“Në emër të profesionalizmit, shqiptarët rrezikohen të përfaqësohen në institucionet Publike”. Kështu ka deklaruar për Televizionin Shenja, profesori dhe njëherësh njëri ndër anëtarët e grupit punues rreth Ligjit për Përfaqësim të Drejtë dhe Adekuatë, Mersim Maksuti. Megjithatë, Profesori thotë se Përfaqësimi i Drejtë dhe Adekuatë është vlerë, duke shtuar se është njëra ndër vlerat më të rëndësishme të rendit kushtetuse, madje siç tha, njëra ndër vlerat kryesore të ndërtimit të këtij shtet që lidh bashkëjetesën.

MERSIM MAKSUTI,PROFESOR UNIVERSITAR

“Përfaqësimi i qytetarëve në bazë të përkatësive të tyre etnike është një e drejtë kolektive e tyre. Ti cenon një të drejtë të nji kolegtiviteti të caktum, ndërsa profesionalizmi është dytësor në këtë rast, sepse ti me profesionalizëm mundë të cenosh një të drejtë të një qytetari si individ dhe kur këta të drejta ndeshen, si një pjesëtar i një kolegtiviteti dhe si një individ, si rregull e drejta kolektive prevalon, dominon dhe prandaj unë e shoh si rrezik”.

Profesor Maksuti thotë se rastet e fundit që i kemi me këto konkurset ku numri i shqiptarëve të punësuar është simbolik ose zero është një dëshmi se në emër të profesionalizmit, ne rrezikojmë përfaqësimin e shqiptarëve në institucionet publike. Një ndër vërejtjet kryesore për këtë Ligj, Profesori Maksuti theksoi se është mungesa e elementin sanksionues.

MERSIM MAKSUTI,PROFESOR UNIVERSITAR

“Vërejtja kryesore që bie në sy është se i mungon komponenta, elementi sanksionues d.m.th nuk i sigurohet mbrojtje juridike, pra nuk parashihet me ligj ndonjë sanksion. Sanksionet janë të natyrës kundërvajtse, e cila do të ndëshkonte të gjithë zyrtarët publikë, njerëzit që janë kompententë për zbatimin e ligjit, që ato të ken një lloj detyrimi para ligjit për zbatimin e ligjit në praktik. Shifni, kjo është ajo vërëtja kurciale bazike që kam te ligji”.

Kujtojmë se ligji për Përfaqësim të Drejtë dhe Adekuatë, është miratuar në seancën qeveritarë, ndërsa pritet i njejti të dërgohet për mendim në Komisionin e Venecias dhe pas do rikthehet këtu ku do të ketë debat publike dhe pritet të shifet se a do të miratohet edhe në Kuvend. /SHENJA/

Sindikata e Pavarur e Policisë në Maqedoninë e Veriut ka ngritur zërin kundër, siç thuhet, diskriminimit sistematik dhe pamundësisë për avancim në karrierë të pjesëtarëve shqiptarë të policisë.

Përmes një deklarate nga nënsekretari i përgjithshëm, Florim Alimi, theksohet se një numër i madh policësh, pavarësisht përvojës shumëvjeçare profesionale dhe kualifikimeve të nevojshme, nuk kanë arritur të avancojnë në pozita zyrtare. Ata shprehin shqetësim për faktin se në vendbanimet me shumicë shqiptare, numri i policëve dhe kuadrit drejtues është i barabartë mes shqiptarëve dhe maqedonasve, ndërsa në vendet ku shqiptarët janë pakicë, ata nuk merren parasysh për pozita të larta – për dallim nga maqedonasit që vendosen në funksione të larta edhe në mjedise shqiptare.

“Avancimi i kuadrove shqiptare nuk është i mjaftueshëm. Kjo është veçanërisht e theksuar te kuadri menaxherial dhe në nivelet më të larta udhëheqëse. Më së shumti diskriminim është vërejtur në Manastir dhe disa qytete ku shqiptarët janë më pak të pranishëm, si Ohri dhe Prilepi, ku gjendja është shumë e keqe,” deklaroi Florim Alimi për PortalX.

“Në kuadret udhëheqëse mungon përfaqësimi sipas përqindjes së popullsisë. Për shembull, në Tetovë, Gostivar, Kërçovë, Strugë – sipas vizitave që kemi bërë dhe përqindjes lokale të popullsisë – menaxhmenti do të duhej të ishte në raport 80/20. Por në shumicën e rasteve kemi raport 1/1, pra dy shefa ndërrimi shqiptarë dhe dy maqedonas. E për pozitat më të larta, as që ia vlen të flasim. Sigurisht që ekziston një qëllim i caktuar pas kësaj, prandaj kam kërkuar takim zyrtar me zëvendësministrin Iseni, funksionar i lartë, që të shqyrtohet ky shqetësim i kuadrove shqiptare,” tha Alimi.

Ai thekson se ky problem ndikon negativisht jo vetëm në moralin dhe motivimin e të punësuarve, por krijon edhe një ndjenjë të qartë diskriminimi dhe pabarazie në sistem. Si shembull përmend edhe rastin e tij personal: me mbi 23 vite përvojë pune dhe të gjitha kualifikimet e nevojshme, ende nuk i është ofruar mundësia për avancim.

