekonomike: “Gjuha gjermane është mbizotëruese në mesin e të rinjve dhe atyre që duan të studiojnë dhe të punojnë diku në një zonë gjermanishtfolëse. Kjo është veçanërisht e vërtetë për Evropën Juglindore, por edhe për disa vende të tjera, si India apo Afrika Sub-Sahariane. Ata mësojnë shumë gjermanisht atje, sepse është një lloj bilete për të dalë nga mjerimi dhe për një botë më të mirë.”

Statistikat tregojnë se 50,000 deri në 60,000 të rinj largohen vetëm nga B-H çdo vit, shumë prej tyre në Gjermani, Austri apo Zvicër. Kjo është sa një qytet i vogël në B-H çdo vit. Problemet janë serioze, paralajmëron Hexhiq: “Dalja e të rinjve nga Kroacia, Serbia dhe Bosnjë-Hercegovina është shumë e madhe. Na vjen mirë që gjermanishtja po mësohet, por do të donim që mësimi i gjuhës të mos jetë vetëm në një drejtim. Do të donim që ajo të jetë si një shkëmbim kulturash, që ne mund të jetojmë më mirë edhe në Ballkan dhe jo të vijmë në Gjermani për të jetuar më mirë. Do të doja që të rinjtë që vijnë këtu dhe fitojnë kompetenca, dhe më pas të kthehen në vendet e tyre, që të ketë lëvizshmëri dhe shkëmbim kulturor, sepse kështu mund të ndërtojmë një botë më të mirë.”

Lidhjet kulturore

Megjithatë, nuk qëndron gjithmonë vetëm motivi ekonomik pas dëshirës për të mësuar gjermanishten. Në Kroaci, Serbi apo Bosnjë-Hercegovinë, që nga koha e Austro-Hungarisë, ka pasur lidhje të shumta familjare me Gjermaninë apo Austrinë. Kultura gjermane perceptohet si e rëndësishme dhe interesante, e kjo u forcua më tej gjatë luftërave të viteve 1990. Në atë kohë, rreth 800,000 njerëz u larguan vetëm nga B-H, shumica e tyre në vendet gjermanishtfolëse. Shumë prej tyre janë kthyer në vendlindje dhe kanë sjellë me vete edhe gjuhën gjermane, thotë Hexhiq: “Ka shumë lidhje familjare dhe miqësie, njerëzit kanë nevojë të komunikojnë në gjermanisht – nuk janë vetëm arsye ekonomike dhe afariste. “

Të mësuarit e një gjuhe gjithmonë ka të bëjë me njohjen e kulturës që shfaqet në atë gjuhë. Dhe këtu, në shkallë globale, gjuha gjermane është nën presion të madh nga anglishtja, e cila dominon kulturën bashkëkohore – muzikën pop, filmat apo video-lojërat. Dhe nuk duhet të anashkalojmë faktin se ka gjuhë botërore me një numër kaq të madh folësish – si, për shembull, kinezishtja ose spanjishtja – që në krahasim me to, gjuha gjermane është në të vërtetë e vogël. Në të gjitha këto gjuhë, sigurisht që përhapet edhe kultura.

Por në zonën e Ballkanit Perëndimor, gjermanishtja ende perceptohet si një gjuhë e madhe dhe e rëndësishme. “Edhe pse në ditët e sotme është e vështirë të përcaktosh qarqet kulturore dhe të dallosh se nga vjen ndikimi. Por në vendet e Ballkanit Perëndimor, prania e kulturës gjermane apo austriake është e dukshme në jetën e përditshme”, thotë Hexhiq dhe shton: “Është e vështirë të thuash qartë se cilli është shkaku kryesor, por gjermanishtja ka hyrë në B-H si pjesë e kulturës. Është e pamohueshme që vendi është i orientuar drejt Evropës, drejt Perëndimit dhe drejt zonës gjermanishtfolëse. Kjo është e qartë edhe në media, duket nga mënyra e veshjes, zinxhirët e blerjeve… Ky ndikim është i madh.”

