Nuk ka datë konkrete ende se kur do të fillojnë punimet në Maqedoninë e Veriut për rrugën Tetovë – Prizren, derisa nga ana e Kosovës vijojnë punimet, shkruan Portalb.mk.

Të pyetur për ecurinë e projektit, nga kabineti i zëvendës-ministres së Transportit, Kaltrina Zekolli Shaqirit, për Portalb.mk theksua se në kohë rekord është siguruar dhe përgatitur detyra projektuese nga Fakulteti i Ndërtimtarisë dokument ky që përmban specifikimet dhe kërkesat bazë për projektimin e tunelit.

“Kjo detyrë projektuese tashmë i është dorëzuar palës kosovare për shqyrtim dhe harmonizim, për të siguruar dakordim të plotë para hapjes së procedurave të mëtejshme”, thanë nga kabineti i Kaltrina Zekolli Shaqirit.

Nga aty shtuan se pas përfundimit të kësaj faze dhe miratimit të përbashkët të detyrës projektuese, hapi i radhës do të jetë shpallja e tenderit për projektimin teknik të tunelit.

“Jemi në kontakt të vazhdueshëm me palën kosovare dhe po bëjmë përpjekje që të mos ketë vonesa në asnjë moment të këtij procesi”, shtuan nga kabineti i zëvendës-ministres.

Nga Ministria e Mjedisit, Planifikimit Hapësinor dhe Infrastrukturës e Kosovës nuk u përgjigjën në pyetjet gazetareske të Portalb.mk për këtë projekt.

Pas shumë zvarritjeve, në prill 2025 u formua grupi i përbashkët i punës midis RMV-së dhe Kosovës për këtë projekt, ndërsa takimi i parë u mbajt dy muaj më pas në qershor, ku u theksua përshpejtimi i procedurave burokratike.

Paraprakisht, nga Ministria e Transportit të RMV-së kanë bërë të ditur se është ndarë buxheti për fazën e projektimit të tunelit.

Ndryshe nga RMV-ja, në Kosovë me 13 gusht 2024 filluan punimet për rrugën Prizren – Tetovë. Paraprakisht me 2 gusht 2024 Kosova nënshkroi kontratat për realizimin e punimeve për këtë projekt. Ndërsa më 23 maj 2024 në Kuvendin e Republikës së Kosovës u miratua propozimi për ratifikimin e marrëveshjes për bashkëfinancimin e punimeve në rrugën Tetovë – Prizren.

Sipas marrëveshjes së nënshkruar në Shkup në janar 2024 , vetëm për finalizimin e dokumenteve për projektimin e tunelit që do ta lidh këtë rrugë do të duhen një vjet e gjysmë, që do të thotë deri në mes të vitit 2026.

18 muaj është afati për kompletimin e dokumentacionit të projektit për ndërtimin e tunelit për rrugën Tetovë – Prizren, ndërkaq financimi i ndërtimit të tunelit do të bëhet në vlerë proporcionale, sipas gjatësisë së tunelit në territorin e secilës anë. Kjo mes tjerash është e përfshirë në marrëveshjen mes Maqedonisë së Veriut dhe Kosovës për ndërtimin e rrugës Tetovë-Prizren, të cilën Portalb.mk e publikoi ekskluzivisht.

Aktualisht prej Tetovës në Prizren, rruga është 109 kilometra, ndërkaq me rrugën e re parashikohet të shkurtohet për 69 kilometra, gjegjësisht kjo rrugë do të jetë e gjatë 40.6 kilometra.

Kjo rrugë në të kaluarën është premtuar në shumë cikle zgjedhore në RMV, por pa realizim deri më tani.

Aleanca për Shqiptarët nga Arben Taravari ka reaguar në lidhje me fushatën e Ministrisë së Bujqësisë në Maqedoninë e Veriut. Ata fushatën “Më e mira maqedonase: tradita jonë, krenaria jonë”, transmeton Portalb.mk.

“Fushata e re e Ministrisë së Bujqësisë me sloganin “Македонско најдобро: Наша традиција, наша гордост” përbën një fyerje të hapur për qytetarët shqiptarë dhe për të gjitha komunitetet jomaqedonase në Republikën e Maqedonisë së Veriut”, reaguan nga ASH-ja.

Ata vlerësojnë se përmes fushatës me epitet “makedonsko”, bëhet përpjekje për ta shndërruar Maqedoninë e Veriut në një shtet monoetnik.

“Si mund të quhen “produkte maqedonase” domatet e Dibrës, djathi i Sharrit, lakra e Begovinës, qepa e Gostivarit, perimet e Likovës, rrushi i Vrapçishtit apo gruri i Karadakut, pa përmendur asnjëherë shqiptarët që i punojnë dhe i prodhojnë ato? Kjo është nacionalizëm institucional i ambalazhuar si promovim ekonomik”, deklaruan nga Aleanca.

Aleanca fajësoi zëvendësministrin Albrim Hoxhën se përmes heshtjes është bashkëfajtor.

“Koalicioni shqiptar në qeveri, që premtuan barazi dhe dinjitet, është zhdukur nga çdo reagim publik. Kur shqiptarët përjashtohen nga koncepti i identitetit prodhues dhe nga simbolet shtetërore, FLEN nuk thotë asgjë. Kur shteti përdoret për të promovuar vetëm një etni, FLEN sërish hesht”, deklaruan nga Aleanca.

Bajram Rexhepi nga BDI ka dalë me reagim në lidhje me situatën në Fondin për Sigurim Shëndetësor, njofton Top24.mk

Ai thotë se me votimin e VLEN që në këtë Fond të hiqet përfaqësimi i shqiptarëve, është goditur barasia institucionale.

“Përjashtimi i shqiptarëve nga bashkëdrejtimi i Fondit për Sigurim Shëndetësor është goditje e drejtpërdrejtë ndaj barazisë institucionale.

Deputetët e VLEN-it zgjodhën të votojnë për një strukturë të centralizuar që heq përfaqësimin shqiptar në një nga institucionet më të ndjeshme të shtetit, Fondin për Sigurim Shëndetësor.
Për këtë nuk ka justifikim. Ka vetëm heshtje dhe servilizëm”, shkruan Rexhep