Sindikata nënvizon përkushtimin e saj për përfaqësim të drejtë të të gjithë nëpunësve policorë dhe kërkon nga institucionet kompetente që të ndërmarrin masa konkrete për të siguruar trajtim të barabartë për çdo të punësuar, në përputhje me përvojën, përkushtimin dhe kontributin profesional të tij.

Kur Gjykata Kushtetuese rrëzon vendime, faji është i BDI-së; kur sjell vendime pozitive, meritat janë të VLEN-it. Ku është konsistenca?

Koalicioni VLEN ka reaguar me entuziazëm ndaj vendimit të fundit të Gjykatës Kushtetuese për të shfuqizuar pjesën e metodologjisë së regjistrimit të popullsisë, që ndante qytetarët në “rezidentë” dhe “jo-rezidentë”, duke deklaruar se kjo është një “fitore e së drejtës” dhe “fitore e diasporës shqiptare”. Në një reagim publik, VLEN e cilëson regjistrimin e udhëhequr nga qeveria e kaluar BDI-LSDM si një nga veprimet më të dëmshme ndaj shqiptarëve në diasporë dhe si përpjekje politike për ta zvogëluar peshën e tyre.

“Vendimi i Gjykatës Kushtetuese konfirmon atë që ne në VLEN e kemi thënë me kohë: regjistrimi i fundit i popullsisë, i udhëhequr nga qeverisja e atëhershme BDI-LSDM, ishte një ndër veprimet më të dëmshme dhe fyese për diasporën shqiptare! Qeverisja e kaluar, përmes Entit të Statistikave dhe në koordinim të plotë me strukturat politike të BDI-së, krijoi kategori “popullsi rezidente” dhe “jorezidente”, duke i trajtuar mërgimtarët tanë si qytetarë të dorës së dytë. Kjo ishte akt i qëllimshëm politik për ta minimizuar peshën reale të shqiptarëve në shtet. Kjo ishte përpjekje për ta zhbërë kontributin dhe peshën politike të diasporës shqiptare, për interesa të ulëta partiake. Në një përpjekje të dëshpëruar për të larë duart nga përgjegjësia, BDI nxjerr një deputet për të mbrojtur padrejtësinë që ia bëri mërgatës shqiptare, me argumente të stërholluara por të zbrazëta. Ne në VLEN e themi qartë: dëmi është bërë, por ne do ta korrigjojmë kudo ku është e mundur! Vendimi i Gjykatës Kushtetuese është fitore e së drejtës, fitore e diasporës shqiptare dhe dëshmi se shteti nuk mund të sillet me arrogancë ndaj qytetarëve të vet.
VLEN është i përkushtuar që të vendos dinjitetin e mërgatës shqiptare, ta përfshijë plotësisht në jetën politike e institucionale dhe të korrigjojë çdo padrejtësi të trashëguar nga qeverisjet e kaluara.

Por ky qëndrim ngre pyetje të rëndësishme për koherencën dhe qëndrueshmërinë e diskursit të këtij koalicioni. Kur Gjykata Kushtetuese sjell vendime të tjera, të cilat nuk përputhen me interesat politike të VLEN-it, siç ishte rasti me shfuqizimin e “Balanserit” apo interpretimi i ligjit për përdorimin e gjuhëve, po ky subjekt ka akuzuar haptazi se Gjykata është nën ndikimin e BDI-së. Madje, shpesh është aluduar se “regjia” e vendimeve është bërë në selinë e BDI-së dhe se vendimet janë të motivuara politikisht.

Sot, kur vendimi është në favor të narrativës politike të VLEN-it, e njëjta Gjykatë Kushtetuese konsiderohet nga ky subjekt si mjet i drejtësisë së vonuar, por të merituar.

Kjo qasje kontradiktore ngre pikëpyetje serioze:

A ka VLEN ndikim në punën e Gjykatës Kushtetuese apo jo?
Si mund të pretendohet njëherë se Gjykata është e kapur, e njëherë tjetër se vendimet janë dëshmi e “fitoreve të tyre politike”?
A ka një standard të dyfishtë në trajtimin e institucioneve të pavarura, në varësi të rezultatit që ato prodhojnë?
Edhe më paradoksale është fakti që iniciativa për këtë vendim të fundit ishte dorëzuar nga deputeti Skender Rexhepi-Zejdi, pjesë e Frontit Evropian, dhe jo nga ndonjë përfaqësues i VLEN-it. Por në reagimet e tyre, VLEN e përvetëson rezultatin si sukses të vetin, pa asnjë përmendje për origjinën reale të iniciativës juridike.

Në këtë situatë, qytetarët shqiptarë kanë të drejtë të kërkojnë transparencë dhe qëndrueshmëri nga përfaqësuesit e tyre. Sepse një politikë që ndërtohet mbi aktrime episodike dhe retorikë të personalizuar të suksesit, rrezikon të shndërrohet në politikë të momentit, e jo të parimeve./Flaka.com.mk/