Pas presioneve disamujore të opinionit, kryetarja e Komisionit për parandalimin e korrupsionit, Tatjana Dimitrovska dha dorëheqje nga pozita e saj, edhe pse për javë të tëra kishte refuzuar ta bëjë këtë.
Dorëheqja është dorëzuar në Kuvend, ku duhet të konstatohet formalisht. Në shkresën e saj drejtuar Kuvendi, dorëheqja nuk sqarohet më tej por vetëm i referohet nenit që parashikon të drejtën e saj për dorëheqje nga funksioni.

Dyshimet e Prokurorisë për punën e Dimitrovskës u publikuan muaj më parë por javën e kaluar Prokuroria për Krim të Organizuar dhe Korrupsion dorëzoi akuzë ndaj saj. Përveç për dhënien e sekretit zyrtar, ajo akuzohet edhe për falsifikimin e certifikatës për informata të klasifikuara.
Pas publikimit të dyshimeve të para në fund të muajit prill, Dimitrovska me një komunikim publik kërkoi të respektohet integriteti i saj dhe i familjes së saj, duke shtuar se nuk do të jepte sqarime të reja deri në përfundimin e hetimit.

“Tërësisht do të bashkëpunoj me organet gjyqësore dhe pres përfundim të shpejtë dhe transparent të ngjarjes. Masat e kujdesit do t’i respektoj në tërësi. Deri në deklarimin përfundimtar të Prokurorisë nuk do të jap deklarata shtesë, përveç nëse atë e diktojnë rrethanat, duke u udhëhequr nga interesi i integritetit institucional dhe transparenca. Pres që deri atëherë të respektohet integriteti i KSHPK-së, integriteti im dhe i familjes sime”, tha Tatjana Dimitrovska, Kryetare e Antikorrupsionit .

Antikorrupsioni kishte deklaruar se vazhdon rregullisht punën, Dimitrovska nuk shkonte në punë por merrte rrogë prej 2500 eurove neto, kurse shumica parlamentare deklarohej se nuk ka bazë ligjore për shkarkimin e saj për aq kohë sa nuk ka konstatohej fajësia. Ata kishin ftuar në përgjegjësi morale por duke mos marrë përsipër më shumë përgjegjësi mbi vete.

“Në jetë ekzistojnë dy mënyra të përgjegjësisë. Njëra është morale kur njeriu vjen në ndonjë pozitë dhe nëse bën gabim atëherë duhet vet të tërhiqet. Dhe e dyta është penale, përgjegjësi penale nëse ka kryer vepër penale”, tha Hristijan Mickoski, Kryeministër.

“Bazë ligjore nuk ka por pjesa e imazhit, nëse dikush mund ta udhëheqë atë komision derisa i është ngritur akuzë, kjo më tepër është çështje e etikës, imazhit dhe dinjitetit”, tha Afrim Gashi, Kryetar Kuvendi.

Për dallim prej partive të tjera, E Majta besonte se ka bazë për shkarkimin e saj dhe dorëzoi nismën për shkarkim në Kuvend. Tani nga kjo parti thonë se Dimitrovska dha dorëheqje për t’u shmangur konfrontimi politik dhe votimi në Kuvend. Kërkojnë dorëheqjen e gjithë Antikorrupsionit.

“Se kjo dorëheqje ishte dakordësuar, dhe jo vullnetare, tregohet qartë nga heshtja e DPMNE-së dhe qeverisë së udhëhequr nga Mickoski, si dhe e LDS-së, të cilët në asnjë moment nuk kërkuan përgjegjësi dhe as nuk bënë ndonjë kritikë ndaj punës së KSHPK-së. E Majta kërkon dorëheqjen kolektive të të gjithë KSHPK-së”, thonë nga E Majta.

Pas konstatimit të dorëheqjes në Kuvend, në afat prej dhjetë ditësh Kuvendi duhet të nënshkruar thirrje të re për zgjedhjen e anëtarit të ri të Antikorrupsionit./Alsat.mk