Presidenti i Ukrainës, Volodymyr Zelensky, ka njoftuar se një raund i ri bisedimesh paqeje me Rusinë do të zhvillohet të mërkurën në Stamboll, në përpjekje për të ndërprerë luftën që ka hyrë në vitin e katërt.

“Në ditën e sotme, diskutova me kreun e Këshillit të Sigurisë Kombëtare, Rustem Umerov, për përgatitjet lidhur me një shkëmbim të të burgosurve dhe për një takim tjetër me palën ruse në Turqi,” tha Zelensky në adresimin e tij të përditshëm të hënën. “Umerov raportoi se takimi është planifikuar për ditën e mërkurë.”

Propozimi për rifillimin e dialogut erdhi në fundjavë, vetëm pak ditë pasi Presidenti amerikan, Donald Trump, paralajmëroi sanksione “të ashpra” ndaj Rusisë nëse nuk arrihet një armëpushim brenda 50 ditëve.

Shtetet e Bashkuara kanë premtuar gjithashtu furnizime të reja me armë për ushtrinë ukrainase, në përgjigje të një vale të re sulmesh nga Rusia, e cila ka intensifikuar goditjet me dronë dhe raketa ndaj qyteteve ukrainase, duke shkaktuar viktima të shumta në mesin e civilëve.

Një zëdhënës i qeverisë turke konfirmoi se bisedimet do të mbahen në Stamboll, në të njëjtin vend ku më parë u zhvilluan negociata në maj dhe qershor, të cilat nuk sollën rezultate konkrete drejt një armëpushimi.

Sipas një zyrtari të lartë ukrainas që foli për agjencinë AFP, raundi i kësaj jave mund të përqendrohet tek shkëmbimi i të burgosurve dhe mundësia e një takimi të drejtpërdrejtë mes Presidentit Zelensky dhe Presidentit Putin.

Megjithatë, Moska ka minimizuar gjasat për arritjen e ndonjë marrëveshjeje të afërt. Zëdhënësi i Kremlinit, Dmitry Peskov, deklaroi të hënën se “dy palët janë diametralisht të kundërta në qëndrimet e tyre” dhe se “shumë punë diplomatike mbetet për t’u bërë”.

Rusia nisi pushtimin e plotë të Ukrainës në vitin 2022, dhe prej atëherë lufta ka shkaktuar dhjetëra mijëra viktima dhe zhvendosje masive të popullsisë. Raundi i ardhshëm në Stamboll shihet si një tjetër përpjekje për të gjetur një zgjidhje paqësore, mes tensioneve gjithnjë në rritje dhe presionit ndërkombëtar.

Të qenit i pasur nuk ka të bëjë vetëm me të ardhurat e larta. Çmimet ndryshojnë nga një vend në tjetrin dhe një pagë modeste mund të ketë më shumë vlerë atje ku kostoja e jetesës është më e ulët.

Edhe orët e punës nuk janë të njëjta: në disa vende arrihen të ardhura të larta me më pak orë pune, duke lënë më shumë kohë për pushim dhe jetë personale. Revista “The Economist” renditI 178 vende duke u bazuar në tre tregues.

I pari është Prodhimi i Brendshëm Bruto për frymë sipas kursit të këmbimit të tregut. Ky është një tregues i thjeshtë, i kuptueshëm dhe i përdorur gjerësisht. Por ai nuk merr parasysh ndryshimet e çmimeve mes vendeve.

Treguesi i dytë rregullon të ardhurat në raport me koston lokale të jetesës (i njohur si barazia e fuqisë blerëse, ose PPP). Ky jep një pasqyrë më të saktë të standardit të jetesës, por nuk merr parasysh kohën e lirë: pjesëmarrja në tregun e punës dhe gjatësia e orarit të punës ndryshojnë nga një vend në tjetrin.

Treguesi i fundit kombinon të dyja aspektet: çmimet lokale dhe orët e punës, duke ofruar kështu një matës më të plotë të mirëqenies reale.

Në renditje përfshihet dhe Shqipëria e vendet e tjera të Ballkanit Perëndimore, pa Kosovën.

Në treguesin e të ardhurave për frymë, me 10 mijë dollarë, Shqipëria lë pas si Bosnjë Hercegovinën (gati 9 mijë dollarë), ashtu dhe Maqedoninë e Veriut (9.3 mijë dollarë), ndërsa Mali i Zi dhe Serbia kanë përkatësisht 13 dhe 13.5 mijë dollarë të ardhura për frymë në vit. Shqipëria është e teta në gjithë Europën për renditjen nga fundit të vendeve që kanë të ardhura më të ulëta për frymë, duke lënë pas Azerbaxhanin, Moldavine, Bjellorusinë, Armeninë, Bosnjë hercegovinën, Gjerogjinë, Maqedoninë e Veriut.

