Aleanca për Shqiptarët e Arben Taravarit sot ka prezantuar pikën e gjashtë të Platformës Kombëtare.

Kjo pikë i dedikohet diasporës shqiptare pasi siç thonë nga ASH ata janë është një pasuri kombëtare për zhvillimin e shqiptarëve.

Njoftimi i plotë nga ASH-Taravari:
Të nderuar qytetarë, përfaqësues të mediave dhe bashkëkombës shqiptarë,

Shpalosja e Pikës 6 të Platformës Kombëtare:
Diaspora dhe Marrëdhëniet Ndërkombëtare
Të nderuar qytetarë, të dashur bashkatdhetarë,
Në prezantimin e Platformës Kombëtare, sot ndalem te një shtyllë thelbësore për forcimin dhe zhvillimin e kombit tonë, diaspora shqiptare dhe marrëdhëniet ndërkombëtare.
Diaspora shqiptare është pasuri kombëtare. Ajo nuk është thjesht një pjesë e shpërndarë e popullit tonë, por një forcë e gjallë që kontribuon çdo ditë, nga ekonomia e arsimi, deri te kultura dhe politika. Aleanca për Shqiptarët është e vendosur që këtë potencial ta kthejë në motor zhvillimi për çdo komunë dhe rajon ku jetojnë shqiptarët.
Ne do të krijojmë mekanizma të qëndrueshëm për nxitjen e investimeve nga diaspora, duke lehtësuar procedurat, duke ofruar kushte të favorshme dhe duke hapur rrugë për projekte të reja që sjellin punësim dhe mirëqenie.
Po aq e rëndësishme është ruajtja e identitetit tonë kombëtar në mërgatë. Përmes shkollave plotësuese të gjuhës shqipe, aktiviteteve kulturore, sportive e artistike, do të sigurojmë që çdo brez i shqiptarëve jashtë vendit të mbetet i lidhur fort me gjuhën, traditat dhe vlerat tona.
Diaspora është gjithashtu një aleat i fuqishëm në arenën ndërkombëtare. Me diplomaci qytetare dhe partneritete me organizata e institucione të huaja, do të forcojmë zërin e shqiptarëve dhe do të mbrojmë interesat tona kombëtare kudo në botë.
Një komb që bashkohet me diasporën e tij është një komb i pathyeshëm.
Ky është besimi ynë. Kjo është rruga jonë.

Kryetari i Aleancës për Shqiptarët, Arben Taravari ka dalë me një kritikë të ashpër këtë mbrëmje, duke aluduar në koalicionin VLEN.

Thotë se çdo gjë që bëjnë e thojnë ata, s’vlen.
“Frika të tjetërson realitetin…kur ajo i kontrollon njerëzit, asgjë që ata bëjnë dhe thonë Nuk Ka Vlerë ose shkurt: SVLEN!”, tha Taravari.

Kandidati i Besëlidhjes Aleanca Kombëtare për Integrim, Bujar Osmani, në rrjetin social facebook ka shpërndarë një video mesazh, në të cilin thotë, se Maqedonia e Veriut është shtëpia jonë e përbashkët, po ashtu edhe Çairi, ku në çdo lagje, jetojnë bashkë- shqiptarë, maqedonas, romë e të tjerë.

Osmani, thotë se si kryetar i ardhshëm i Çairit, do të jetë shtylla e marrëdhënieve të mira ndëretnike.
“Maqedonia e Veriut është shtëpia jonë e përbashkët. E në Çair, në çdo rrugë, në çdo lagje, jetojmë bashkë – shqiptarë, maqedonas, romë dhe të tjerë. Bashkë ndajmë të njëjtat gëzime, por edhe të njëjtat sfida, të njëjtat ëndrra për një jetë më të mirë.

Marrëveshja Paqësore e Ohrit na e hapi rrugën e barazisë dhe respektit. Ajo është themeli i qëndrueshmërisë, garancia që të ardhmen do ta ndërtojmë së bashku, pa dallime e përçarje.
Si kryetar i ardhshëm i komunës, do të jem shtylla e marrëdhënieve të mira ndëretnike. Do të kujdesem njësoj për çdo qytetar, do të investoj njësoj në çdo lagje, pa dallim përkatësie etnike apo fetare. Besoj se vetëm përmes besimit dhe respektit të ndërsjellë mund ta ngremë Çairin nga hiri.

Gjithmonë kam qenë dhe do të mbetem në anën e paqes, drejtësisë dhe bashkëjetesës. Do të jem urë mes komuniteteve, zë i arsyes dhe faktor bashkimi në kohën kur na nevojitet më shumë uniteti.
Forca jonë është te fakti që jemi bashkë. Dhe kështu do të vazhdojmë – të fortë, të bashkuar dhe të vendosur ta ndërtojmë Çairin si shtëpi për të gjithë. # VizioniriperÇairin”, ka deklaruar Osmani.