Pas publikimit nga Smart News të dokumentit për punësimin e vajzës së Latif Arifit – zëdhënës i VMRO-DPMNE-së dhe pronar i portalit Fol – në Ministrinë e Mbrojtjes, ka reaguar vetë Arifi. Në reagimin e tij, ai konfirmon se vajza, Teuta Arifi, është punësuar zyrtarisht, edhe pse më herët ka qenë e angazhuar me kontratë në vepër.

Burimet e Smart News konfirmojnë se vendimi për punësim të përhershëm është dhënë pasi Arifi u bë zëdhënës i VMRO-DPMNE-së, duke vënë në pah një marrëveshje të dyshimtë politike mes funksioneve publike dhe përfitimeve familjare.

“Vendimin për punë e mori sapo u shndërrua në zëdhënës të së keqes dhe idhtar i qeverisë monoetnike të Mickoskit,” shkruan Smart News.

Arifi, i njohur për krijimin e sondazheve të porositura në shërbim të VMRO-DPMNE-së, drejton portalin Fol, për të cilin Smart News ka dëshmi tronditëse për financim me para të gatshme – cash – të cilat do publikohen në ditët në vijim.

Në vend që të sqarojë këtë aferë, Arifi ka zgjedhur të sulmojë personalitete publike dhe të publikojë foto e komente të paqëndrueshme, në tentativë për të mbuluar realitetin.

“Kjo nuk është gazetari. Kjo është përpjekje për të fshehur një të vërtetë të madhe: se zëdhënësi i VMRO-së, i cili deri dje i vardisej liderëve shqiptarë si aktivist i labil, sot është përfitues direkt nga regjimi që i diskriminon shqiptarët,” thuhet në reagim.

Por publiku nuk harron. Më 5 maj, vetë Arifi deklaronte:

“Largimi eventual i Arben Taravarit me pesë deputetët nga qeveria nuk do të ishte humbje, por akt guximi që do të nxirrte në pah krizën e legjitimitetit.”

Vetëm pesë ditë më vonë, më 10 maj, ai e ndërroi narrativën – menjëherë pasi, sipas burimeve, mori garanci nga VMRO-DPMNE për punësimin e vajzës dhe sigurimin e financimit për portalin e tij.

Tetori po afrohet. Kjo lojë me dy fytyra nuk do të mbulohet gjatë. Faktet janë rrugës.

Çka shkruajti Smart News që u çartë Latif Arifi?

Dje u publikua lajmi se në Ministrinë e Mbrojtjes janë realizuar 26 punësime të reja, nga të cilat vetëm një ka shkuar për shqiptarët. Por ajo që nuk u tha – dhe që është thelbi i lajmit – është kujti i takoi ai një vend pune.

Burime të sigurta konfirmojnë se i vetmi punësim për shqiptarët është ndarë për Teuta Arifin, vajzën e Latif Arifit, një figurë publike e njohur për sulmet e vazhdueshme ndaj opozitës shqiptare, kryeministrit Edi Rama, ambasadorit Denion Meidani.

Latif Arifi, i cili vetëpozicionohet si “zëri i shqiptarëve të ndershëm”, është edhe drejtues i portalit “Fol”, nga ku – me gjuhë të papërmbajtur – lëshon çdo ditë “armë bërthamore” propagandistike, për të mbrojtur linjën politike të VMRO-DPMNE-së dhe për të sulmuar çdo shqiptar që nuk i përshtatet këtij narrativi.

Punësimi i vajzës së tij vjen pikërisht në këtë kontekst – në një ministri ku 8 pozita do të duhej të ishin të dedikuara për shqiptarët, bazuar në përfaqësimin e drejtë dhe adekuat, ndërsa në praktikë, i vetmi vend është përdorur si shpërblim politik për besnikëri mediatike.

Ironikisht, në shkrimin e tij të fundit, Latif Arifi thotë:

“Mos na shisni turpin tuaj për patriotizëm, shqiptarët nuk jetojnë më me mashtrime.”

Ndërkohë që ky “patriotizëm” i tij rezulton të jetë shumë i përkthyeshëm – në vende pune për familjarët, në pushtet, me zero llogaridhënie.

Rasti shton edhe një kapitull të ri në listën e punësimeve klienteliste të qeverisë së re, ku shqiptarët vazhdojnë të përjashtohen, përveç kur shërbejnë si zëdhënës të politikave maqedonase me emra shqiptarë.

Kjo nuk është thjesht ironi. Kjo është maskaradë.