Autenticiteti i gjuhës

Deri në vitet 1980, në zonën e Ballkanit Perëndimor, por edhe gjetkë në botë, metoda e përkthimit gramatikor të mësimit të gjuhës ishte mbizotëruese: rregullat gramatikore dhe leksiku mësoheshin përmendësh, praktika konsistonte kryesisht në praktikimin e përkthimit. Megjithëse bënte të mundur leximin dhe shkrimin në një gjuhë të huaj, përdorimi aktiv i saj shpesh ishte shumë i kufizuar.

Kjo ka ndryshuar ndërkohë, shpjegon Hexhiq: “Sot, mësuesit përdorin media të ndryshme audio-vizuale dhe një qasje induktive. Ata flasin me nxënësit, duke u përpjekur t’i afrojnë ata me origjinalitetin e gjuhës. Është e vështirë të zotërosh gjuhën nëse nuk ke kontakt, nëse nuk e flet ate. Mediat janë shumë të rëndësishme. Kemi gjithnjë e më shumë studentë që mësojnë gjermanisht duke parë seriale ose duke dëgjuar muzikë. Mësimi fokusohet në bisedën me studentët në gjermanisht.”

Programi i mësimit të gjuhës së DW i ndihmon mësuesit në këtë. Kjo, thekson Hexhiq, është veçanërisht e rëndësishme kur bëhet fjalë për gjuhët e vogla: “Është shumë e dobishme që DW, në pjesën që merret me mësimin e gjuhës, të ketë përmbajtje edhe në gjuhën boshnjake. Kjo është shumë e rëndësishme për një gjuhë kaq të vogël.”

Përveç kësaj, thotë Hexhiq, programi i leximit të ngadaltë është shumë i suksesshëm. “Në disa vende, nuk përdoret vetëm për të mësuar gjuhën, por edhe për të praktikuar përkthimin simultan. Këto përmbajtje janë shumë të mirëseardhura për ata që duan të mësojnë gjuhën,” thekson Benjamin Hexhiq, kryetar i Shoqatës Ndërkombëtare të Profesorëve të Gjuhës Gjermane IDV.

Continue Reading

Lajme

Traumatologjia po “digjet”, rrezik për operacionet

Published

on

By

Në adresë të PortalitX ka ardhur një denoncim për mosfunksionimin e kondicionerit në Klinikën e Traumatologjisë në spitalin shtetëror “Nënë Tereza”.

Punonjësit që frikësohen nga hakmarrja e menaxhmentit, i thanë PortalitX që temperatura në sallat e operimit shënon 29.5 gradë celsius ndërsa maksimumi i lejuar për atë ambient operimi është 20. Për këtë na dërguan edhe një fotografi në të cilën qartë duket temperatura e theksuar si problematike.

Përveç rrezikut të infeksioneve gjatë operimit, poashtu edhe personeli mjekësor nuk mund të funksionojë në gjendje të temperaturës së lartë për shkak të mantelit, kapeleve si dhe dorëzave e maskës që detyrohen ti mbajnë për shkaqe higjienike të procedurës së operacionit.

Nga biseda me të punësuar të kësaj klinike kuptuam se ky problem zvarritet për vite me radhë, dhe aktualizohet në çdo sezonë vere, por përpos premtimeve, nuk kanë parë asgjë tjetër.

Continue Reading

Lajme

Snopçe: Këto të VLEN-it veprojnë si drejtëza paralele secili në mendësinë e vet pa një pikë të përbashkët

Published

on

By

Deputeti i Aleancës për Shqiptarët, Halil Snopçe përmes një postimi ka ironizuar liderët e VLEN-it se po sillen si drejtëza paralele pa asnjë pikë të përbashkët duke vepruar secili në mendësinë e vet. Snopçe ka pyetur liderët e VLEN-it se me cilin nga ta do të duhej të takohet kryeministri i Shqipërisë,me cilin nga to do ulet ai?, shkruan Top24

Këto të Vlenit veprojnë si drejtëza paralele secili me mendësinë dhe mentalitetin e vet pa mos pasur një pikë të përbashkët, pa mos pasur një kokë të përbashkët. Kanë shumë njerëz me vendimarrje por nuk kanë lider. Vizioni politik nuk ndërtohet në këtë mënyrë.
Parashtrohet pyetja me cilin prej tyre do të takohet kryeministri i Shqipërisē për shembull. Me cilin nga ato do ulet ai?
Në këtë formë, pa mos u takuar asgjëkundi, ato drejtëza paralele në rrugën e tyre do të humben dikundi në horizont pa mos dhënë asnjë efekt.