Por, kur kalohet në dy treguesit e tjerë, që marrin në konsideratë si diferencat e çmimeve (që përshtat të ardhurat për ndryshimet e kostos së jetesës në vende të ndryshme) ashtu dhe treguesi i fundit që llogarit të ardhurat duke u bazuar në çmimet dhe orët që punohet (Tregon sa pasuri gjenerohet realisht për orë pune në çdo vend.

Ky është treguesi më i drejtë për të krahasuar efikasitetin ekonomik të popullsisë punëtore), të ardhurat relative ulen, duke reflektuar çmimet e shtrenjta, ndërkohë që orët e punës janë të gjata. Shqiprarët kanë të ardhurat më të ulëta në rajon, krahasuar me fuqinë blerëse, pas Bosnjë Hercegovinës dhe janë të katërit në Europë, pas Moldavisë, Bosnjë Hercegovinës dhe Armenisë.

Të ardhurat e rregulluara për çmimet dhe orët që punohet, në Shqipëri në vitin 2024 ishin 26.4 mijë dollarë, nga 22 mijë dollarë në Bosnjë Hercegovinë. Të dhënat tregojnë qartë se shqiptarët janë ndër punëtorët, që ndonëse kanë orë të gjata pune, janë më pak më të shpërblyerit.

Ndërkohë që në Maqedoninë e Veriut kjo shifër arrin në mbi 30 mijë dollarë dhe, në Serbi 31.6 mijë në Mal të Zi në mbi 36 mijë, Shqipëria mbetet shumë më pas në vlerën ekonomike që prodhon për çdo orë pune.

Madje, edhe Bosnja dhe Hercegovina, me një PBB nominale më të ulët për frymë, arrin të ketë një produktivitet të krahasueshëm me Shqipërinë kur bëhet fjalë për të ardhurat efektive të punës.

Ky pozicionim i dobët lidhet jo me numrin e ulët të orëve të punës, përkundrazi Shqitarët punojnë një rekord prej 43.7 orë në javë, nga 36.1 orë mesatarja europiane, por me strukturën e tregut të punës dhe natyrën e ekonomisë shqiptare.

Pjesa më e madhe e punës kryhet në sektorë me vlerë të ulët të shtuar – si bujqësia informale, tregtia e vogël apo shërbimet jo-produktive – të cilat nuk gjenerojnë të ardhura të mjaftueshme krahasuar me kohën e investuar.

Në krahasim me vendet e Bashkimit Europian, hendeku është edhe më i madh. Sipas The Economist, vendet si Zvicra dhe Irlanda arrijnë të gjenerojnë mbi 90 mijë dollarë për frymë në vit të korrigjuar për orë pune.

Edhe vende me ekonomi më të strukturuara si Gjermania, Austria apo Suedia luhaten në shifrat 70–80 mijë dollarë. Shqipëria, me pak më shumë se 26 mijë, mbetet shumë larg këtij standardi.

Analiza e The Economist shtron një mesazh të qartë për vendet në zhvillim si Shqipëria: rritja e produktivitetit nuk vjen vetëm nga më shumë punë, por nga punë më efikase, më të mirëpaguar dhe në sektorë me teknologji më të lartë dhe me më shumë vlerë të shtuar.

Në mungesë të reformave strukturore në arsim, punësim dhe teknologji, Shqipëria rrezikon të ngelet një vend ku punohet shumë, por ku shpërblimi ekonomik mbetet modest./ Revista Monitor

Bashkimi Demokratik për Integrim (BDI) ka zhvilluar një mbledhje në selinë qendrore në Reçicë të Vogël, ku janë miratuar disa nga emrat që do të garojnë në zgjedhjet lokale të ardhshme. Lajmin e bëri të ditur nënkryetari i partisë, Arbër Ademi, i cili tha se strukturat partiake kanë votuar njëzëri për kandidatët e propozuar, shkruan Flaka.

Sipas konfirmimit zyrtar, Valdet Xhaferi do të jetë bartës i listës për Këshillin Komunal në Gostivar. Me këto vendime, BDI brenda Frontit Kombëtar ka kompletuar dyshen e garës në Gostivar, ku tashmë është zyrtarizuar edhe kandidatura e Valbon Limanit të ASH-së për kryetar komune. Kjo do të thotë se Valbon Limani do të garojë për kreun e komunës, ndërsa Valdet Xhaferi do të udhëheqë listën e këshilltarëve në emër të Frontit Kombëtar.

Zyrtarizimi i këtyre emrave vjen në prag të një fushate që pritet të jetë e ashpër, ku përplasjet politike midis Frontit Kombëtar dhe koalicionit VLEN janë më të theksuara. Flaka