Nxënësit në shkollat e Tetovës vazhdojnë të kenë mungesë të librave edhe në javën e dytë të vitit të ri shkollor, pavarësisht premtimeve të ministres së Arsimit se këtë vit nuk do të ketë mungesë të librave, shkruan Portalb.mk.

Portalb.mk bisedoi me disa drejtorë të shkollave fillore dhe të mesme të Tetovës, ata thonë se kanë pranuar tekste të reja, megjithatë jo të gjitha.

“Presim sot ose nesër të vijnë librat për klasën e shtatë me konceptin e ri mësimor. Gjithashtu presim edhe librat për gjuhë të huaja prej klasës së katërt deri në klasën e nëntë”, tha Sihana Kaba Kasami, drejtoreshë e Shkollës Fillore “Kirili dhe Metodi”.

“Shërbimet që merren me atë punë nuk e kanë gati raportin sepse të enjten dhe të premten e kaluar i kanë dorëzuar dhe pranuar nxënësit libra. Tani ata do bëjnë krahasim me librat e dorëzuara, të pranuara dhe ato të rejat që i kanë sjellë deri më sot. Pastaj so shpërndahen edhe të rejat që kanë ardhë deri tani dhe do del rezultati. Sa kemi, sa na duhen. Kemi pasur rekomandim nga MASH që viteve të para mos t’ju jepen lobra sepse do i sjellin krejt librat e reja, deri sot ende nuk i kanë sjellë”, tha Jeton Kamberi, drejtor i Gjimnazit “Kiril Pejçinoviq”.

“Anglisht dhe Frëngjisht i kanë sjellë librat kurse te tjerat jemi të informuar se në ditët në vazhdim do t’i sjellin”, tha Muzafer Livoreka, drejtor i Shkollës së Mesme Tekstile “Gjoce Stojçeski”.

Nga Komuna e Tetovës nuk japin numër konkret se sa libra mungojnë në të gjithë shkollat.

Pak ditë më parë, ministrja e Arsimit Vesna Janevska e pranoi se ka probleme me tekstet shkollore, ndërkaq për të njëjtat janë shpenzuar 11 milionë euro.

Megjithatë, nga Ministria e Arsimit dhe Shkencës në një përgjigje për Portalb.mk insistojnë se janë siguruar tekste shkollore për të gjithë nxënësit.

“Plotësisht të reja janë për klasën e shtatë në arsimin fillor dhe për vitin e parë në gjimnaz për shkak të zbatimit të programeve të reja mësimore, ndërsa për herë të parë pas shtatë vitesh ka edhe tekste të reja në të gjitha gjuhët e huaja në arsimin fillor dhe të mesëm. Është shtypur i gjithë tirazhi që e kërkuan shkollat përmes aplikacionit elektronik të MASh-it”, thanë nga Ministria e Arsimit.

Ndryshe, Ministria për Arsim dhe Shkencë më 11 qershor kishte urdhëruar shkollat që mos të furnizojnë nxënësit me libra të dëmtuara, pasi para shtatorit do të sjellin libra të reja.

Kujtojmë që nxënësit në mbarë vendin përballen me mungesë të librave me vite të tëra.

Deklaratat e fundit të ministrit serb të mbrojtjes Bratislav Gashiq dhe anëtares së qeverisë së Serbisë, Milica Gjurgjeviq Stamenkovski, në Kajmakçallan, nuk janë thjesht kujtesë historike, por një mesazh politik me ngarkesë të qartë aktuale: krijimi i “unitetit të popullit serb” kudo që jeton. Kjo retorikë është e rrezikshme për rajonin dhe për Maqedoninë e Veriut në veçanti, sepse e vendos vendin tonë në orbitën e projektit famëkeq të “Botës Serbe”.

Fatkeqësisht, qeveria aktuale e VMRO-DPMNE-së bashkë me vazalët e saj të VLEN-it, me heshtjen dhe nënshtrimin e tyre politik, e kanë futur Maqedoninë e Veriut me të dyja këmbët në këtë “Botë Serbe”. Duke mos reaguar dhe duke pranuar imponimin e narrativave nacionaliste nga Beogradi, ata po e bëjnë vendin tonë pjesë të një projekti që mohon identitetin dhe sovranitetin e qytetarëve tanë.

Aleanca për Shqiptarët thekson se Maqedonia e Veriut nuk është dhe nuk mund të bëhet kurrë “portë e lirisë” për ushtritë dhe planet hegjemoniste të Serbisë. Qytetarët shqiptarë dhe të gjithë ata që besojnë në një shtet evropian, duhet të kuptojnë se rruga jonë është drejt Perëndimit dhe Bashkimit Evropian, jo kthim pas në skenarë të rrezikshëm të shekullit të kaluar.

