Deputetja e Kuvendit të Republikës së Maqedonisë së Veriut, Mimoza Musa, mori pjesë sot në ngjarjen me temë “Sfidat demografike dhe zgjidhjet e mundshme”, e organizuar nga Qeveria, në bashkëpunim me UNFPA dhe Koordinatorin Kombëtar për Demografi.

Gjatë këtij diskutimi të nivelit të lartë, pjesëmarrësit analizuan fenomenet shqetësuese që po prekin vendin dhe rajonin, si migracioni i brendshëm dhe i jashtëm, rënia e normave të lindshmërisë dhe plakja graduale e popullsisë.

Në fjalën e saj, deputetja Musa theksoi se këto sfida kërkojnë një përgjigje të përbashkët, të koordinuar dhe me plane të qarta afatgjata.

“Migracioni dhe rënia e lindshmërisë nuk janë thjesht shifra në statistika – ato janë histori njerëzore, sfida për familjet, për komunat dhe për shtetin. Vetëm përmes bashkëpunimit të ngushtë ndërmjet institucioneve, organizatave vendore dhe ndërkombëtare, mund të ndërtojmë politika efektive që nxisin qëndrueshmëri dhe zhvillim afatgjatë,” u shpreh Musa.

Ajo vuri në dukje se është thelbësore të krijohen kushte më të mira për të rinjtë, për familjet e reja dhe për të kthyer besimin e qytetarëve se ardhmëria e tyre është e sigurt brenda vendit.

Ngjarja u karakterizua nga shkëmbimi i ideve dhe praktikave të mira ndërmjet përfaqësuesve të institucioneve shtetërore, trupave ndërkombëtare dhe ekspertëve të fushës, me synimin për të hartuar zgjidhje konkrete për sfidat demografike që ndodhen përpara.

Aleanca për Shqiptarët shpreh shqetësim dhe denoncon publikisht projektligjin për organizimin e lojërave të fatit, që pritet të kalojë në Qeveri dhe Kuvend nga VMRO–DPMNE dhe marioneta VLEN.

Ky projektligj përmban 199 nene, por asnjëri prej tyre nuk përmbush premtimet e dhëna nga koalicioni VLEN për mbylljen e bastoreve, reduktimin e pikave të bixhozit dhe ndalimin e lojërave online.

VLEN premtoi se do t’i mbyllë bastoret dhe kazinotë, se do të ulë për së paku 50% numrin e objekteve ku luhet bixhoz, dhe se do të mbyllë lojërat online me interpretim autentik të ligjit.

Por sot realiteti është krejt ndryshe. Në vendin tonë ka mbi 1.400 pika bixhozi, dhe këto vetëm po shtohen. Sipas të dhënave financiare, të ardhurat vjetore të industrisë së lojërave të fatit arrijnë nga 800 milionë deri në 1 miliard euro, që përbën pothuajse një të katërtën e buxhetit shtetëror. E gjithë kjo ndodh me miratimin e heshtur ose aktiv të partnerëve shqiptarë në qeveri.

Këtë e dëshmon edhe Neni 4 i ligjit të ri, që legalizon dhe zgjeron çdo formë të bixhozit, përfshirë edhe përmes internetit:

Neni 4:
1. Lojërat e fatit mund të jenë lojëra të përgjithshme të fatit dhe lojëra të veçanta të fatit.
2. Lojërat e përgjithshme të fatit janë:
 1) lojërat e fatit të tipit lotari;
 2) lojërat elektronike të fatit;
 3) lojërat shpërblyese;
 4) lojërat interaktive të fatit;
 5) lojërat e fatit në formë dhurate (giveaway).
3. Lojërat e veçanta të fatit janë:
 1) lojërat në kazino;
 2) lojërat në bastore;
 3) lojërat në klubet me aparate elektronike.
4. Lojërat e fatit në internet përfshijnë të gjitha llojet nga pika 2 dhe 3, si dhe çdo formë tjetër të lojës ku pjesëmarrësi mund të luajë përmes rrjetit global të internetit.

Me këtë nen, jo vetëm që nuk ndalohet asnjë formë e bixhozit, por legalizohen të gjitha – në çdo format dhe në çdo platformë, duke përfshirë edhe lojërat përmes internetit, të cilat VLEN premtoi t’i mbyllte.

Kjo është një tradhti politike ndaj qytetarëve shqiptarë dhe një mashtrim i hapur elektoral.

Në vend që të mbronin shoqërinë, të rinjtë dhe familjet shqiptare nga shkatërrimi që sjell bixhozi, përfaqësuesit e VLEN-it po bëhen garant të ligjit që e legalizon dhe institucionalizon këtë industri.

Qëndrimi ynë është i qartë. Aleanca për Shqiptarët kërkon tërheqjen urgjente të këtij ligji, dhe poashtu,
refuzim të prerë nga ana e VLEN-it. Mos ju interesojnë vetëm hiset e përqindjeve por edhe interesi i popullit. Nëse nuk kanë kurajë ta kundërshtojnë publikisht, atëherë le të pranojnë hapur se e kanë tradhtuar besimin e shqiptarëve.

Aleanca për Shqiptarët

Kryetari i Aleancës për Shqiptarët, Arben Taravari, ka reaguar sot për komentet dhe interpretimet që kanë pasuar takimin e tij me kryeministrin e Shqipërisë, Edi Rama, që u zhvillua ditë më parë në Çarshinë e Shkupit.

“Ky ishte një takim i natyrshëm mes përfaqësuesve politikë shqiptarë, në një moment të caktuar, në një kontekst që nuk është përgatitur si ngjarje protokollare”, deklaroi Taravari në një prononcim për media.

Duke u ndalur te reagimet e qytetarëve, Taravari theksoi se ndjeshmëritë e shfaqura janë të mirëkuptueshme, por Aleanca për Shqiptarët nuk lejon asnjëherë që të cenohet krenaria kolektive.

“Dua ta them qartë se Aleanca për Shqiptarët dhe unë personalisht nuk do të pranojmë kurrë që dinjiteti i shqiptarëve në Maqedoninë e Veriut të shihet si i dorëzuar apo i përbuzur,” tha ai.