Continue Reading

Lajme

ASH: Shkupi i rrethuar nga ndikimi Botës Serbe – Anketa tregon: Rinia, viktimë e politikave që e largojnë BE-në

Published

on

By

Raporti më i fundit i Komitetit për Punë të Jashtme të Parlamentit Evropian ngre alarmin për gjendjen e rëndë politike, institucionale dhe gjeopolitike në Maqedoninë e Veriut.
Në qendër të vëmendjes është ndikimi malinj i projektit të ashtuquajtur “Bota Serbe”, që përpiqet të minojë sovranitetin e shteteve të rajonit përmes një boshti Beograd-Budapest-Moskë-Pekin.

Në dokument përmendet qartë se Serbia dhe Hungaria janë kthyer në kanale të ndikimit rus e kinez, që cenojnë orientimin euroatlantik të vendeve të rajonit;

Po ashtu, Media dhe strukturat e ndërlidhura me këto qendra përdorin dezinformimin masiv për të goditur NATO-n dhe BE-në;

Raporti thekson se arkivat e UDBA-s dhe KOS-it vazhdojnë të mbeten të mbyllura, ndërsa figura me të kaluar problematike kanë ndikim të thellë në politikën e sotme.

Kjo situatë, e cila përkon me paralajmërimet tona të vazhdueshme, është rrezik i drejtpërdrejtë për sigurinë dhe të ardhmen e qytetarëve, veçanërisht të rinisë shqiptare, e cila çdo ditë e më shumë humb besimin te eurointegrimet për shkak të stagnimit institucional dhe manipulimit politik.

Të gjitha këto vërejtje, në një formë apo në një tjetër, u thanë nga lideri Arben Taravari kur u sollë vendimi për braktisjen e qeverisë dhe koalicionit VLEN.

Njëkohësisht, rezultatet e fundit nga anketat e opinionit publik tregojnë një rënie dramatike të besimit të qytetarëve – veçanërisht të rinisë shqiptare – në procesin e integrimit evropian. Më shumë se gjysma e të anketuarve besojnë se Maqedonia e Veriut nuk është seriozisht e përkushtuar ndaj reformave, ndërsa një numër në rritje e shohin ndikimin serbo-rus si pengesën kryesore për të ardhmen euroatlantike të vendit. Këto të dhëna janë një sinjal i qartë se pa ndryshime rrënjësore në qeverisje, Maqedonia e Veriut rrezikon të humbasë brezin që më shumë ka besuar në Evropë.

Ne, si Aleanca për Shqiptarët, kemi paralajmëruar në mënyrë të përsëritur se rruga e Maqedonisë së Veriut drejt BE-së po sabotohet nga qeverisje klienteliste dhe e kapur, korrupsion i shfrenuar në nivelet më të larta, ligje të miratuara pa transparencë dhe pa konsensus demokratik, si dhe komprometimi i shpresës tek të rinjtë shqiptarë, që sot shohin emigrimin si zgjidhjen e vetme.

Në vend të përqendrimit në simbolika të identitetit, si diskutimi i panevojshëm për “gjuhën moderne”, institucionet duhet të merren me reforma të thella demokratike dhe hapjen e dosjeve të errëta të së kaluarës.

ASH kërkon zbatimin e plotë të rekomandimeve të BE-së për luftën kundër korrupsionit, hapjen e arkivave të UDBA-s dhe KOS-it si kusht për zbardhjen e së kaluarës dhe ndaljen e ndikimeve malinje, forcimin e institucioneve që garanton sundimin e ligjit dhe barazinë për të gjithë qytetarët.

Rruga e integrimit evropian nuk kalon përmes “Botës Serbe”, por përmes rindërtimit të besimit te drejtësia, liria dhe dinjiteti njerëzor.

Aleanca për Shqiptarët

Continue Reading

TOP Lajme