Ne i bëjmë thirrje Ministrisë së Punëve të Jashtme që të reagojë qartë dhe pa ekuivoke ndaj këtyre deklaratave provokuese, në vend që të heshtë nga frika e prishjes së raporteve me Beogradin. Sovraniteti i Maqedonisë së Veriut dhe qetësia ndër-etnike nuk mund të jenë monedhë shkëmbimi në pazaret politike të VMRO-së dhe vasalëve të saj.

Aleanca për Shqiptarët do të vazhdojë të qëndrojë fuqishëm kundër çdo përpjekjeje për të zhbërë orientimin euro-atlantik të Maqedonisë së Veriut dhe për ta shndërruar vendin në pjesë të “Botës Serbe”.

Aleanca për Shqiptarët

Hapja e Shtabit Zgjedhor të VLEN-it në Çair, që ishte menduar të jetë një shfaqje force politike dhe demonstrim i mbështetjes së gjerë, në fakt rezultoi në një paradë kontradiktash dhe autogolash politikë. Nga njëra anë, organizatorët tentuan të krijojnë një atmosferë festive e masive, por në përpjekje për të mbushur hapësirën e vogël të një oborri në një nga ndërtresat e Çairit, ata u detyruan të sjellin aktivistë nga cep në cep i Maqedonisë së Veriut. Në vend që kjo të jepte përshtypjen e një lëvizjeje të fuqishme lokale, në fakt u ekspozua një dobësi themelore: mungesa e mbështetjes së sinqertë dhe të madhe brenda vetë Çairit.

Shumë prej pjesëmarrësve shpërndanë në rrjete sociale postime nga Likova, Struga, Tetova e qytete të tjera, duke zbuluar pa vetëdije se turma ishte e importuar. Kjo e ktheu sloganin “Çairi foli” në një bllof të madh, pasi ata që folën nuk ishin çairas, por militantë të transportuar për të krijuar iluzionin e masës. Në këtë mënyrë, vetë VLEN-i e demaskoi veten duke shfaqur jo vetëm dobësitë organizative, por edhe mungesën e kredibilitetit për të bindur opinionin publik.

Fjalimet e liderëve e thelluan edhe më tej kontradiktën. Bekim Fazliu rikujtoi me stilin e tij retorik epokën e PDSH-së, kur sheshet mbusheshin me transport të organizuar, por zgjedhjet humbeshin. Adnan Azizi tentoi të japë një kuptim të ri emrit “Izet”, por doli kontradiktor dhe madje u ironizua nga fakti se në fjalorin shqip nuk ekziston një interpretim i tillë, përkundrazi ekziston vetëm fjala “lezet”. Zeqirja Ibrahimi bëri lapsusin e radhës duke futur fenë dhe të dërguarin e Zotit në një fjalim për një figurë që vetë e kishte quajtur dikur “kriminel, hajn, mashtrues”. Ky kthim i beftë dhe pa shpjegim e minon seriozisht kredibilitetin e tij. Ndërkohë, Bilall Kasami mbeti në vargjet e zakonshme të mësuara përmendësh, pa sjellë diçka të re, ndërsa Arben Fetai u paraqit si një figurë kontradiktore që shpesh ushqehet nga shpifje e gjysmë të vërteta.

Por autogoli më i madh erdhi nga vetë Izet Mexhiti. Ai foli për 20 vite keqqeverisje të BDI-së, duke harruar se vetë ka qenë pjesë kyçe e asaj periudhe, sidomos në Çair. Ky mesazh e dëmton rëndë, sepse publiku e di mirë rolin e tij dhe nuk mund të mashtrohet lehtë nga retorika. Në vend që të bindë për ndryshim, ai i rikujtoi votuesit të kaluarën e tij të gjatë në pushtet.

Moti stabil dhe pa reshje shiu nuk i ndihmoi aspak organizimit të VLEN-it. Në fakt, po të kishte rënë shi, çadrat e njerëzve do ta kishin mbuluar hapësirën e vogël dhe do ta bënin tubimin të dukej madhështor, me një panoramë masive që mungoi mbrëmë.

Në fund, hapja e shtabit nuk shërbeu për të ngritur moralin e strukturave, as për të tërhequr votuesit e pavendosur. Përkundrazi, u shndërrua në një shfaqje teatrale, ku në vend që të tregohej fuqi, u ekspozuan dobësi të thella strategjike dhe organizative. Çairasit e panë qartë se pas parullës “Çairi foli” fshihej një realitet tjetër: një grumbull militantësh të sjellë nga jashtë dhe një fjalor politik i vjetëruar, që nuk sjell frymë të re.

Ky aktivitet, që duhej të ishte kulm i entuziazmit për VLEN-in, përfundoi duke ofruar material ironik për kundërshtarët dhe zhgënjim për ata që prisnin diçka të re. Në vend të demonstrimit të vizionit, u dëshmua mungesa e tij.