Zyrtari i Aleancës për Shqiptarët, Gadaf Uzairi, ka hedhur akuza të drejtpërdrejta ndaj koalicionit VLEN, duke i akuzuar për heshtje të qëllimshme dhe tolerim të industrisë së lojërave të fatit, e cila, sipas tij, po shkatërron të rinjtë dhe familjet shqiptare.

“VLEN po mbyll sytë para një plage që po shkatërron familjet shqiptare… lojërat e fatit! Ndërsa të rinjtë po fundosën në borxhe dhe varfëri, VLEN hesht… apo edhe më keq, i mbron interesat e atyre që pasurohen mbi shpresat e të mjerëve,” deklaroi Uzairi.

Ai shtoi se kjo sjellje nuk ka të bëjë aspak me idealin e ndryshimit që VLEN pretendon ta përfaqësojë:

“Ky nuk është ndryshim, kjo është shitje morale. Nëse nuk keni guxim të ndalni këtë të keqe, të paktën mos e mashtroni popullin me fjalën ‘ndryshim’,” përfundoi Uzairi.

Deklarata vjen në një moment kur shqetësimet për përhapjen e kazinove dhe bastoreve sportive, sidomos në zonat me shumicë shqiptare, janë në rritje, ndërsa institucionet heshtin. Aleanca për Shqiptarët ka paralajmëruar se do të vijojë me presion publik dhe institucional për ta ndalur këtë fenomen. Flaka

Komisioni Shtetëror për Parandalimin e Korrupsionit ka konfirmuar për Portalb.mk se ka formuar lëndë për paratë e lëshuara nga Komuna e Çairit në llogari të kafiterisë “1Sh” e cila është në pronësi të zëvendës-ministres së Transportit, Kaltrina Zekolli Shaqiri.

“Procedurat mbi lëndën janë duke vazhduar dhe pas përcaktimit të gjendjes faktike në rastin konkret, do të merret një vendim në një seancë publike të KSHPK-së”, thanë nga KSHPK për Portalb.mk.

Për këtë rast alarmoi edhe partia “E Majta”, të cilët i bënë thirrje Antikorrupsionit të merr masa.

Kujtojmë që Portalb.mk muajin e kaluar zbuloi se mijëra euro nga Komuna e Çairit i janë ndarë në mënyrë sistematike kafiterisë ‘1sh’ në pronësi të zëvendësministres së Transportit dhe ndër njerëzve më të afërm të Izet Mexhitit, Kaltrina Zekolli Shaqirit. Mjetet janë ndarë pa shpallje publike dhe me marrëveshje sy-më-sy. Afër 9 mijë euro i janë lëshuar kësaj kafiterie që kur Zekolli-Shaqiri është zëvendësministre, për më pak se 1 vit. Fqinjët e intervistuar nga Portalb-i thanë se kafiteria më së shpeshti frekuentohet nga aktivistë të Lëvizjes Demokratike. Komuna e Çairit s’i komentoi transaksionet e vjetra, thotë se në vitin 2025 aty janë ushqyer sportistët e Çairit kur kanë pasur gara, gjithashtu nuk përgjigjet se pse vetëm ky lokal ndër vite kryen këtë ‘shërbim’ për ata, pa ju dhënë mundësi bizneseve tjera. Zëvendësministrja theksoi se është vetëm pronare dhe se nuk merret me pjesën e pagesave.

Aleanca për Shqiptarët shpreh shqetësimin e thellë ndaj mënyrës se si po prezantohet në opinion ligji i ri për lojërat e fatit dhe lojërat argëtuese. Pavarësisht propagandës se do të mbyllen kazinot dhe bastoret pranë shkollave, teksti ligjor flet ndryshe: bixhozi jo vetëm që nuk mbyllet, por institucionalizohet me përjashtime të rrezikshme që dëmtojnë familjen dhe të rinjtë tanë.

Ky është një ligj që nuk synon mbylljen, por riorganizimin dhe zgjatjen e jetës së industrisë së bixhozit në formë të rregulluar.

Dëshmi për këtë është përmbajtja e Nenit 24, i cili në mënyrë të qartë:
1. Lejon funksionimin e kazinove, klubeve të automatëve dhe lojërave elektronike të fatit në hapësira të posaçme, duke kërkuar vetëm kushte tekniko-teknologjike që i përcakton ministri i financave (paragrafi 1).
2. Vendos një distancë minimale prej 500 metrash nga shkollat fillore dhe të mesme, por kjo vlen vetëm për kazinot dhe automatet (paragrafi 2).
3. Bëhet përjashtim për bastoret: pikërisht në paragrafin 3, thuhet qartë se “kjo distancë nuk vlen për pikat e pagesës për bastore”. Pra, bastoret mund të qëndrojnë pranë shkollave!
4. Edhe më alarmuese është se në bastoret pranë shkollave, nuk ndalohen vetë bastet, por vetëm makineritë elektronike për lojëra – siç përcaktohet në paragrafin 4. Pra, bixhozi mbetet aktiv, vetëm pak më “i rafinuar”.
5. Distanca prej 500 metrash interpretohet si “rruga më e shkurtër e sigurt” dhe përcaktohet me elaborate gjeodezike që mund t’i bëjë një gjeodet privat ose kompani private (paragrafi 5), duke lënë hapësirë për manipulime.
6. E gjithë kjo procedurë teknike për distancat i lihet në dorë drejtorit të Agjencisë për Kadastër, jo institucioneve arsimore ose shëndetësore (paragrafi 6).

Ky ligj është i ndërtuar qëllimisht për të ruajtur interesat e industrisë së bixhozit, jo për ta mbrojtur të rinjtë nga varësia.

Si Aleancë për Shqiptarët, kërkojmë mbyllje reale dhe të pakushtëzuar të të gjitha kazinove, bastoreve dhe formave të lojërave të fatit që funksionojnë pranë institucioneve arsimore dhe në lagje të banuara.

Ndajmë bindjen tonë me qytetarët se nuk do të pranojmë ligje që maskojnë krimin ekonomik e social si “reformë ligjore”. Bixhozi nuk reformohet – bixhozi duhet ndalur.

Përfundimisht, i bëjmë thirrje grupimit FLEN të lexojë me kujdes ligjin që u është servuar nga partneri i tyre strategjik – në vend që të dalin të përgjumur në opinion dhe të flasin broçkulla, gënjeshtra dhe mashtrime.

Deklaratat e tyre mbi ligjin e ri për lojërat e fatit japin përshtypjen se as nuk e kanë lexuar tekstin ligjor që po e mbrojnë kaq verbërisht. Kjo është papërgjegjësi, mungesë serioziteti dhe fyerje për qytetarët që kërkojnë mbrojtje nga një fenomen shkatërrues si bixhozi.

Aleanca për Shqiptarët